الفصل الثالث والثلاثون

حجر القمر Shimaanoaman 1782كلمة

سكينة روح
وبُعد عمن يؤذونها بكلمات تخرج من أفواههم وكأنها طلقات رصاص
سمعت حديثهم ....
رأت نظرات أعينهم المشمئزة والمستنكرة
في البداية لم تعرف ما الأمر خاصة أن زينب صديقتها الوحيدة بينهم أصبحت تعاملها معاملة سيئة وانضمت لحزبهم
إلا عندما سمعت كلماتهم التي مزقتها وأوجعت قلبها
_ يا بنتى دى عشيقته أنا شفتهم بعنيا في مكتبه
وصاحت أخرى بابتسامة خبيثة ماكرة وكأنها عثرت على كنز ثمين
_ الجديد بقى عندى أنا
والتفت حولها الفتيات لتكمل :
_أنا بعنيا دى شوفتها وهى خارجة من أوضة نومه وهو خرج وراها على طول وكان بيظبط هدومه
شهقات مستنكرة وأخرى تريد المزيد ..
تجاهلت وابتعدت هي وحدها مكتفية عن الجميع حاولت التناسى والتجاهل لكل ما سمعته وأذى روحها ومزق نياط قلبها
أرادت الوحدة مع أصدقائها ونالتها
الورقة والقلم ...
ترسم ..... تمرر خطوطها بسلاسة ونعومة
تعود وترسم لوحتها
تراه في كل لوحة ..
تراه في خطوطها ....
تراه في كل شيء وأى شيء
حاولت تناسيه وما الأمر إلا محض عبث !
_ رسمك حلو قوى على فكرة
نظرت لمن اقتحم خلوتها بغيظ و تجاهلته وعادت تكمل عملها ولدهشتها اقترب أكثر حتى جلس أمامها:
_ مش معقول مش فكرانى
وبنظرة غاضبة نحوه :
_ إسطوانة قديمة شوف غيرها وغور من وشى أحسنلك
ابتسم بإعجاب :
_ أنا مالك زهران .....وأنتِ
قامت من مكانها غاضبة تمسك بتلابيه :
_ أنا اللى هخلى الست الوالدة تترحم عليك .....أنت مش بتفهم ليه مش قولت غور من قدامى
أمسك بيدها ينزلها بهدوء :
_ يا بنتى افهمى أنا مالك اللى خدتِ منه الكورة ع البحر النهارده الصبح
تركته زاجرة :
_ وبعدين .....جاى تتسلى حضرتك أنا مش رجعتلك الكورة في حاجة تانية
ابتسم بثقة:
_ يا ستى بنتعرف .....هو حرام يعنى
عادت تنظر له بشراسة :
_ بص يا ابنى أنا خلقى ضيق وعفاريت الدنيا بتنطط في وشى الأحسن تروح تشرب اللبن وتنام بدرى يا أمور
رد بهدوء :
_ ما تهدى على نفسك يا وحش مش كده يعنى ده إحنا بس بنتعرف و.....
وقبل أن يكمل تعارفه كانت لكمة قوية تضرب فكه ليتراجع متفاجئاً وصوت غاضب ينفجر في وجهه :
_ تتعرف على مين يا روح أمك
وصراع اشتد وصرختها وهى تمسك بالرجل الذي اشتبك معه وبعض الشباب تدخلوا ليكونوا حائلاً بينهما ويوسف يسرع نحوهم :
_ في إيه يا شباب مش كده
صاح مالك بغضب :
_ أنت مش عارف أنا مين وابن مين ......ده أنا هنسفك
وغضب يتأجج وأدهم يسرع نحوه متجاهلاً بكائها وصياحها باسمه ويعود ليضرب وجهه من جديد
_ غور من هنا يابن ***
ويبدو أن مالك ليس بالهين ولا الذى يتقبل الإهانة ويصمت فاندفع نحو أدهم يضرب وجهه :
_ لأ واضح إن الست الوالدة نسيت تربيك
واشتباك من جديد وتدخل بعض الرجال من جديد حتى انتهت المشادة وأمسك بيدها مبتعداً
أوقفته بخوف عندما رأت بقعة دم بجوار شفتيه :
_ أدهم استنى بس وشك متعور
نظر إليها بغضب يصرخ:
_ أنتِ إزاى تسمحى لكلب زى ده يكلمك وتفضلى ساكتة .....إزاى متقلعيش اللى في رجلك وتنزلى بيه على دماغه
أمسكت بيده تجلسه ليهدأ وجلست بجواره تخرج منديلاً تمسح به آثار الدماء
_ يا أدهم أنا اتفاجئت بيه قدامى ولو أنت كنت اتأخرت شويه كنت هتشوف أنا هعمل إيه
زعق بغيظ:
_ وحياة أمه ما هسيبه
_ خلاص بقى ده أنت شوهت وشه
_ ولو كانوا سابونى كنت قتلته كمان مش شوهت وشه بس
******
كيس ثلج وصيحة ألم
_ أنت غبى يا ابنى إيه اللى أنت عملته ده؟
وضع كيس الثلج أسفل عينه متألماً :
_ وأنا أعرف منين إنها مراته يا يوسف كنت بشم على ضهر إيدى
زجره بغضب :
_ يعنى ومن كل البنات مفيش غير تولين اللى تعاكسها
ابتسم بهدوء :
_ يا ابنى أنا مش بعاكس ولا حاجة ....أنا من ساعة ما شوفتها وأنا اتشديت لها ولمّا جت وخدت منى الكورة قولت أهى فرصة نتعرف ونفتح كلام وفجأة ضربت البت المغنية دى اللى اسمها عهد وشوفت اللى عملته معاها .....الصراحة حطتها في دماغى وقولت لازم اتعرف عليها ......بس حظى الزفت تطلع متجوزة
ضربه يوسف في كتفه :
_ نشنت يا فالح ومش من أي حد.......دى متجوزة أدهم الجبالى شخصياً يعنى يا حبيبي الست والدتك شكلها كانت داعية عليك قبل ما تموت
نظر إليه بجدية :
_ بس اللى أعرفه إن أدهم ده متجوز بنت وزير سابق .....وأنا أعرفها كويس بشوفها دايماً في حفلات وغيره
ابتعد عنه يوسف يقف أمامه ويستند على كرسى خلفه :
_ تولين مراته التانية
اتسعت عيناه بدهشة :
_ التانية .....اللى أعرفه إنه بيحب مراته بنت الوزير دي جداً .....حتى سها أختى كانت بتحسدهم على الحب ده وبتتمنى تلاقى راجل زى أدهم ده ......بس تصدق لمّا اشوف وشها هقولها تعالى شوفى البلطجى اللى كان عاجبك
ضحك يوسف مقهقهاً :
_ وعاوزه يعملك إيه وأنت بتعاكس مراته ......ياخدك بالحضن مثلاً
ابتسم قائلاً:
_ بس تصدق ......البنت دى خسارة فيه
وشرد بعينيه بعيداً :
_ خسارة فعلا إننا اتقابلنا بعد فوات الأوان
******
ولقاء بالصديقة والسند والذى وضعته في موضع الأب الراحل أسرعت نحوهم تناديه بفرحة :
_ عمو محسن وحشتنى جداً
ربت على وجنتها بحنو :
_ عاملة إيه يا تولين .....أنتِ كويسة !
أجابته بنظرة حائرة تخرج كلماتها بحشرجة :
_ الحمدلله.....أنا كويسة
وتركته والتفتت لريم وصفية أمها وانشغل محسن مع يوسف الذى أحضرهم من المطار للفندق
_ دلوقتي اتفضلوا علي أوضكم عشان نجهز لحفلة بالليل
اعترض محسن :
_ يا ابنى وإيه لازمته المشوار والتعب ده كله
ابتسم يوسف وعيناه تحاوط من تتهرب من نظرته المسيطرة :
_ عاهدت نفسى قبل كده إنى أفرحها وأفرحكم زى ما أنتوا دايماً كنتوا سبب في سعادتى
صاحت تولين مشاكسة:
_ ما تجوز الولاد بقى يا محسن وخلينا نخلص منهم
وضحكات تبادلوها ويوسف يكمل :
_ بالله عليك جوزنى بقى قبل ما اتجوز على روحى
الليلة بإذن الله هنعلن الخطوبة وإن شاء الله أول ما أجهز الشقة نتجوز على طول .....كل المطلوب منكم دلوقتي تستريحوا لحد ميعاد بالليل
أمسكت تولين بذراع ريم :
_ طيب بعد إذنكم أنا محتاجة ريم شويه
*****
_ وبعدين يعنى لحد إمتى هتفضلى تايهة في النص كده مش عارفه راسك من رجليكِ لحد إمتى يا تولين .....؟!!
أغمضت عينيها واستسلم جسدها للسكينة
_ أنا معترفة إن اللى حصل كان غصب عني يا ريم
معترفة إنى حبيته وغصب عنى اتعلقت بيه ودلوقتي مبقاش في إيدى حاجة اعملها
صاحت ريم :
_ لأ في و أول حاجة إنكم تعلنوا جوازكم قدام الناس كلها ولا عاجبك الكلام اللى بيتقال وأنتِ سمعتيه بودنك لسه فاضل إيه عشان تفضلوا مخبيين كأنكم عاملين عملة ولا ماشى معاكِ في الحرام
فتحت عينيها ونظرت إليها تراها محقة ....ترى أنه آن الأوان لتصبح زوجته أمام كل من سولت له نفسه التعدى على سمعتها وشرفها
*****
يخت فاخر
وأضواء تتلألأ
وعلى أنغام عمر خيرت ينتظرها .....
ينتظر سنوات انقضت بعيداً عنها
والآن أن أوان لقاء وعهد أبدى يجمعهما سوياً
ثقته كانت كبيرة برضاء محسن عن فكرته أن يقيم حفل خطبة صغير في الغردقة
وساعدته تولين في فكرة اليخت حتى أنها اختارت كل شيء من الإضاءة للزينة لكل شيء
والآن يقف على أحر من الجمر في انتظارها وأدهم ينظر إليه من بعيد يرى لهفة وعشق هو أول المدركين له
يعايشه ويتعايش معه
عشق سلبه حرية الاختيار
واستسلم هو له بكيانه وروحه ونبضات قلبه
انتبه على صعودها درجات السلم ويوسف يسرع لاستقبالها وخلفها مالكة القلب والروح
قمره يتوهج بنوره في عتمة ليل حالك
عيناه لا تفارقها
وإن كانت تنظر لصديقتها بفرحة وسعادة وإن كانت تتمنى ......فقط تتمنى أن تعيش فرحتها وسعادتها مع من تحب......
نظرت نحوه وابتسم واقترب .....
مد يده نحوها فسلمت له كفها يجذبها نحوه
جميلة .....دافئة كشمس ظهرت فجأة في نهار شتاء جليدي .....أذابت ثلوجه
وتنعم هو بدفئها وحده
اقترب أكثر وبجوار أذنها همس :
_ بحبك
وارتعش جسدها وأحست به يترنح فلحق بها يبتسم بمكر :
_ والله العظيم بحبك قوى
نظرت إليه بأعين عاشقة ......تاهت في بحر غرامه
_ وأنا كمان
اتسعت ابتسامته واقترب أكثر يحيط خصرها :
_ أنتِ كمان إيه يا عمرى
نظرت حولها بقلق ونظرات زملائها تكاد تفتك بها لتهمس:
_ أدهم .....أنت شايف نظراتهم أبعد شويه
نظر نحوهم فأبعدوا أعينهم فعاد إليها :
_ سيبك منهم دلوقتي يعرفوا كل حاجة......بس أرضى عليّ بقى يا محيرانى
ارتجفت عيناها وتلجلجت :
_ أعمل إيه؟
همس في أذنها بصوت جعلها تذوب عشقاً :
_ كملى.....قولى
تمسكت بكفه أكثر :
_ وبعدين يا أدهم !
ابتسم بهدوء:
_ بعدين دى بتاعتى يا روح قلب أدهم
_ أدهم عاوزاك لو سمحت
وصوت اخترق خلوتهما نظرا نحو عهد التي تقف أمامهما عيناها تقدح الشرر تريد نهش تولين التي كزت على أسنانها بغيظ تهمس:
_أنا ناوية ارتكب جريمة قتل مع سبق الإصرار والترصد
ضحك مقهقهاً:
_ مفيش حد يستاهل تضيعى نفسك عشانه يا حبيبتي.....دقايق وأخلص منها وارجعلك
تركها وابتعد مع عهد التي أرادت التحدث معه بعيداً عن كل شيء
_ خير يا عهد .....فى إيه ؟
فركت كفيها بتوتر وعيناها تدوران بضياع :
_ أدهم في حاجة لازم تعرفها ودلوقتي
ابتسم بهدوء:
_ حاجة إيه ؟
ابتلعت ريقها وأكملت :
_ ناصر البلتاجي!
وبنبرة باردة قاتلة سألها :
_ ماله ؟
ازداد توترها وحركة كفيها :
_ أدهم ......أنا هقولك على كل حاجة وافهمنى لو سمحت
ابتسم بهدوء:
_ كلى آذان صاغية قولى اللى عندك
******
الكل منشغل في عالم آخر بعيد عنها وهى لديها رغبة مسيطرة أن تنظر للبحر من أعلى ارتقت درجات السلم الذى يصل لسطح اليخت
نظرت حولها وأكملت صعودها ولا تعلم أن هناك من يترصدها وينتظر فقط أن تصبح وحدها
وصلت للطابق الأعلى ووقفت تنظر للبحر وأمواجه
زرقته الحالكة .....وسماء تحتضن قمر ونجوم
هواء يلفح وجهها بقوة وهى مستمتعة اقتربت أكثر من الحافة خائفة مرتجفة خاصة أن اليخت في عرض البحر
تراجعت بخوف وصوت جاء من خلفها فجأة :
_ شكلك بتخافى من الميه
التفت بهلع لمصدر الصوت وجدت مالك يقف خلفها مبتسماً :
_ أسف لو خضيتك
صاحت غاضبة:
_ أنت جاى هنا ليه .....أدهم لو شافك هتبقى مشكلة !
ابتسم بهدوء:
_ صدقينى أنا مفيش بينى وبينه أي عداوة ....وأنا مكنتش أعرف إنك متجوزة
_ ودلوقتي عرفت تحب تنزل على رجليك ولا على نقالة
ابتسم وهو يلتفت لصاحب الصوت :
_ أنا جاى اعتذر يا باشمهندس
واقتراب أدهم خطر يحلق ومالك يعاند ويكابر
وكف أدهم المضمومة تضرب كتفه بغلظة :
_ أنا مش بحب أقول كلامى مرتين لو شوفتك قربت منها مش هيحصل طيب
وابتسامة باردة واثقة :
_ أسف مرة تانية ......وعلى العموم مسيرنا هنتقابل من تانى
تركهما وغادر ليلتفت إليها بغضب:
_ البنى آدم ده كان عاوز منك إيه ؟
_ أنت سمعته وهو بيعتذر وإنه مكنش يعرف إنى متجوزة
رفع إصبعه في وجهها محذراً :
_ لو شوفته بيكلمك تانى هفرمه
اتسعت عيناها بهلع :
_ في إيه يا أدهم مش كده .....ده مجرد سوء تفاهم
_ أدهم عاوزك لو سمحت
وصوت زياد قاطع حديثهما ليلحق به ويتركها على مضض
*****
حالة سكون وموسيقى تنساب مع أمواج البحر الناعمة ولقاء ثلاثى بين أدهم وزياد وعهد وتولين تراقبهم من أعلى دون تدخل ويبدو أن الأمر خطير حتى يجتمعوا بتلك الطريقة
عادت لجلستها وحدها وفردت جسدها على أرضية سطح اليخت تغمض عينيها مطمئنة هادئة
وفجأة .....
صراخ .....ذعر
وأصوات تتعالى بهلع
حريقة......اليخت بيتحرق
قامت مسرعة مذعورة جسدها يرتجف من كلمات اخترقت عزلتها
أسرعت نحو السلم فواجهتها نيران تأكل كل شيء وتمنعها الهبوط
صرخت .....بكت
فقد انتهى أمرها
******

الصفحة

الفهرس

نص

الفصل الثالث والثلاثون