الساحرة الجميلة الجزء التاسع والاخير

ريهام : لأ ، يا بنتي سحر يعني سحر بجد اللي هو تقدر تحرك حاجات من أماكنها أو ممكن تسمع افكارك ، حاجات من دي كتير
سمر : انتي هبلة يا ريهام ؟!
ريهام : انا مش هبلة ، ده بجد والله و الموضوع ده من زمان جدا ، انا عارفاه من و احنا صغيرين بس مكنتش راضية اقول ل اي حد ، لغاية النهارده لما اتهبلت بجد و قولت
سمر : و مين بقى اللي هيصدق الكلام الفارغ ده ؟!
ريهام : هي بس بسنت قعدت تلعب في دماغي و فهمتني أن ماليكة هتاخد امير مني ف روحت حكيت الموضوع ده ل امير عشان يكرهها بقى و يسيبها و يبعد عنها
سمر ب سخرية : ااااه ، هو الموضوع فيه امير ! و انتي فاكرة بقى أن هو هيكون طايق يبص في وشك بعد عملتك السودا دي
ريهام تبكي أكثر : بقول لك ايه يا سمر انا بحكي لك عشان افضفض لك انا اصلا مش طايقة نفسي و مش محتاجة منك نصايح
سمر : بصي انا بصراحة حاسة أن الموضوع كلكع جامد و شايفة يعني أن انتي متكلميش حد منهم خالص اليومين دول
ريهام : و امير ؟
سمر : طيب انا شايفة يعني أن لو هو معجب بيها ف انتي مفيش في ايدك اي حاجة ممكن تعمليها ، و بعدين يعني ما البلد فيها مليون امير
ريهام : بس انا عايزة امير ده
سمر : انتي بقى عايز. تبهدلي نفسك دي حاجه بتاعتك
ريهام : طب خلاص بلاش امير ، طب و ماليكة ؟!
سمر : انا شايفة يعني أن صحوبيتكوا دي لو بحد و كده يعني ف ممكن شوية و تتصالحوا
ريهام : ياريت ، ياريت والله بجد انا نفسي نتصالح و الموضوع ده يخلص عشان انا بجد مخنوقة

و بعد تلك الواقعة المؤسفة مرضت ماليكة كثيرا و تغيبت عن عملها ل مدة أسبوع و ذلك التغير آثار قلق امير عليها مما جعله يتواصل مع الإدارة العليا و طلب رقم هاتف أو عنوان اخر ل ماليكة حتى يستطيع الوصول إليها و الاطمئنان عليها و ب الفعل توصل الى رقم والدتها و علم منها انا مريضة و حالتها سيئة للغاية و ذلك الأمر الم امير كثيرا لأنه يحبها حبا شديدا .. و كانت بسنت وقتها تدبر مكيدة ل ريهام و سرقت كلمة السر الخاصة ب ايميل عملها و قامت ب سحب مبلغ مالي ضخم جدا من حساب عميل من العملاء المسؤولة عن حساباتهم ، و بعد رجوع ماليكة إلى العمل طلبت من امير أن تستقيل و لكنه رفض تماما و لكنها كانت مصرة و قالت له أنها ستظل متواجدة حتى يعثر على موظفة أخرى ، و قررت ماليكة أنها ستقوم ب استخدام قدراتها الخاصة و سوف تعمل مع جدتها في صالون الرياضة .. و بعد مرور أيام قليلة جدا أتى إلى البنك صاحب الحساب البنكي التي تلاعبت به بسنت و قدم شكوته إلى امير و امير طلب حينها من ريهام التأكد من تلك المشكلة .. و للاسف ريهام لم تعلم اي شيء عن تلك المكيدة القذرة و ذلك الشيء تسبب في توجيه امير إلى كلام جارح إليها ل تدخل عليهم بسنت فجأة و في يدها شيك ب المبلغ المسحوب و هي تقول ل امير

بسنت : مستر امير ، الحاج عرفة وقع منه صورة الشيك ده ف قولت اجيبه ل حضرتك عشان اكيد هيسأل عليه
امير يأخذ الشيك ب فرحة : كتر خيرك يا بسنت ، الراجل ده على طول ورقه بيقع منه .. "يبتسم ب سخرية" .. بصوا الراجل التايه ، كاتب شيك فعلا ب اسم صافية الورداني .. "ريهام ارتبكت كثيرا بعد سماع الاسم" .. كده الموضوع واضح ، تلاقيه قدم الطلب عند ماليكة و حضرتك يا آنسة ريهام نسيتي تاخدي اصل الطلب من عندها ف عشان كده فيه لغبطة عندها على السيستم لكن انتي كل اللي عندك بس انا معرفش
بسنت تتدخل ب خباثة : مستر امير ، هو حضرتك عارف مين صافية الورداني دي ؟
امير : لأ معرفش
بسنت : دي دكتورة الدايت و التغذية جدت ماليكة
امير ب صدمة : يعني ايه ! ماليكة مطلعة فلوس ل جدتها من حساب العميل ؟!
بسنت : اكيد

امير : دي امضتي و أمضت مدير الفرع عليه متزورة ، انتي فاهمة ده معناه ايه يا ريهام هانم ؟! انتوا عاملين عصابة ولا ايه ؟!
ريهام تبكي : مستر امير ، من فضلك انا معرفش اي حاجة عن الموضوع ده ، والله العظيم ما راجعت العملية دي ولا شوفت الشيك ده قبل كده ولا اعرف اي حاجة ولا خصمت الفلوس دي من حساب العميل
بسنت ب مسكنة : بعد اذنك يا مستر امير ، انا مصدقاها و اشهد لها ب ضمير بصراحة
امير ب انفعال : انا ماليش دعوة ب الكلام ده ، انا ليا ورق قدامي و سيستم ، دي سرقة رسمي و احنا كده لازم نبلغ النيابة و ابقي شوفي بقى حضرتك و اختك الحلوة و سمعت الفرع و سمعت البنك هتبقى فين ، احنا في مصيبة
ريهام : والله العظيم ما عملت حاجة والله العظيم
امير : انتي المسؤولة قدامي انتي و ماليكة ، هحولكوا للشؤون القانونية و هما يشوفوا بقى هيعملوا معاكوا ايه
بسنت : بعد اذنك يا مستر امير ، مش جايز ماليكة لوحدها هي اللي منفذة العملية دي ؟
امير : يعني ايه بقى إن شاء الله ؟ عملت الشيك و هي اللي راجعته ل نفسها برضه ؟! معاها الايميل بتاع الأستاذة مثلا ؟
بسنت : لأ ، الكلام ده لو هي إنسانة عادية ، لكن دي بتقرا الأفكار و مشعوذة ف اكيد معاها كل الايميلات بتاعت الفرع كله
امير ب ذهول : ماشي ، على العموم الفلوس لسه في حساب الشيكات ،الحمد لله الست صافية هانم كتر خيرها مصرفتش الشيك .. حضرتك تروحي دلوقتي حالا ترجعي الفلوس في حساب الحاج عرفة و انا هعمل لك الرد من عندي ، اتفضلي
ريهام تجفف دموعها : حاضر
بسنت ب خباثة : صح يا مستر امير ، العميل اهم دلوقتي و بعد كده نشوف مين اللي سرق

و بعد خروج ريهام و إتمام عملية الإيداع بلغت امير و هو سألها إذا كانت ماليكة قد علمت ب اي شيء و إجابته ريهام ب النفي و طلب منها أن تنبه على بسنت انها لا تفتح تلك السيرة أمامها .. و بعد انتهاء العمل و ذهاب ريهام إلى منزلها و كالعادة كانت تجلس في غرفتها و تبكي مما حدث و حكت ل سمر كل شيء نصحتها سمر ب أن تذهب الى جدت ماليكة و تسألها اذا كانت تعرف حاجة عن ذلك الشيك ام لا ، و ب الفعل ذهبت و تأكدت أن صافية ليس لها أي علاقة ب تلك القصة لا هي ولا ماليكة و اكتشفوا سويا ب أن بسنت هي من فعلت ذلك لأنها هي من سلمت صورة الشيك ل امير و هي ب مقدورها أن تطبع امضاء امير و مدير الفرع من اي ورقة من الأوراق المسؤولة عنها ، و طلبت منها صافية أن تذهب إلى ماليكة و تروي لها كل شيء و أن يأتوا إليها ل يجدوا حل ل تلك المشكلة .. و لكن امير سبقها و ذهب إلى ماليكة في منزلها و جلس معها هي و والدتها و بعد مقدمات كثيرة طلبت منه ماليكة أن يدخل في الموضوع فورا وحينها سألها

امير : ماليكة انا محتاج اصل الشيك
ماليكة ب عدم فهم : شيك ايه ؟!
امير : الشيك اللي ب اسم مدام صافية الورداني ، جدتك
ماليكة : شيك ايه اللي ب اسم تيتا انا مش فاهمة حاجة ؟!
امير : الشيك اللي ب مليون و 900 الف جنيه اللي اتسحب من رصيد الحاج عرفة و راح ل حساب جدتك مدام صافية الورداني
ماليكة ب طفولة : و هي تيتا هتتعامل مع الحاج عرفة ليه ؟! هو عايز يخس هو كمان !
فاتن ب عدم فهم : اوعي تكوني مشيتي وراها اصلا و اتدخلت في حياتك و بوظت لك شغلك ! عملت ايه الكابتن صافية عملت ايه ؟!
ماليكة : ثواني يا ماما نفهم بقى ثواني ، كمل يا مستر امير
امير : طيب ، ماليكة انتي متهمة ب الاختلاس انتي و ريهام صاحبتك لانكم سحبتوا مليون و 900 الف جنيه من حساب الحاج عرفة و حولتوه لحساب جدتك صافية الورداني
ماليكة تنهض و هي منفعلة و مصدومة : ايه ده !!! ايه اللي انت بتقوله ده
فاتن ب تسرع : هو انتي مشيتي ورا كلامها و انتقمتي زي ما اتفقتوا مع بعض ؟!! انتي تدخلي دلوقتي حالا و تكلميها و تخليها تجيب اصل الشيك ده انتي فاهمة
ماليكة تبكي : انتي كمان يا ماما هتقولي لي الشيك ، شيك ايه يا جماعه انا مش فاهمة حاجة ؟!
امير يخرج صورة الشيك من جيبه : الشيك ده يا ماليكة
ماليكة تنظر إلى الشيك ب صدمة : ايه ده ! هي تيتا عملت ايه بالظبط ؟!
امير يجلس بجانبها : معرفش ، ولا ريهام كمان تعرف و بصراحة أنا حاسس ان انتي كمان متعرفيش ، بس السيستم بيقول أن انتي و ريهام اللي ممشيين الموضوع ده ، و مش كده و بس ده انتوا كمان مزورين امضتي و أمضت مدير البنك
فاتن : هي جدتك سحرت لك و خليتك تعملي كده ولا ايه ؟!
ماليكة : يا ماما و النبي اسكتي دلوقتي ، ممكن تكمل يا مستر امير ؟
امير : انا وقفت تنفيذ العملية و رجعت الفلوس ل حساب الحاج عرفة ، بس ده حل مؤقت ، لأن مدام صافية لو قررت تسحب المبلغ محدش هيقدر يوقفها ، و ساعتها هيبقى فيه حل من التلاتة و اول حل هو أن الحاج عرفة يسحب رصيده كله بس ساعتها هياخد حكم شيك بدون رصيد و ده ظلم لأن الراجل مالوش ذنب في حاجة زي كده ، و تاني حل أن احنا فعلا ندي مدام صافية الفلوس من حساب الحاج عرفة و ساعتها هو اللي هيبلغ عننا النيابة و هنتسجن كلنا ، و تالت حل بقى أن البنك يغطي المديونية اللي اتسبب فيها الموظفين بتوعه بس برضه البنك هيقدمنا للمسألة القانونية و النيابة و مش بعيد برضه أن كلنا نتسجن
فاتن : يا مصيبتي ، طب هنعمل ايه دلوقتي ؟!
امير : اخد اصل الشيك يا فندم ، حضرتك هاتيلي اصل الشيك و انا هقنع الحاج عرفة أنه يمضي على أن طلب العملية دي اتنفذ و بعدين هو لغاها و بعدين ندبس الورقة دي في الملف و ب كده القضية تبقى اتقفلت خالص
ماليكة : و مين قالك اصلا أن تيتا معاها اصل الشيك ؟!
امير : المنطق يا ماليكة هو اللي بيقول كده
ماليكة : هو انت قصدك يعني أن انا حرامية و اني سرقت فلوس من البنك و اديتها ل تيتا ؟!
امير : انا مقولتش كده ، بس قولت أن السيستم شايف أن انتي و ريهام اللي ممشيين العملية
ماليكة : هو انا ممكن اسأل سؤال ؟ هو مين اللي جابلك صورة الشيك ده ؟
امير : بسنت ، الورقة وقعت من العميل و هي جابتهالي
ماليكة : و انت مشكيتش للحظة أن بسنت ممكن تكون هي اللي ورا الموضوع ده كله ؟!
امير : لا شكيت ، بس انتي تقدري تقوليلي هي جابت الباسورد بتاعك انتي و ريهام منين ؟
ماليكة : اه ، هي متنفعش ، لكن انا ينفع عشان انا اللي ليا في السحر و الشعوذة مش كده ؟
امير : طب ما تفهميني يعني ولا هي كمان ساحرة ؟ ايه كلها بقت بتسحر !
ماليكة : لا مش كلها بقت بتسحر ، بس اللي زي بسنت دول الكره اللي جواهم اكتر بكتير من السحر ، السحر ده شيء جميل حتى اسمه موسيقي .. "و بحركة واحدة من ايديها خلت امير لابس زي علاء الدين" .. لازم تستخدم سحرك في شيء جميل ، إنما لو استخدمته في شيء قبيح ميبقاش سحر ، السحر ده ربنا اداهالنا عشان نخلي كل حاجة حلوة .. أيوة انا ساحرة ، و امي و جدتي و فخورين ب ده و مش محتاجين اننا نسرق بنك عشان يبقى معانا فلوس ، الموضوع اكبر من كده ب كتير ، كل واحد و عنده سحره بس المهم احنا هنستخدم سحرنا ده ازاي ، و على فكرة أنا من ساعت ما اشتغلت في البنك ده و انا متغيرة و فرحانة و مبسوطة و حاسة أن أنا بني ادمة بجد ، انا عمري ما كان عندي أصحاب غير ريهام ، انا اول ما اشتغلت في البنك قولت خلاص هيبقالي فريق و اصحاب و الدنيا هتفتح في وشي ، انا طول عمري محبوسة في البيت بين أربع حيطان و عمري ما شوفت حد و عمري ما طلعت بره البيت ، أقصى أقصى طموحي أن أنا ادخل البلكونة و العب مع الناس ب السحر كده ، انا لو كنت عايزة استغل السحر كنت استغليته بس انا عمري ما هعمل كده و انت اكيد عارفني يا مستر امير
امير : خلاص يا ماليكة ، انا هتصرف بس محتاج انك تساعديني

جرس الباب رن و فاتن فتحت الباب لاقت ريهام قدامها و فورا ماليكة أخفت امير تماما ، و بعد دخول ريهام وقفت أمام ماليكة و هي تنظر إليها ب اسف و اشتياق و هي تقول لها

ريهام : ازيك يا ليكا ؟
ماليكة : الحمد لله ، انا و انتي خلاص هنتسجن قريب
ريهام : انا اسفة بجد ، موضوع امير ده جنني و خلاني مبقيتش عارفة انا بعمل ايه ، انا حاسة أن اللي ورا كل المشاكل ده هي بسنت ، انا كنت خايفة اقول الكلام ده عشان عارفة انها مؤذية و ممكن تأذيني و تلبسني مصيبة ، بس خلاص المصيبة كده كده حصلت و انا لبست فيها معاكي بسببها ، بسنت عارفة الايميل و الباسورد بتاعك من اول يوم جيتي اشتغلتي فيه في البنك لما كانت بتساعدك تستخدمي السيستم ، و انا لما قعدت افكر مع نفسي هي ازاي ممكن تكون عرفت تعمل موضوع الشيك ده اكتشفت انها عملت معايا حركة واطية و عرفت بيها الايميل و الباسورد بتاعي ، انا بجد غبية و حمارة ضيعتك و ضيعت نفسي انا اسفة
ماليكة : خلاص إن شاء الله مش هيبقى فيه ضياع ولا حاجة بس متزعليش
ريهام : انا اسفة كمان عشان موضوع امير ، انا مش عارفة عقلي كان فين ساعتها ! الغيرة عامتني ، بس انا حاسة أن أنا خلاص فوقت بجد و امير بقى بالنسبة لي موضوع مالوش اي قيمة ، عامل كده زي ما يكون واحدة مراهقة و اول مرة تشوف راجل حلو في حياتها ف تعجب بيه ، و خلاص من ساعت معاملته ليا النهارده و انا مبقيتش طايقاه
ماليكة تحا ل اسكاتها : معلش يا ريهام تلاقي بس المسؤوليات عنده كتير ، معلش اهدي شوية
ريهام : ده بني ادم ريحة الإنسانية عامل زي الروبوت ، السيستم بيقول السيستم بيقول ، لا عنده استعداد يسمع ولا حتى يشوف ، بجد اعمى ، اعمى بجد
ماليكة : ما خلاص بقى يا ريهام ربنا يسهل له ، اسكتي بقى
ريهام : حقيقي انا مش فاهمة ازاي انا كنت فاكرة نفسي بحب واحد زيه بجد
ماليكة : معلش ، سيبك بقى منه ابوس ايدك و خلينا في بسنت دلوقتي
ريهام : اهي بسنت دي بقى هي اس المصايب كلها
ماليكة : إن شاء الله هنلاقي لها حل إن شاء الله
ريهام : طب قولي لي هنعمل ايه مع الزفت اللي اسمه امير ده و هنخليه يصدقنا ازاي ؟
ماليكة اخر ما زهقت أظهرت امير : اعتبريه صدقنا خلاص
ريهام محرجة جدا : انا اسفة انا اسفة

ابتسم امير و لم يبالي لانه أيقن و اقتنع ب مصداقية ريهام و ماليكة .. و قرروا أنهم هيتحدوا و يكشفوا بسنت و اجتمعوا مع صافية و قالت لهم أن بسنت مقتنعة تماما ب أن ماليكة ساحرة و أنهم هيخلوها تعترف على نفسها ب تلك الطريقة .. و بالفعل في صباح اليوم التالي كانت بسنت تجلس مع امير و كان يطلب منها دليل ملموس يثبت أن ماليكة ساحرة و في حين إثبات ذلك سوف تخرج ماليكة من البنك ب فضيحة كبيرة و بسنت هتترقى .. و بالفعل ذهبت إلى ريهام و ظنت أنها تقف في صفها و ريهام دلتها على كتاب صغير يحتوي على مجموعة كبيرة من التعاويذ يوجد في حقيبة ماليكة ب استمرار .. و ب الفعل قامت ماليكة من على مكتبها و كأنها تتحدث في الهاتف ل تنهض بسنت فورا و تفتح حقيبتها و تاخذ الكتاب و تدخل ل امير و تبدأ في قراءة طلاسم من المفترض أنها مسؤولة عن الاخفاء و بعد قراءة بسنت ل تلك الطلاسم أقنعها امير انه لا يراها بالفعل و طلب منها أن ترى تعويذة أخرى كي تظهرها و قد كان ، و بعد أن اقتنعت تماما أن ذلك هو الكتاب التي تقوم ب استخدامه ماليكة ل اعمال السحر طلب منها امير أن تبحث عن تعويذة ل قراءة الأفكار و بالفعل وجدت و لكن لا توجد أي من التعاويذ فعالة من الأساس لانها تعاويذ مكتوبة ب يد صافية كا خدعة ل بسنت حتى ينكشف أمرها و حين قرأت بسنت تلك التعويذة طلب منها امير أن تقرأ افكار ماليكة و ريهام و تأتي ب كلمات السر الخاصة ب حسابات عملهم و تكتبها على جهازه ، و لأنها ب الفعل تعرفهم قامت ب كتاباتهم سريعا و هي فرحة و على يقين ب أن امير مقتنع ب أن كل ما يحدث ذلك بسبب تأثير السحر و بعد الانتهاء من تلك الخدعة طلب منها امير الخروج و أنها تمت ترقيتها ل تخرج و هي في قمة سعادتها و فجأة تظهر ماليكة في غرفة المكتب و هي تمسك هاتفها و تصور كل ما صار من بسنت و لكن ماليكة كانت تحزن كثيرا بسبب كل الكره الذي يملئ قلب بسنت اتجاهها ،، و ب الفعل تم تقديم الڤيديو للإدارة و تم رفدها في الحال و التخلص من شرها .. و بعد هدوء الأمور قرر مجدي الاعتراف بحبه الشديد إلى ريهام ب طريقة رومانسية و هو معلق لها البالونات ف جميع أرجاء المكتب و هو جالس على ركبتيه و يطلب يدها ل يتفاجئ ب قبولها ل عرض زواجه و هي في قمة سعادتها .. و فاتن قررت أن تستعيد علاقتها مع صافية بعد ما حدث و أغلقت السوبر ماركت و باعت منزلها و شاركت صافية في الصالة الرياضية و انتقلت للعيش معها و قاموا ب افتتاح أكثر من فرع للصالة .. و بطلتنا الساحرة الجميلة تزوجت من امير و عاشوا في سعادة و حياة مليئة ب الحب و الفرح و انجبوا فتاة كا قطعة من السماء وجهها يشع جمالا و ب الطبع تمتلك موهبة والدتها الساحرة الجميلة .. و تنتهي روايتنا نهاية سعيدة تفرح القلب ..