اختفاء مفاجئ "الجزء الخامس"

مدحت بيتكلم ب طريقة بايخة و بيرد على كلام ليلى و هو بيقول لها

مدحت : أيوة و بعدين يعني مش فاهم ؟
ليلى : هو ايه اللي و بعدين يعني ؟ ما هما في الاخر وصلوا للولد

و في وسط الكلام الكتير اللي ليلى و مدحت بيقولوه ل بعض صافي سرحت و بدأت تفتكر ندى و ذكرياتهم مع بعض .. فلاش باك .. ندى واقفة بتنادي عليها عشان تخرج لها و هي بتقول لها

صافي : طيب طيب ، جيت اهو ، ايه عمالة تصرخي ليه كده ؟
ندى : يابنتي بقالي ساعة مستنياكي لما بقيت زي الشجرة
صافي ب هزار : هو انا مش قولت لك اننا هنتقابل على الساعة 3 ؟ لو كنتي بصيتي في ساعتك قبل ما تيجي مكانش زمانك اتحولتي ل شجرة ولا حاجة
ندى : يا بنتي انتي على طول بتحطي عليا كده و عدوانية طول الوقت ؟ بس انا تقريبا عارفة ايه اللي معكر مزاجك يا جميل
صافي : يا سلام يا ام العريف ! طيب قولي لي كده يمكن اعرف انا كمان
ندى : الولد اللي اختك مصحباه ده ، هو كان اسمه ايه ؟
صافي : قصدك علي ؟
ندى : ايوون هو علي ، انتي فاكرة اني ماخدتش بالي يعني من نظرتك له يوم ما جه يقابل اهلك الاسبوع اللي فات
صافي ب انفعال : انتي بتخرفي بتقولي ايه انتي كمان ؟ كنت ببص له ازاي يعني ؟!
ندى : كان وشك عمال يحمر و يجيب في الوان و عمالة تبصي له ب نظرات كلها اعجاب و كده يعني
صافي ب إنكار : لا ده انتي بيجيلك تهيؤات رسمي بقى ، مفيش حاجة من الكلام اللي انتي بتقوليه ده صح اساسا
ندى : شوفتي اديكي احمريتي تاني اهو مالك بس يا قطتي ؟
صافي : ندى بلاش تأڤور منك ، انا من غير حاجة اعصابي مش مستحملة
ندى : طيب ما تخليكي صريحة و تقولي الحقيقة ، انتي بتحبيه مش كده ؟
صافي : ندى
ندى ب رخامة الصحاب بدأت تعلي صوتها و تقول : صافي بتحب علي ، صافي بتحب علي
صافي بتسكتها : ندى اسكتي
ندى مكملة : صافي بتحب علي
صافي : اسكتي يا ندى بقول لك

نرجع للواقع و ليلى بتسأل مدحت

ليلى : هما بيفكرا يبيعوه ؟ سمعت حاجة زي كده ولا حاجة ؟
مدحت : مظنش نورا مش ممكن تبيع البيت ده ابدا
ليلى : فعلا معاك حق
فريدة اخت صافي بتدخل عليهم و هي بتقول لهم : بقى كده يعني ؟ بتفطروا من غيري ربنا يسامحكم
ليلى : هنعمل ايه يا حبيبتي ما انتي طول اليوم ماسكة التليفون في ايديكي و مش بتسيبيه و كأنك عائشة في دنيا تانية لوحدك عايزانا نفضل مستنينك لغاية ما نموت من الجوع يعني ؟
فريدة بتضحك : معلش كنت بتكلم انا و علي ، و طبعا بما اننا كنا بنتكلم عن موضوع الخطوبة ف كان لازم نسرح و نطول في الكلام
ليلى : والله انا مش قادرة اقتنع انك خلاص هتتخطبي ، انا حاسة أن أنا متفاجئة اصلا
فريدة : والله يا مامي و انا كمان زيك كده بالظبط بس انا على قد ما انا متفاجئة على قد ما انا مبسوطة ، هو هييجي ياخدني كمان شوية و نروح نقابل صحابي عشان هنقابل منظمين الحفلة و لازم نسلمهم القوائم الأخيرة ، إن شاء الله مننساش حد
ليلى بتبص ل صافي : صافي ، بصي احنا لسه قدامنا وقت .. يعني لو كنتي حابة تغيري رأيك و تعزمي صحابك قولي ل فريدة عشان تلحق تضيفهم على قائمة المدعوين
صافي : لا يا مامي مفيش داعي ، اساسا انا مبقاش عندي أصحاب عشان اعزمهم

و في مول كبير و خصوصا في محل ملابس براند شيك اوي كانت واقفة داليا قصاد المرايا و بتقيس في فساتين و لبس كتير حلو اوي خصوصا بعد ما خست و عملت لوك جديد بينت بيه جمالها و أنوثتها و بقت تخرج من محل ل محل شوية في محل ملابس و شوية في محل شوزات و شوية في محل اكسسوارات لغاية ما وصلت قدام محل حلويات و شافت قدامها الدوناتس و شكلها كان مغري اوي ، وقفت للحظة قدامهم و كانت هتضعف لكنها اتماسكت و كملت مشي عشان تشوف ملك خارجة من محل هدوم و نادهت عليها لكن هي مردتش و مخادتش بالها أن اللي بتنادي دي داليا صاحبتها و كانت ماشية و عمالة تعيط و البياع خرج وراها و هو بينادي عليها و بيوقفها و هو بيقول لها

البياع : لو تسمحي لي ممكن تفتحي لي شنطتك ؟
ملك ب دموع : و هو فيه ايه في شنطتي ممكن تشوفه يعني ؟
البياع : لو سمحتي يا فندم خليني اشوف شنطتك ب نفسي بدل ما اخلي الأمن هو اللي يتدخل
داليا بعد ما وصلت قدامها : ملك ! فيه ايه ؟ ايه اللي بيحصل ؟

ملك اتفاجئت ب وجودها لكن مردتش عليها و فتحت الشنطة و طلعت منها مايوه و هي بتعيط و بتبص للراجل و بتقول له

ملك : ارجوك بلاش تدخل الامن في الموضوع ، انا اسفة جدا والله
البياع : بس انتي كنتي هتخرجي و تمشي عادي لو مكناش لاحظنا ده
داليا بتدخل : هتخرج و تمشي ايه بس انت شايفها حرامية ؟ هي بس كانت خارجة بيه عشان توريهولي
البياع بيبص في الفستان : مظنش أن كلام حضرتك صح يا هانم ، دي شالت منه ال الرم و التيكت و الفستان اتقطع كمان ، حتى شوفي ب نفسك .. "بيوري لها القطعة اللي في المايوه" .. للاسف انا مش هقدر ارجع ده تاني يا تدفع تمنه يا ...
ملك بتقاطع كلامه : ما انا لو كنت اقدر ادفع تمنه اكيد مكنتش عملت كده
البياع : يبقى اعذروني مقداميش حل غير اني ابلغ الأمن و وقتها بقى ابقي حلي مشكلتك دي مع البوليس
داليا : والله انا شايفة انك عملت مشكلة على الفاضي و خلاص ، هو تمنه كام ؟
ملك : لأ طبعا ده مستحيل يا داليا
داليا : استني انتي بس ، انا هحل الموضوع ده دلوقتي
البياع : تمام اتفضلي حضرتك معايا
داليا : طيب ، ياللا يا ملك عشان نحاسب
البياع بعد ما دخلوا عشان يحاسبهم : الحساب 2700 جنيه يا فندم
داليا : 2700 جنيه في مايوه ! ليه يعني انتوا غطستوه في ماية دهب ولا ايه ؟
ملك : ارجوكي يا داليا ، مفيش داعي انك تعملي كده
داليا : بطلي الكلام ده ، كده كده هناخده في الاخر .. "بتبص للبياع" .. ممكن ادفع ب الكريديت كارد بتاعت والدتي ؟
البياع : أيوة يا فندم ينفع
داليا : طيب اتفضل

و اخد الكريديت كارد من ايديها و حاسبوا و خرجوا مع بعض و كانت ملك مكسوفة جدا من الموقف اللي اتحطت فيه خصوصا قدام داليا صاحبتها و اللي بقالهم كتير اوي مشافوش بعض و دي كانت اول مرة يتقابلوا فيها بعد فترة كبيرة جدا ..
الفصل السابق الفهرس الفصل التالي