الفصل الثالث عشر

بدات هنا تشرح له ازاي بدات الموضوع ومنين جاء لها الفكره انها تزرع اشقر الفاكهه دي واللي مش موجوده غير عندها
: فاكر يا دكتور البحث اللي انت كنت نشرته اول ما سافرت عن تهجين شجر الفاكهه؟
: ايوه طبعا فاكر خاصه البحث اللي كنت باتكلم فيه عن شجر الفاكهه المصري لو تم تهجينه ببعض الاشجار الاسيويه كان هيدي نتيجه جميله جدا
: بالضبط انا بقى عملت فكره شبيهه لدي بس لاني ما كنتش اقدر اجيب بذور الاشجار الاسيويه دي لان انت عارف طبعا ان الموضوع كان محتاج موافقات كثيره انا ما كنتش هاقدر احصل عليها لذلك كل اللي انا عملته اني جبت اشجار بتتزرع في الوادي الجديد وكمان في سيناء طبيعتها قريبه شويه من بعض الاشجار الاسيويه اللي انت قلت عليها في البحث،بعدها بدات بزراعتها وتلقيح بعد الشجر منه من بعضه ودي كانت النتيجه
عادل كان مذهول بنتيجه اللي هي عملته لانها نجحت انها تطبق اول بحث ليه فما كانش عارف يقول لها ايه ولا ايه اللي ممكن يعمله معها

لكن هي كان نفسها تصرخ وتقول له ان كل اللي انا باعمله ده علشان انا كنت باحقق احلامك اللي اقدر عليها واحد وراء الثاني ما كانتش قادره تخبي عشقها ليه ولا انها بتحبه قد ايه

اما هو فكان مشغول بحاجه ثانيه ان ابحاثه اكيد هتلاقي نفس النجاح اللي حققته هنا لانها قامت بمهمه صعبه جدا

: طيب يا هنا انت ازاي وصلت ان انت تصدري محصولك لبره البلد؟
: ببساطه كنت باصور هنا الحلقات بتاعتي اللي كنت عاملاها كتحدي ان انا اقدر انفذ الابحاث دي على ارض مصر ولما نجحت وطلع المحصول بتاعها جاء لي عروض كثيره من شركات كثير لغايه ما وافقت على عرض منهم وطبعا المبلغ اللي كان بيجي لي من تصدير تقريبا 80% من المحصول لان انا صممت انه 20% يبقى موجود لاهل البلد هنا ولاي احد محتاج ان هو ياكل من الزرع بتاعي
: انا مش عارف اقول لك ايه يا هنا بس انا فخور جدا باللي انت بتعمليه

هنا ما كانتش محتاجه اكثر من اللي هو قال لان هي كانت محتاجه تحس ان هو فخور بها وباللي بتعمله ويبقى عارف كويس قوي ان كل اللي هي بتعمله ده علشان خاطره لانها كانت بتحقق حلمها وحلمه في ان هو يزرع على ارض مصر اشجار تكفي كل اللي محتاج منها

حياته اختلفت تماما اخر حاجه كانت ربطاه ببلده وبعداته كفلاح تخلص منها للنهايه واصبح لعبه في يد خطيبته وللاسف هي نجحت انها تحوله لشبه رجل ماشي على مزاجها ولغايه هنا هو ما كانش حاسس هو بيعمل ايه

كان عارف ان كل اللي بيعمله غلط واللي هيجي عليه يوم وهيحصد نتيجه الغلط ده بس اللي ما كانش عارفه ان اليوم ده قرب قوي وان اللي هيتسبب في حصاده ده هتبقى برده بنت

صحي من النوم لقى والده متصل به اكثر من مره،رغم ان البلد ما تبعدش عن القاهره غير نصف ساعه بس الا انه بقى له فتره ما نزلش اجازه وده اللي خلى والده يتصل عليه لانه كان محتاج يتكلم معه

ايه يا مراد بيه انت نسيتنا ولا ايه ولا شغلك خلاص وخطيبتك اخذوك مننا؟
: اهلا يا بابا ابدا والله معلش انا عارف ان انا مقصر في حقك بس سامحني يا حاج قل لي اخبار البلد ايه؟!

: احنا بخير طول ما انت بخير ايه يا ابني ما انتش عايز تنزل تزورنا ولا ايه ما تجيب خطيبتك وتيجوا تقضوا عندنا يوم زي ما وعدتنا
طبعا مراد ما كانش عارف يقول لي والده ايه لان الحياه اللي هو عايشها دلوقت والعلاقه اللي بقت بيني وبين خطيبته ما عادتش علاقه سويه لان يعتبروا متجوزين مشواحد وخطيبته
: معلش يا حاج انا عارف ان انا مقصر معك هاحاول ان شاء الله نيجي زياره في اقرب وقت
: طيب باقول لك ايه في بنت هنا طالعه الاولى على كليتها وكانت عايزه تشتغل او تتدرب حتى عندكم في البنك هي هتنزل تقعد عند خاله لها في القاهره وكنت عايزه تدرب في الفرع عندك وبما ان انت بقيت مدير الفرع هناك فانت هتسهل الموضوع ده لو تعرف تشغلها عندك في الفرع
: عيني يا حاج انت بتقول ان هي الاولى على دفعتها يعني ما فيش مشكله انت عارف ان طالما هي متفوقه في دراستها مش هيبقى في اي مانع انها تشتغل معنا بس مين دي اللي الحاج رضوان بنفسه متصل علي علشان يوصي عليها؟
: دي يا سيدي بنت قاسم صاحب الارض والجناين اللي انا عايز اشتريهم،كان كلمني من فتره وقال لي ان بنته ما شاء الله طالعه الاولى على كليتها لا وبتحضر كمان دراسات عليا فانا قلت له هاتكلم مراد ابني يشغلها معاه
: انت تؤمر يا حاج كلمتك تنفذ خلاص خليها تيجي لي وتجيب الورق بتاعي وانا ان شاء الله هاشوف هاقدر اعمل لها ايه

: لا باقول لك ايه انت تيجي اجازه الجايه ان شاء الله انت وخطيبتك وانا هاتكلم ابوها واخليها تيجي تتكلم معك وتديك الورق عشان لو قدرت تشغلها اهلا وسهلا لو طلعت اي كلام خلاص يا ابني انا برده ما احبش ازعلك ولا احرجك في شغلك
: ما فيش احراج ولا حاجه يا حاج وانت بتقول انها طالعه الاولى على دفعتها وبتحضر كمان دراساتها لي انا عندي هنا ناس ناجحين بالعافيه وجاملنا فيهم ناس ثقيله كثير يبقى مش هناخذ اللي ناجحه في شغلها

: طيب يا ابني ربنا يصلح لك الاحوال خلاص انا هاخليها تجهز ورقها وانت باذن الله على اخر الاسبوع تيجي انت وخطيبتك تقدموا معنا اليوم وتاخذ الورق وربنا ييسرها ان شاء الله

كانت سعاده ترقيه لا توصف حين اخبرها والدها انه تحدث مع الحاج رضوان عن عملها بالبنك الذي سمع اسمه منها من قبل وقد علم ان ابنه مراد هو مدير احد الفروع بالقاهره لذلك سيكون عملها هناك امر بسيط بالنسبه له اذا ما طلب منه والده ذلك
: يا بابا انا مبسوطه قوي بس تفتكر ان مراده بيه هيوافق؟
: وما يوافقش ليه يعني انت ما شاء الله شاطره وطالعه الاولى على كليتك وهيلاقي احسن منك فين عشان تشتغلي معه؟!
: ايوه يا بابا انا عارفه لكن انت عارف كويس قوي ان البنك ده بنك دولي وكمان بيهتموا قوي بالناس اللي كانت بتدرس في الكليات الكبيره اللي احنا ما نعرفهاش دي وهم مقفلين الشغل عليها لنفسهم
: تبقي خايبة يا رقيه لو فكرت كده الناس دي لها مصلحتها واكيد هيدوروا على الجدع والشاطر في شغله ايا كان متربي على يديهم ولا متربي في مدرسه عاديه المهم ان هو يعمل شغل صح ده الناس يا بنتي تحت ايديهم فلوس ناس واكيد هيفكروا الف مره قبل ما يشغله عيل خايب يضيع الدنيا كلها

رقيه اقتنعت بكلام والدها خاصه ان هم فعل ما بيهزروش في شغله هي فاكره كويس قوي مراد لانها شافته اكثر من مره وكانت اخرها من شهر تقريبا لما كان جاي هو ومعه ست كده راكبه معه العربيه وقتها عرفت انها خطيبته لكن ما اتصورتش ابدا ان شغلها هيبقى على يد مراد رضوان بنفسه

مراد كان زي الاسطوره بالضبط يمكن ما يقلش عن عادل لانه رغم ثراء والده الا انه كان غاوي قوي الحسابات وكان متفوق جدا في كليته وكان برده من الاوائل دفعته ولما جاء الشغل ده في البنك وقتها هي فاكره كويس قوي انها كانت لسه مخلصه الاعداديه ولما شجعتها هنا علشان تدرس في ثانوي كان نفسها تدخل كليه تجاره علشان هي كمان تشتغل في بنك كبير زي اللي بيشتغل فيه مراد رضوان

كان القدر بيجمع الورق كله وكان كل ورقه بتروح اللي شبهها لكن ما كانش احد عارف يا ترى الورق ده هيتجمع في ملف واحد ولا كل ورقه هتطير مع ريا ح الظروف في كل مكان