خالد ومحمد
اتنين اخوات
من اسكندرية
خالد36 سنة

محمد39 سنة

محمد متجوز نور بنت سورية وعايشين فى شقة جميلة فى مكان كويس فى اسكندرية

اما خالد خريج كلية التجارة
شاب عايش حياته بالطول والعرض
متجوزش
بس كانت علاقاته كتير
ولا زالت كتير
لكن اتحجمت لما اضطر يسافر مع محمد اخوه

خالد ومحمد من اسرة بسيطة
اب بيشتغل نقاش ومع السن بقى مفيش مجال انه يشتغل كتير
وام ربة منزل

عندها بنت وهى تؤام خالد
اسمها رحاب
وبنت تانية اسمها منى متجوزة وعندها ولد لكن عايشة فى بيت امها وابوها
لأن جوزها بيشتغل فى شرم الشيخ
ومصروف اللى جوزها بيبعته بتصرف منه على البيت

الاسرة دى بقى حالها يمكن يكون شبه حالات عائلات كتير
لكن حدوتة كل شخص فيهم مختلفة عن التانى تماما
خلينا نتكلم عن محمد
صاحب ال39 سنة
خريج كلية التربية
اللى كان شغال فى شركة من شركات القطاع الخاص
وللأسف الشركة مع الوضع اللى حصل فى فترة انتشار كورونا
اعلنت افلاسها
وده طبعا كان سبب فى ان الموظفين يبقوا من غير شغل
ولأن محمد سنه مش صغير
والوضع مش متحمل اى تعيينات جديدة
ده كان مضيع من ايديه فرص الشغل للاسف

بعد محاولات كتير من محمد علشان يقدر يلاقى شغل
وبعد فترة طويلة
قدر اخيرا يوصل لشغل فى دولة عربية
وبرغم ان المرتب مش مناسب لفكرة السفر والغربة
الا انه اضطر يوافق افضل من انه يكون مش بيشتغل

وفعلا بطلوع الروح وكم الاجراءات اللى حصلت بعد تعطيل السفر اكتر من مرة علشان قفل المطارات وفتحها وعدم الاستقرار على وضع
سافر محمد
وابتدا يشتغل هناك
لكن محمد كان من الشخصيات اللى عندها بخل شوية
يمكن لانه اتربى على كده
او وضعه كان صعب
وابوه كان علطول بيحسب الحساب لكل قرش بيتصرف
وده كان سبب فى ان محمد يبقى حريص شوية فى مصاريفه
لكن الحرص ده ساعده كتير فى حياته
لانه قدر يجهز شقة كويسة
ويعرف يتجوز
وحتى لما سافر ومرتبه مش مناسب
عرف يحوش منه
وبيبعت مصاريف مراته
وكمان مصاريف لبيت امه وابوه
اللى هنعرف بيتهم ماشى ازاى فى باقى الاحداث

حياة محمد عادية جدا
شاب مالهوش علاقة بسجاير او اى حاجة غلط بتحصل
لكن مراته مسيطرة عليه شوية
وبتعرف توصل للى هى عايزاه منه بسهولة
وده خلاها لحد دلوقتى مش عايزة تجيب اطفال
برغم انه بيتمنى يكون عنده اطفال
خاصة ان سنه بيكبر
لكن هى شايفة انها صغيرة ولسه من حقها تعيش شبابها براحتها من غير اطفال

وهو راضى بقرارها علشان بس يرضيها

مراته المصروف اللى هو بيبعتهولها
بتضيعه كله على اهلها واصحابها وخروجاتهم
فى الوقت اللى هو عايش هناك
بيستخسر يصرف على نفسه قرش واحد
علشان يوفر لأهله ولمراته اللى هى عايزاه
وماشية حياته طبيعية
ما بين شغله
والسكن
وكلامه مع مراته على النت
واحيانا كلامه مع اهله

منى جميلة
فيها شبه من هيفاء وهبى بكل تفاصيلها
عيونها الواسعة
الخضرا
طولها
جسمها المتناسق
كل حاجة فيها حرفيا
غير غرورها
منى سنها اكبر من محمد
تقريبا ما بين 40 ل 42 سنة
ابنها عندها 10 سنين
وده لأنها اتجوزت وسنها مش صغير
منى حياتها كانت مختلفة عن البنات
من الفقر والبخل اللى عاشت فيه
فى مرحلة من مراحل حياتها
وخاصة بعد ما خلصت دبلوم تجارة
سابت بيتهم وهربت فترة
هربت واهلها كانوا مش عارفين يوصلوا لمكانها
صيف شتا كانت امها تنزل تدور عليها فى كل مكان
وبعد فترة طويلة
قدرت توصل لمكانها
لكن كان فات الاوان على انها تلحقها
رجعت منى فعلا لبيت ابوها وامها
لكن مش زى ما خرجت منه
خسرت حاجات مش هينفع تتعوض
سلوبها اتغير
واخلاقها اتغيرت
ولبسها اتغير
وده طبعا كان مش مناسب ابدا لأبوها واعمامها
وكان سبب قوى فى انهم يعاقبوها
بأنهم يحلقولها شعرها خالص
ومش بس كده
كانوا حابسينها فى البيت من غير اكل او شرب
برغم انهم متأكدين ان اللى خسرته مش هيتعوض
لكن كانوا بيحاولوا بالطريقة دى يبردوا نار قلوبهم من الفضيحة اللى هى كانت سبب فيها

لكن منى محستش بندم
بالعكس تقبلت كل اللى حصل معاها بمنتهى الهدوء
لدرجة الاستفزاز
بس امها هى اللى كانت موجوعة عليها
برغم كسرتها وحزنها على بنتها وشرفها اللى ضاع
الا انها فى الاخر ام
ومش هاين عليها بنتها تتعذب بالشكل ده
علشان كده كانت بتحاول تخليها تاكل طول ما ابوها مش فى البيت
ومنى كانت مرة تاكل ومرة ترفض الاكل
وكأنها مش حاسة بأى خذلان ولا تأنيب ضمير
وعلى الوضع ده فترة طويلة
وكان كل شعرها ما يطول
يرجع ابوها يحلقه مرة تانية
لحد اخيرا ما ظهر قدام عمها عريس عايش فى دولة عربية
لكن اخوه فى اسكندرية
كان بيدورله على عروسة
ولأن اخو العريس مش من نفس المنطقة ولا حتى قريب منها
فكان ميعرفش اى تفاصيل عنهم

سيد.بقولك ايه يا كمال
اخويا عايز عروسة
واخت مراتى مش عجباه
متعرفش عروسة تكون حلوة وبنت ناس طيبين كده
وكل طلباتها مجابة

كمال بتفكير.اخوك مين
قصدك مختار

سيد.اه طبعا
هو اللى باقى متجوزش
انت عارف هو عايش برة من سنين
وقليل لما بينزل
وعايز يتجوز من هنا مش عايز من عنده
وصانى علشان ينزل يتجوز علطول

كمال.بس كده يعنى جيت فى جمل
انا عندى لأخوك عروسة
زى القمر
ومش غريبة
دى تبقى بنت اخويا

سيد.احلف بالله يا كمال
طيب يا شيخ ده انت تبقى ريحتنى
احنا عارفين وحافظين بعض
ومش محتاجين نسأل ولا نفكر
وبنت اخوك اكيد زي بنتك وانت اخلاقك الكل يشهد بيها

كمال.لاء برضه لو عايز تسأل محدش هيقولك نص كلمة ده حقك

سيد.عيب يا كمال اسأل ايه
ياعم الجواب بيبان من عنوانه
هما ساكنين فين بس

كمال.ساكنين جنبى علطول
الشقة اللى تحت شقتى
والبنت مخلصة دبلوم تجارة
ومش بتعتب باب البيت

سيد.عندها كام سنة
ولها اخوات تانية ولا بنت واحدة

كمال.عندها 22 سنة
عندها اخوها محمد اخر سنة له فى كلية تربية

وخالد ورحاب تؤام
خالد تجارة
ورحاب فى كلية اداب

سيد.طيب متأخذنيش يعنى البنت حلوة يا كمال

كمال.مش هنروح بعيد
ابقى تعالى اتغدا معايا وشوفها بنفسك

سيد.على بركة الله

خلص اليوم بتاع كمال وسيد
ورجع علطول على بيت اخوه

كمال.وجدى بقولك ايه
عندى موضوع لو حصل
هنخلص من مصيبة بنتك والفضيحة اللى عملتهالنا

وجدى.خير يا كمال
ايدي على كتفك يا خويا
البنت بنت ال.. دى اللى فضحتنى خلتنى مش عارف ارفع راسى فى الحتة

كمال.عندى عريس ليها
بس مش عايز اقولك بقى
ناس على مستوى منحلمش بيهم
الراجل ليا شغل معاه
هو مقاول كبير
بس بيخلص شغل مع الشركة عندنا علطول علشان بياخد من عندنا الحديد بتاع المبانى بتاعته
واخوه شغال فى الكويت
عنده شركة هندسية كبيرة
مسؤلة عن تصميم الصالات الرياضية والاندية
حاجة كده مستوى عالى اوى
وعايزين عروسة علشان اخوه ده بقى اللى فى الكويت
وانا رشحتله المحروسة بنتك

وجدى.ازاى يا كمال ترشح البت لناس زى دول
دول بس لو سألوا على اسمها
هيسمعوا اللى يسواء سمعتك عمرك كله

كمال.لاء ما هو انا قولتله
ان انت ساكن معايا فى العمارة بتاعتى
وهنأجر الشقة الفاضية اللى تحت شقتى
لحد الموضوع ما يتم
والعريس يا خد عروسته ويسافر
وترجع بيتك من تانى انت وعيالك ومراتك
المهم مش عايزين حد يعرف حاجة
علشان الكلام ميكترش
والناس يوصلهم اى حاجة عن البت

وجدى.طيب بيتنا وحتتنا وهنعزل منها
الفضيحة بقى اللى مش هتنفع تدارى هنعمل فيها ايه

كمال.ده كلام سابق لأوانه
انا بس عزمت الراجل عندى على الغدا
وعايز البت تيجي
علشان يشوفها
ولو عجبته هيشبكها هو
واخوه هييجى على كتب الكتاب

وجدى.يعنى يشبكها من غير اخوه ما يشوفها

كمال.ياعم هو عارف طلب اخوه بقى
وانت بنتك كشكل متترفضش
وده اللى احنا عايزينه

وجدى.خلاص يا خويا اللى انت شايفه فى الصالح اعمله
بس انا يا كمال معنديش اللى اصرفه على جوازة
كمال.بقولك ناس واصلة
وبعدين هى مش هيبقى لها شقة هنا
هى حياتها كلها هتكون هناك
يعنى انت لا هتجهز ولا تجوز
هو هيكتب كتابه وياخدها ويسافر
ده انت كمان مش بعيد تاخد منه مهر مبلغ محترم
دول معاهم شوية فلوس يا وجدى مالهاش اخر
ياريت بنتى كانت كبيرة ولا تنفعه

وجدى.طيب يا ريت يا كمال
بس ربنا يكملها بالستر

كمال.متقلقش
انت بس جيبها وتعالى عندى بكرة بس هتوصله وتمشى
كأنها طالعة تساعد مراتى فى تحضير الاكل
ويشوفها لما تسلم عليه
وتختفى كأنها نزلت
وهشوف ايه رأيه
لو تمام
نأجر الشقة من تانى يوم
مش تمام
خلاص محصلش نصيب
بس انا متأكد انها هتعجبه

وجدى.خلاص يا كمال اللى انت شايفه

فعلا بمنتهى السرعة
جه تانى يوم
ووجدى اخد منى ووصاها مليون وصية وهددها مليون تهديد انها تتصرف بأدب واحترام ومحدش يلاحظ عليها اى تصرف من تصرفاتها الغريبة
ولا تنطق بحرف عن اللى حصل لما طفشت من البيت

اما منى كانت كعادتها منتهى الاستفزاز
راحت مع ابوها
واتعاملت زى ما ابوها وصاها بالظبط
بس مش علشان توصيات ابوها
لاء علشان هى عجبتها فكرة انها تتجوز واحد معاه فلوس كتير
ويطلعها من العيشة اللى هى عايشاها والفقر اللى رجعتله من تانى بعد ما عاشت فترة وسط الناس اللى معاها فلوس وشافت حياتهم بتكون عاملة ازاى

سيد راح الزيادة
وجايب هدايا كتير للبيت اللى معزوم فيه على الغدا

وشاف منى
ولو مش عيب انه يطلبها لنفسه بعد ما قال لصاحبه انه بيدور لأخوه على عروسة كان متأخرش
منى برغم انها لابسة طرحة مدارية بيها شعرها المحلوق
الا ان الطرحة مزودة جمالها
جسمها المغرى
وكل تفاصيلها
كان بيركز فيها سيد كأنه هو اللى بيدور على عروسة مش بيدور عليها لأخوه
ولأن منى نظراتها كانت بتعرف تشد اى راجل ليها
سيد شاف ان هى دى اللى هتنفع اخوه
وكأنها سحرته

قعد سيد وكمال يتغدوا مع بعض

سيد.ماشاء الله يا كمال
البنت زى القمر
ازاى مش متجوزة دى لحد دلوقتى

كمال.ابوها ياسيدى شايف انها صغيرة وبعدين هى مش بتخرج من البيت
واللى كانوا بيتقدمولها ايام المدرسة
كلهم صنايعية وناس على اد حالهم

سيد.لالا دى عايزة اللى يتاقلها بالدهب
ده اخويا لو شافها هيتلوح عليها

كمال.يلا على خيرة الله

سيد.شوف يا كمال
شوفوا طلباتكم ايه
والشبكة اللى تختاروها
انت طبعا عارف
هو مش هيجيب شقة هنا يجهزها لكن عنده اكتر من شقة فى العماير بتاعتى
بس شقته فى الكويت دورين
وجاهزة من مجاميعه
ومن احسن التجهيزات

كمال.ايوة يا سيد
بس برضه معلش لازم يبقى لها شقة جاهزة هنا
افرض نزلت اجازة ولا نزلها غضبانة
فى الاخر تلاقى نفسها قاعدة فى الشارع
علشان شقق على الطوب

سيد.عيب اللي بتقوله ياكمال
بقى حريمنا ننزلهم غضبانين ولا يوم ماييجوا زيارة يبقى مالهمش مكان
بس عموما ياسيدى انا هقولك على حاجة
شوف الشقة اللى تناسب العروسة وتكون جاهزة من الابرة للصاروخ
وتمنهالى
وتمنها بأسم عروستنا فى البنك من قبل كتب الكتاب قولت ايه

كمال.عداك العيب يا ابو السيد
هتكلم مع اخويا
واشوف ايه رده
واقولك
لو كده نحدد ونعمل الخطوبة على الاد كده
بينا وبين بعض
احنا مش بنحب دوشة المعازيم والكلام الفارغ ده

سيد.كده كده العريس مش هنا
يبقى نلبس الشبكة
ونخرج كلنا نتعشى فى مكان حلو
لحد العريس ما ييجى
هو هيجيب شبكة تانية معاه

كمال.على بركة الله

فرح كمال جدا بالمكسب اللى كسبوه
منها هستر بنت اخوه ويبقى اسمها اتجوزت
ومنها وقعوا على ناس هتعديهم من الفقر

اما منى كانت بتحلم باليوم اللى هتخرج فيه من البيت اللى بتتهان فيه من اللى رايح واللى جاى
ومستنية حياتها تتغير رأسا على عقب
وده اللى هيحصل فعلا