الفصل الاول

استيقظت سندس في الصباح
علي صوت تغريد العصافير
حيث نافذة شرفتها تطل علي حديقة منزلها بصعيد مصر
وكعادتها كل صباح ، ما ان فتحت عيناها
تفقدت هاتفها ،
لتقرأ رسالة غيث الذي يرسلها لها كل صباح
فترتسم علي وجنتيها ابتسامه رقيقه
فترد هي الاخري برساله

ثم يقطع تواصلها معه طرقات باب غرفتها

سندس:- مين اللي بيخبط؟
لترد الشغاله:- انا نرجس يا ست سندس
الحجه قالت لي اجي احضر لك الشنطه..
"اجابت سندس بغضب ، شنطة ايه بس دلقيتي يا نرجس،،،
روحي حضري عدة الصيد وانا نازله حالاً..

نرجس:- وه وه وه صيد ايه بس ، دانتي النهارده مسافره!
سندس:- بطلي لماضه وروحي اعملي اللي قلت لك عليه..

——————————————————
في القاهره وفي نفس التوقيت تقريباً
وصل غيث الي معرض الكتاب
ليتابع اول اعماله الروائية
وكان برفقة والدته ، التي كانت كصديقته
فهو ما بقي لها من هذه الحياه

في المعرض تقابل غيث مع اصدقاء الجامعه
الذين قررو ان يكونو معه في ذلك اليوم المهم بالنسبة له..
بينما يتحدثون ، اتت نيفين
التي كانت تتميز بالتكبر والغرور
وحينما رآوها من بعيد،،
ظلو جميعاً يتهامسون وينظرون الي غيث
والذي كان مستهدفاً منها،

نيفين :- هاي ياجماعه
رد الجميع مرحبين بها
ثم نظرت الي ام غيث وقالت ، ازيك يا طنط"

لترد ام غيث بابتسامتها المعهوده:- الله يسلمك يابتي ، الحمد لله بخير
ثم تنظر الي غيث بنوع من الغضب،
وتقول:- ازيك يا اديب زمانك ياللي حتي ماعزمتنيش ''
ليرد غيث بعفويه:- والله يا نيفين كنت مشغول جدا وزي مانتي عارفه ال.....
لتقاطعه نيفين :- حصل خير يا استاذ
وانا هاطلع احسن منك، وحجزت ٢٠٠ نسخه من الروايه بتاعتك..
قال غيث بذهول:- ياااااه ٢٠٠ نسخه!
نيفين،:- مش كده وبس ، انا النهارده عاملالك بارتي في الميريديان . بمناسبة نجاحك
وطبعاً كلكم معزومين ياجماعه
وادي الدعوات اهي ...

غيث :- ليه بس التعب ده يا نيفين ، مالوش لازمه والله،.
همت نيفين بالانصراف وقالت :- دي اقل حاجه
انت تستاهل اكتر من كده
يلا بقي هامشي علشان رايحه الشركه
باي ياجماعه see you

وهنا نظرت امه اليه نظرة عدم الرضا -
فلم يعجبها تصرف نيفين تجاهه
وطلبت منه ان يعيدها الي المنزل
فتوجه اليها علي صديق غيث المقرب جدا
وقال:- يلا بينا ياماما انا جاي معاكي
وهو خليه يتابع الروايه ،
ردت ام غيث:- ربنا يوفقه ويسدد خطاه
ويبعد عنه مصارف السوء
امتعض غيث من دعاء امه ونظرتها اثناء الدعاء والتي كان يفهمها جيداًً
وانصرف علي وام غيث
وظل غيث مع اصدقائه
—————-______________ ———————

نزلت سندث الي باحة المنزل
حيث تجلس والدتها الحجه قمر
تمسك بعصاها وتجلس واضعه كلتا يداها علي عصاها
سندس:- صباحك قشطه يابت العمده.
الحجه قمر:- صباحك فل يا بتي ، شيعت لك مقصوفة الرقبه تحضر لك الشنطه
نازلالي تتقصع وتقولي ستي سندس نازله ورايا!
.. تخرج من غرفة المكتب ، حامله البندقيه وشنطة الصيد ، وتقول:- وهو انا يعني بكدب عليكي يا ستي!
تنظر الحجه قمر اليها غاضبة
وتقول:- يجيكي خابط في نفوخك وارتاح منك ياشيخه،، ايه اللي مطلعاه ده !
تبتسم سندس وتقول:- انا اللي قولت لها يا حجه
انا طالعه اصطاد ،،،،
الحجه قمر:- تصطادي ايه؟ انتي مسافره النهارده
مافيش صيد ولا يحزنون، اقعدي افطري
وخليها تطلع تحضر لك الشنطه..
سندس:- بقولك ايه يابت العمده
هتعملي عمده عليا انا اياك
انا راحه اتدرب ؛ مسابقة الرمايه قربت.،
الحجه قمر:- مسابقه؟ بقي انا خليتك تتعلمي النشان علشان تجري ورا المسابقات واللعب
وتنسي الحاجه المهمه اللي بجهزك علشانها!

سندس:- وهو انا قولت حاجه ياما !
مانا بتدرب علشان الحكايه دي
وبالمره بشارك في مسابقات علشان ابقي محترفه...

نرجس :- مش يلا بينا ياست سندس
الحاجات دي تقيله قوي..
الحجه قمر:- الاهي توقعي بيهم تتكسر رقبتك
نرجس ضاحكه:- واهون عليكي يا ستي
ربنا يطول في عمري وابقي جمبك العمركله
الحجه قمر:- طب اخفي من وشي
وشيعي لي الغفير عوض البو
تلاقيه نايم لعند دلوك

انصرفت سندس بصحبة نرجس
وبعد قليل
دخل عوض
صباح الخير يا ست الحجه
الحجه قمر :- قولي عملت ايه في اللي قولت لك عليه!
عوض:- رحت لابو المعاطي في مصر
وقالي انه ماسك السجل المدني تدوير وبحث
وقريب هجيب لك خبر..
الحجه قمر:- وايه الجديد ، ماهو كل مره بيقولك كده ويلهف القرشينات
عوض:- المرادي يا حجه
هو جمع اسامي مطابقه وبيتحري عنهم
وان شاء الله هيلاقي اللي عليه العين
الحجه قمر :- المره الجايه تقوله
ان الحجه قمر بتقولك لو لقيته هتديك لعند ماتقول استكفيت
عوض :- حاضر ياست الحجه

..........
وصلت سندس ونرجس اسفل الجبل المجاور لمنزلهم حيث كان ذلك مكان التدريب
وبدئت نرجس بوضع الاشارات التي ستصوب عليهم سندس
وبدئت سندس بالتصويب
فاصابت الهدف الاول والثاني والثالث

واطلقت سندس علي الرابع والخامس
فقالت بتأفف:- اووووف هو ايه اللي جابه الساعادي !
نرجس بتعجب ! هو مين؟

واذا ب مصطفي ابن عم سندس
يمتطي جواده ، ويمسك بيده بندقيته،
ويقول:- الرجاله اتخلقت علشان تكون فرسان يا بت عمي ،.
لترد سندس :- والست ما اتخلقتش علشان تخدم الفرسان؛
مصطفي مبتسماً :- اهم شوية العلام والفلسفه دول لو كانو في دماغ حريم العالم
كانت البشريه هتنتهي.
سندس:- صوح ، لازم الست تكون جاهله من اجل استمرار الجنس البشري!
مصطفي:- عارفه يابت عمي، لولا دماغ امك الناشفه ، واصرارها انك انتي اللي تاخدي بتار ابوكي.
كان زماني جايب لك راس ولد عمران علي طبق من فضه ، ومقدمه مهر لجوازنا'
سندس:- انا مانفعكش يا واد عمي، انا بتاعة فلسفه وحقوق المرأه.
بتاعة علام وخطب وروايات
لا انت تشبهني ولا انا انفع لك..
مصطفي ،:- علي العموم مهما قولتي ،
ومهما رفضتي،
العرف عندينا بيقول .- الواد اولي ببنت عمه
وكلها سنه وحجة العلام تخلص
ويحصل اللي اتفقنا عليه مع الحجه قمر

وانصرف مصطفي......

نرجس ؛- انا عقلي هيشت منيكم !!!!!
فهميني عاد ،
كيف عرفتي انه جاي من غير ما تشوفيه؟؟؟؟

نرجس:- لان الاشاره اللي بنشن عليها الرابعه والخامسه ، قبل ما انا اضرب
كان صايدهم بطلقه واحده
وماحدش بيقدر يعملها غيره
وانا بقالي تلات سنين بتدرب عليها مش قادره اعملها...

ثم انصرفت سندس ونرجس الي المنزل...

.......———-.......———-.......——-.......—

في اخر النهار ، عاد غيث الي المنزل
وجد امه جالسه ، وعلي صديقه يعد الطعام

غيث:- ايه ده علي السفرجي اتاخر في تجهيز العشا
مخصوم منك يومين
علي:- الله يكون في عونها اللي هتاخدك
غيث :-ياواد اسكت الله يخرب بيك
ما تفكرهاش!
ام غيث:- ماهو ياعلي ياولدي هو حالي كده عاجبه!
كنه غاوي لي التعب!!!
غيث يجلس تحت قدميها وينظر لها بحنان
ويقول:- ابااااي يا ست الكل
دانا اخدمك بعيوني
ام غيث:- وليه ما تتجوزش ؟ لو عاوز تريحني اتجوز .
علي:- دانت ياخي انسان غريب
كل السبل متوفرالك وحضرتك بتتمنع
والله لو انا عندي نص امكانياتك
لكنت اتجوزت اربعه
غيث:- ماتروح ياد يا ثقيل انت تتجوز ولا تتنيل
هو حد ماسكك
علي:- ماسكاني الظروف يا غيث
انا وامي واخواتي عايشين في شقه ايجار
وانا انكتب عليا اكون الكبير اللي بيعول كل دول
علاج امي وابويا
ومصاريف اخواتي
وفوق ده كله اتهبدت في نفوخي ودخلت الجامعه
غيث:- ربنا يعينك ويقدرك ياعلي
والله يا صاحبي انت تستاهل كل خير
انت مثال للشاب المكافح
بتتعلم وتشتغل وعندك طموح
علي:- انت هتقلب عليا المواجع ليه
قوم اجري عالمطبخ اغرف علشان نتعشي