صفعه الخذلان..
(كما تدين تدان)
سلسلة اللعنات..
أسما السيد..
________
اللعنه الأولي..

صفعه الخذلان
(كما تدين تدان)
(حكاوي من قلب الواقع)

امي..دعت عليا وقالتلي..
سلفي عليكي..تنحطي في مكاني وتدوقي مراري..
وكأن دعوتها انقبلت في ساعتها..وكانت صفعه جامده..فوقتني..
وعرفت معني الحديث..اللي بيقول..

روى عن أبي الدرداء رضي الله عنه حديثاً يختلف العلماء في درجة صحته، وذلك بسبب عدم اكتمال سنده وانقطاعه، ألا وهو: (البِرُّ لا يَبْلَى، والإثمُ لا يُنْسَى، والدَّيَّانُ لا ينامُ، فكن كما شِئْتَ، كما تَدِينُ تُدَانُ) [الألباني: السلسلة الضعيفة]
ـــــــــــــــــــــــــــــــــــــــ
(بدايه اللعنه..)
ارجوكي متتخليش عننا...
احنا ملناش غيرك..
دي اخر حوار او كلمه طيبه بيني انا وامي تقريبا
كان
قبل ما تمشي وتسيبنا وتقرر الطلاق من ابويا..
لانه ببساطه عينه زاغت واتجوز الخدامه اللي بتخدم عندنا..
ابويا راجل تاجر كبير وكان بيعشق التراب اللي بتمشي عليه امي..
مشكلته الوحيده انه كان دائما نفسه في الواد..عادات وتقاليد ملهاش ستين لازمه..أو معتقدات أن الولد هو اللي بيشيل اسم العيله..وهو إلى هيخلد ذكري الوالد..تفاهات ياما خربت بيوت..وهدمت عائلات ودمرتهم..

ونسيوا أن في رب مطلع..وهو اللي بيهب الحياه لكل فرد فينا..وهو بس اللي عالم ليه كتب لفلان يخلف بنت، وكتب لواحد تاني يخلف ولد...اقدار منقدرش نتحكم فيها..بس نقدر نتحكم في الواقع ونغيره..
بس دا بيفضل مجرد كلام..كلام وبس ..نادر لما نلاقي حد بينفزه..

للاسف امي جابت بنتين...والفرق بينا وبين بعض حوالي خمس سنين لان امي كان عندها مشاكل في الخلفه..أو اتهيألنا كده..

وهنا بقي كان دور الخدامه اللي امي نفسها كانت بتعاملها احسن مني انا شخصيا..
كانت دايما تقولي غلبانه وبلاش نيجي عليها..
دي حتي لبسها كانت بتستخسره وتديهولها..ال ايه صعبانه عليها..
أمي أطيب خلق الله..ومعرفتش دا اللي بعد فوات الاوان..

قدرت الخدامه تخدع الكل ببراءتها وطيبتها..لحد متمكنت منه..وقدرت تضحك عليه وتلعب علي عقله.. وتخليه يتجوزها..كنا مزهولين مش عارفين حصل ازاي، ولا ليه؟

دا أبويا...اللي مهما كان بيتجبر بيجي لدموع أمي ويقف..اه كان دائما نفسه في الواد..بس عمرنا ماتوقعنا أنه يجيبه من واحده غير أمي..

هو بسهوله كده العشره بتهون..الحب والاخلاص..والتضحيه..
بس للاسف اكتشفنا أنها بتهون عادي..أو بتتنسي بالتعيين معينه، وأفعال اجراميه..مش اقل اجرام من القتل..إلا وهي...السحر..والشعوذه..ومن هنا بدأت مآساتنا كلنا….

__________
اللعنه التانيه..

ممكن الواحد تخونه الذاكره، وممكن قلبه يمثل النسيان..بس ازاي يقدر القلب ينسي العشق، والحب، والعشره تهون كده..

ازاي واحده بطيبه امي يحصل فيها كده...انا لسه فاكره رد فعلها..وكلامها وعتابها..وكبريائها اللي ماأخدتش بالي منه الا لما بقيت كده…

قبل سنوات…

في البيت الكبير..بيت العيله..١٩٨٠

أنا_ماما..ياماما..
الأم_ نعم ياعيون ماما..
_بابا أتأخر أوي ..وانا جعانه..خلي نرجس تحطلي الاكل مبقتش قادره..
_ نرجس مجتش بقالها كام يوم انتي ناسيه..عيوني ياسما هقوم احطلك الاكل..
_ طب وانتي ياماما مش هتاكلي انتي وإيمان معايا…
_ انا هستني بابا مينفعش اكل من غيره ماانتي عارفه..اختك عناكب معاكي..
_ماشي..

_ الله ياماما اكلك حلو اوي..خليكي اطبخلنا دوما...دي نرجس اكلها يقرف ..
بضحكه هاديه كالعاده ضحكت امي خدتني في حضنها وباستني ..
_ بس كده ياست سما..عيوني ..أنت تأمر ياجميل..

صوت دوشه كبيره جاي من برا البيت خلانا كلنا قومنا اتنفضنا..وصوت زغاريط وراه..

يادوب خرجنا برا ورجل امي اتسمرت في الأرض..وكأن العمر كله وقف بيا وبيها..عاللحظه دي..

لحظه لما نطقت امي..وهي تايهه ..

_ ايه ده.؟؟

وردت عليها نرجس بكل حقد وجبروت وهي يتعدل في طرحتها…

_ دي زفة عروسه زي ما انتي شايفه...زفتي انا وجوزي…

_جوزك..؟؟

نقلت امي عينها، واحنا زيها عالعريس اللي واقف ..واقف زي التايهه..بس بجبروت ..وبينها اللي عنيها بتنط منها الفرحه، والشماته..

وهنا نطقت أمي بعد وقت طويل من الصمت وهي بتنقل عينها بين بابا وبين نرجس اللي الفرحه والشماته بتنط من عينها..

_ أنت اتجوزت يا سالم...اتجوزت عليا..
وبعدها راحت في دنيا تانيه..

______

اللعنه الثالثه ..

كنت اسمع جدي الحكيم بيقول لعمامي دائما..الكلمه…
الكلمه اللي تخرج من بوقك لازم تكون موزونه وبحساب..الراجل يابني هو كلمه .

والكلمه ممكن تحيي وممكن تموت..

عمري مافهمت معناها، ولا فطنت ليها الا بعد ما كل شيء انتهي..وبقيت انا هنا دلوقتي..الكلمه اللي نطقها أبويا كانت كفيله بهدم بيتنا وهدم ست كان هو كل عالمها…

انا معشتش بعدها ولا أمي عاشت...انا أمي ماتت وقتها واللي فضل منها بقايا امرأه…

بقايا ست اخذت درس في حياتها مش هتنساه باقي عمرها..وخصوصا بعد اللي حصل بعدها..

لا الدنيا رحمتتها، ولاالكل رحمها، لا حتي انا..بنتها

عاشت ست مصفوعه بصفعه الخذلان ...العمر كله .

وقت ما قال أبويا وصرح بكل جبروت ..اه انا اتجوزتها..انا بحبها..


الدنيا دي وحشه اوي..غداره..وبتتقلب زي موج البحر..

محدش عمره كان يتوقع ابويا يعمل كدا في امي..
ويضيع الحب الكبير اللي كان بينه وبينها
امي اللي ياما دعيت عليها،بكل دعاوي الدنيا
ومفيش كلمه حلوه قولتها في حقها..صح..
حتي اخواتي،بعدتهم عنها وكرهتهم فيها
بس لما كبرت وعرفت..
عرفت ان كرامه الست ، وخصوصا لما تكون عاشقه.. مش مديه خوانه..عندها بالدنيا.. وان الست لما تثور وتترك استحاله ترجع ، ولو العشق كل حياتها، وامي للامانه طول عمرها نفسها عفيفه..

رغم فقرها واللي حصلها بعد اصرارها عالطلاق الا انها عمرها مامدت ايدها لحد..ولا اشتكت اللي حصلها..

ابويا كان مذبذب،تاره عاشق وتاره كاره
مش متزن ودا طبعا كان تأثير السحر المأكول اللي واكله..وشاربه..وعايش نايم بيه..محدش ينكر عشق أبويا لامي، وده اللي خلي الكل مصدوم ازاي حصل كده..

ـ اتحايل عليها ابويا كتير عشان تفضل، وتربي عيالها وتعيش مع ضرتها..بس كانت مجروحه ورافضه وكارهه..
جرحها الكبير زي ماكانت بتقول،كان متحكم فيها..
لدرجه انها فضلت كرامتها علي كل حاجه..حتي احنا بناتها
بس محسبتش حساب لغدر الدنيا..

انت ممكن تضغط علي اي ست باي حاجه،الا انك تضغط علي ست تعيش، وهي كارهه ليك
نظرتها ليك اتغيرت،وانكسرت صورتك اللي رسمهالك قدام عينها..
مش هتعرف تعيش ولا تتأقلم..امي كانت عارفه انها مش هتقدر تعيش ولا تتعامل معاه عادي تاني فاختارت البعد والالم..والفراق..في الحالتين هتضحي..والتضحيه فراق..

ماهو صعب تبني وتتعبي في عش واحلام ورديه بتبنيها مع شريك حياتك وتيجي واحده ماتسواش تقش وتهدم كل اللي بنيتيه..

امي استسلمت،محاولتش تحارب،بعدت واختارت حكم القدر لينا وليها..

وليه هو..وللامانه في الاخر ربنا جبر الخواطر..جبرها جامد وخصوصا في امي..واخويا اللي مش شقيق اللي كلنا كرهناه واذيناه..

سواء نفسي ولا بدني..

ايه ده..دا كله بحكي..ومعرفتكوش مين انا...امم..اعرفكم مين انا ..

انا سما….ودي أول صفحه في مذكراتي اللي قررت اكتبها بعد عمر طويل مرير..من الالم والتعب، والعذاب..

من سنين بتابع مع طبيب نفسي..وفي كل مره كان دائما ينصحني اكتب ..اكتب اللي حاسه بيه، اللي عشته، واللي حصل ..بس انهارده بس قررت ..لما حسيت أن خلاص مبقاش في وقت..وان الزمن خلاص دار وكل صاحب حق..خد حقه عالدنيا..


*أنا سما..كنت عيله صغيره بضفاير؛عايشه عيشه هاديه بين اب وام جميله جمال مش عادي
ام حسنه الخلق والاخلاق زي ما بيقولو..
بيحبو بعض وواخدين بعض علي حب زي مابيقولو..
امي وابويا كانو ولاد عم..وحبو بعض واتجوزو..جابوني انا الكبيره سما.. بعد معاناه مع الدكاتره لان امي كان عندها مشكله..
وبعديا اختي ندي بعدي بخمس سنين..
واخيرا اخويا الصغير اللي اتفاجأنا بحمل امي فيه بعد طلاقها..
يعني بيني وبينه ١٠سنين.

نادر حبيبي وروحي..وفي ليله كاحله فوقنا كلنا علي صوت صريخ وبكا..امي بتبكي بقهر وبتلطم علي خدها..بعد صمت طال يوم كامل من وقت نتدخل علينا أبويا بعروسته الجديده اللي اتفاجئنا بيها كلنا..


ـ اتجوزت عليا ياعبدالله ليه انا عملت ايه،هي احسن مني في ايه؟

ابويا مكنش قادر يتكلم..كان حاطط وشه في الارض وساكت.. مبيردش..

ولو رد بيقول غصب عني..معدش ينفع اطلقها حامل مني..وهتجبلي الواد..
الصدمه لجمتنا كلنا..ازاي حامل وازاي الصبح كانوا عرايس...كنت وقتها بعقل طفله بفكر، مكنتش اعرف ان الحوار كان أكبر من كده..

حوار أن أبويا خاين..وخان أمي وكسرها..وهو نايم في حضنها..

النظره اللي طلت من عيون أمي وقتها لسه محفوره جوايا…

_ وقتها امي رفعت عينها في عينه وبصتله بحرقه وخيبه امل
وكانها كانت متوقعه ..اللي هيقوله..مثارتش ولا اتنرفزت.. ودموعها نزلت علي خدها..
وبقله حيله..مدت ايدها ومسحت دموعها..

ــ خلاص يبقي تطلقني انا،ربنا يوفقك.في حياتك..هي أحق مني بيك..هي أم الواد..اللي كنت بتحلم بيه..

ابويا جسمه اتخشب ومبقاش عارف يرد..ابويا عمره ماكان كدا..

كلمه الطلاق من امي علي سبيل الهزار كانت بتخليه مش في وعيه..وبتبقي ليله بمبي.

انا واعيه لكل كلمه وكل رد فعل منه ومنها،بس وقتها ماكنتش فاهمه..

ـ اللي حصل وقتهااا خلانا نتأكد ان ابويا بتاع زمان عمره ماهيرجع..

الخدامه اللي وقعته عرفت تتمكن منه..

بصلها بهدوء وسحب نفس...بعد صمت ونظرات لو كنت فسرتها وقتها ..كنت عرفت اد ايه أبويا كان بيصارع حاجه مش عارفها محتاجه اللي يفسرها..

ـ اللي يريحك...انا هعمله..بس لو حابه تربي عيالك اقعدي ربيهم وانا هصرف عليهم..ربي بناتنا في بيتنا..

انتي عارفه وانا عارف اخواتك وحشين ومحدش هيصرف عليكي..فبلاش السكينه تسرقك، وترجعي تترجيني وتندمي..لان ساعتها مش هرحمك..


نظرة أبويا ساعتها كانت اتغيرت، من نظرة متوتره، بنظره قاسيه، نظرة كره، واشمئزاز وقرف..وسخريه..ازاي أمي فضلت ثابته بعدها…

_ انتي عارفه انا مبتفش تفه وارجع الحسها..

ورجع بصلها بصه رغم مرور السنين الا انها لسه معلمه فيه..

بصه بتقول هتستسلم..دا اضعف مايمكن انها تمشي..هتروح فين؟
اهلها جامدين ونسوان اخواتها مش هيطقيوها..اكيد هترجع..واهي خدمه بخدمه..هتبقي خدامه ليا ولعيالها..

ـ بصه كل ما افتكرها اجري اروح علي قبرها واقولها سامحيني ياامي انتي انظلمتي..وكلنا جينا عليكي..سامحيني وارحميني من دعوتك
اللي اتحققت..انا غلطانه
بس يفيد بايه الندم..

ـ ساعتها بصتله امي،بصه سخريه علي حزن مكبوت..وقهره وغصه بحلقها..مش عارفه تبلعها
وهي بتحاول تبان قويه..
وقالتله..انت صح ✅

_ انا فعلا مليش حد...انت اللي كنت مفكراك الدنيا كلها بعد موت ابويا وامي..

بس معلش..ملحوقه..مفيش حاجه ياعبدالله بتفضل علي حالها
عندك حق اخواتي ونسوان اخواتي مش هيطيقوني ببناتي..وهيخلوني خدامه ليهم..عشان كدا..

وقتها نزلت دموعها تجري، وبصت لينا نظره عمري ماانساها، وحطت أيدها علي قلبها..

_ انا هخرج بس بطولي مش هتحمل بناتي يشتغلو خدامين عندهم..كمان..كفايه انا ، خليهم معاك يعيشوا من خيرك..وانا ربنا يتولاني..

ابويا رجع وقتها لورا ، للحظه حسيته هيجري يحضنها زي ما كنت دائما بشوفهم بعد كل خناقه صغيره بينهم ، أو حتي كبيره، كنت انسحب واستخبي عشان اشوف بابا وهو بيحضن ماما ويصالحها…



بس لا...اللي حصل بعدها كان صدمه...صدمه لينا كلنا…



اللعنه الرابعه…
________

انصدم أبويا وقالها..بتقولي ايه؟
_ ازاي؟
_ انتي....سكت ووشه مكنش يتفسر..والندم بان عليه..
مهما قال مبحبهاش..كان بيعشقها ولما جه يموت
متمناش غيرها..يموت بين ايدها، وينظر بس في عينها…
بس نقول ايه..منه لله اللي بياذي..


الصمت بتاع أبويا طال..طال اوي ومردش بقي واقف زي التمثال متخشب، وهي بتقرب مني، وبتبوسني، وعملت كدا مع اختي ندي ..

ودموعها نزلت وهي بتقول سامحوني..مش بإيديا..
وخرجت زي ما دخلت من غير شنطه هدومها..حتي..

وسلمته كل حاجه ...وقالتله الهدوم دي من فلوسك،انا متجوزاك من غير اي حاجه كتر خيرك..والدهب كمان..انا أبويا الله يرحمه لما جوزي ليك كان راجل فقير، وعمي الله يرحمه برده كان غني..واتكفل بكل شيء..فأنا زي مادخلت هخرج .
وفعلا خرجت..جريت انا واختي نمسك فيها،بس هي خلاص كانت حسمت امرها..
خرجت امي من هنا، والصبح لقينا ست الحسن والجمال اللي فضلها ابويا
علي امنا،في مكانها وفي اوضتها...بعد ليله مبطلناش فيها انا واختي بكا..
ابويا كان بيدبل من فراق امي، بس مش عارف ياخد موقف..ولا فائق لنفسه، ولا عارف بيحصل ايه؟؟

ساعات يحنلها وساعات يشتم ويسب فيها..بعتلها مراسيل كتير ترجع بس مكنتش بترضي وخصوصا بعد ماعرف انها حامل في الواد اللي كان بيتمناه..والست الهانم في بطنها بنت بردو...وأنها ضحكت عليه عشان يتجوزها..

وحياتنا احنا..بقت جحيم..مرار في مرار..

ضرب وتعذيب وعيشه زي الخدامين عايشينها..قدام ابويا سمنه علي عسل
ومن وراه كانت بتقتلنا ضرب..ومن جبروت أبويا كان مانعنا حتي من أن تخطئ العتبه اللي جمبنا…

وفي ليله..سمعنا صوت امي بتبكي لابويا تحت شباك اوضتنا، وراه البيت الكبير اللي عايشين فيه، وتقوله انها نفسها تشوفنا...هاتوهم عندي شويه، وخصوصا اننا ساكنين كلنا في حته واحده، زي بيت عيله كدا..بيوت جار بعضها..
بس ابويا رفض...رفض قاطع، وقتها كنت مفكره أنه زي مامرات أبويا قالتلنا ، أنه بيضغط عليها بينا..عشان ترجع..
بس الزن من مراته خلاه زي الاعمي..لا شايف ولا عارف..
لحد.ماجه ميعاد ولاده امي..
واللي حصل ساعتها لا ينكتب ولا ينقري..


اللعنه الخامسه..

ـ ارجوك ياعامر متبعدوش عن حضني خليني اشوفه بس..

انا هعيش خدامه ليكو بس خلوه في حضني
عامر اخو أمي بحده..

لا خلصنا..
الواد دا ابوه هياخده.. وانتي هنكتب كتابك انهارده.. عدتك خلصت بولاده ابنك..
العريس مستني من شهور..مش هتفضلي قاعده كدا
ورجوع لجوزك مش هترجعي خلصنا كدا..
دي كانت الضربه القاضيه لامي..
خالي عامر كان راجل جبار وقلبه قوي مبيرحمش.. وكان بيكره ابويا كره العمي، منعرفش ليه..يمكن غيره، أو حقد متعرفش..

فعلا اخد اخويا اللي لسه مولود ورماه لابويا.. واللي عرفنا بعد كدا ان ابويا اشتري خالي بقيراطين ارض كتبهم ليه.....عشان يسيبله الواد..

امي حست ان الدنيا كلها متفقه عليها.. وخصوصا بعد ماراحت لابويا تاني يوم تترجاه
يسيبه ليها..دموعها مغرقه وشها، بس للاسف أبويا كان خلاص السحر اتمكن منه، والجبروت زاد في قلبه أضعاف..
خرجلها وفي ايده ابنها..اللي حتي ملحقتش تشبع منه..

ـ عملتي اللي عملتيه، واهو كله في الاخر صب لمصلحتي.. واديني خت الواد في حضني.. وانتي اللي خسرتي لا واد ولا بنت..
بس انا عندي عرض ليكي..
كانت بتبص لابنها اللي بيصرخ علي ايده..ودموعها مغرقه وشها..
ـ وبتقوله..
ابوس ايدك هاته.. خليني ارضعه..اخده في حضني..
بقي مشفعليش حاجه خالص عندك..
ادهولي املي عيني منه.. داانا مشفتوش حتي..لما اتولد..
وقتها ابويا بكل شماته بصله وكانه كنزه الثمين وقالها..
اسمعي عرضي الاول.. مش يمكن يعجبك..
عجبك كان بها.. مش عجبك..
انتي حره..
ـ عرض ايه؟
ـ ايه رايك.. تيجي زي مابيقولو في التليفزيون تشتغلي مربيه ليهم واهو منك تراعيهم ومنهم تشتغلي بدل ما نسوان اخواتك بيسمموكي باللقمه.. ومشغلينك خدامه ليهم..دا حتي من كتر الخدمه خلقني الواد ضعيف من قلة الاكل...وبقيت شبه الموميا..لا جمال ولا مال..
وقتها امي نزلت دموعها بقهر وفعلا ساعتها اتأكدت أن فعلا مذلوله ليهم
ومش راحمينها...وخدت قرار .
قربت أمي وبصت لملامح اخويا وقربت شويه تمد ايدها تاخده بعده هو بسرعه عنها.. وحصل بعدها حاجه عمري ماانساها العمر كله..بتنعاد كل يوم قدامي كأنه مشهد سينما..

--------
اللعنه السادسه..

قربت أمي وبصت لملامح اخويا وقربت شويه تمد ايدها تاخده ..بعده هو بسرعه عنها..وبصلها بشماته كسرها بنظرته الف مره ، كان منظره عجيب، وكأنها أول مره تشوفه، أول مره تكتشف أنه شيطان كده، تقريباً دي كانت النظره اللي بيجي بعدها الكره، الكره اللي مش هينفع من بعده محبه، وامي وقتها كرهته، كان واضح في نظرة عينها ..

وقتها ابتسمت أمي بقهر، ومسحت دموعها بكبرياء، وغرور ست طول عمرها محافظه عليه، منهارتش، ولا اتخلت عنه..
أمي خليط عجيب من كبرياء وكرامه، و

ورفعت ايدها للسما، وبكل حرقه..وحزن.. وقهر دعت..

استودعتك يارب ولادي انت عارف أنه مش بإيدي، وان مظلومه في حكايتهم ، وان لا ليا من بعد جبرك، لا حيله ولا قوه..

ومشت، والدنيا سوده في وشها، لمحتني واقفه عالباب،قربت تاخدني في حضنها..

انا كنت وقتها شايفاها زي الغول، شايف واحده اتخلت عننا، ورمتنا بإيديها للنار..نسيت كل حاجه..وافتكرت بس ضرب أبويا ومرات أبويا ليا ولاختي، وكلام مرات أبويا اللي افترت بيه علي أمي…

واحنا ببساطه صدقناها..وكرهنا امنا…

زقتها بغل..وقولتلها انا بكرهك،ياريتك كنتي موتي وانتي بتولدي وارتحنا من قرفك..

في الحقيقة أنا بدعي النسيان..بس لا انا نسيت نظرتها، ولا نسيت كلامها..
وقتها انهارت أمي..وبكت بحرقه ..وصوت بكاها سمع الدنيا كلها، جذب خالي عامر اللي جه جري، وفضل يضرب فيها، ومرات أبويا واقفه بكل شماته تشمت فيها.
واللي متخيلتوش بعدها..ان أبويا يتنفض، ويدي اخويا ليا..

وبكل جبروت ضرب عامر وحاشه عنها..الموقف كان يشيب، وقبل ما خالي عامر يتكلم..كانت ايد أبويا سابقاه، ويومها ضربه بوكس فضل وشه مشوه بعدها…

بس اللحظه اللي كل العيله اتمنت تدوم، مادامتش..ومرات أبويا بكل جبروت مسكت امي من شعرها وكملت ضرب فيها..
ولسه أبويا هيمد أيده يمسكها..كانت في ايد تانيه بتحوش عنها..ايد كانت حنينه، حنينه اوي لدرجة أن أمي فضلت تعيش معاها باقي عمرها حتي لو كان زادها القليل فيها..وملبسها من خيش، وبساطها كان الحصير مش زي ماكانت عايشه طول عمرها…

ايد كانت ليها السند..كل السند…

____________

بعدها بيومين انكتب كتابها واتجوزت واحد اكبر منها.. يجي ب ١٥سنه..
حالته ضيقه علي قده.. موظف كحيان زي ما بيقولو
بس كان بيحبها..وكان بيتمنلها الرضا ترضي
بس للاسف القلب كان انكسر وكانت عيشه والسلام..وياعيني علي القلب لما بينكسر وميلقوش ليه دوا..
خلفت منه ولد..
وابويا كان كل مادا بيبعد اكتر عننا
واثر السحر والاعمال كان بدأ يبان عليه ويحط منه ومن صحته..
كبرنا وكانت امي بتجلنا سرقه قدام باب المدرسه كل يوم..من غير زهق ولا ملل..
في ايديها
سندوتشات جبنه قديمه وطماطم وخيار..
علي قد حالها..
بس في كل مره كانت بتجيلنا كنت بشتمها وببخ سم مرات ابويا في جسمها وبقولها انتي السبب
ليه معشتيش خدامه تحت رجلينا..
واخد منها الاكل وارميه في وشها..
واقولها..
ـ دا مش قيمتنا..دا قيمه الفقرا اللي زيك..
مش محتاجين اكلك في حاجه..اكليه لابنك اللي زيك..
واشاور بإيدي علي اخويا الصغير اللي كان بيجري يستخبه في حضنها من قوه صوتي عليها..
كنت بلمح اخويا الصغير عاوز يجري عليه.. كنت بسرعه اضربه علي وشه،واقوله اوعي هخلي ماما نعمات تضربك..
نعمات دي مرات ابويا..
ساعتها كانت تبكي وتقولي ماتجيش عليا يابنتي..
متلوميش محدش ضامن عمره..
كنت اضحك بسخريه واقولها.. بطلي مسكنه
انا عمري ماتخلي عن عيالي بكنوز الدنيا حتي لو هشتغلهم خدامه..
تعرفو..
عمري ماندلتها بأمي ولا خليت اخواتي يندهولها ابدا..
دموعها عمرها مأثرت فيا ماانا مقولتلكوش ان نعمات مرات ابويا كانت علطول شحنانا ضدها
رغم انها كانت سقيانا الذل والمرار انا واخواتي..
بس كنا بنسمع كلامها ونعمل زي مابتقول..
رغم كل القرف اللي شايفينه منها..
تخيلو كدا..
امي بقولها ياست انتي..
ومرات ابويا ياماما..
ااه ياامي سامحيني..ياما كسرتك..
لدرجه ان في مره خدت عيالها وولادها وابويا وراحو يصيفو وسابونا هنا
واخويا الصغير كان هيموت ويروح معاهم..
وللاسف فعلا ركب القطر وراح وراهم وبعد ماقطع المسافه من السويس لبورسعيد ضربته وشتمته وقالتله ارجع زي ماجيت
وقتها اخويا الصغير بقله حيله رجع وهو عينه عليهم..وبيبكي بحرقه..
نفسه ومش طايل
لا ابويا ادخل ولا قدر يمنعها ولا هي قلبها رق وحن ليه
وهي هتحنله ليه،؟ اذا كانت امه اللي ولدته سابته..
شافو راجل كبير في القطر وحكاله الحكايه...
الراجل العجوز خاف علي اخويا واداله فلوس وعيط عشانه
وروحه زي ماجه وماسابوش الا لما وصل..
وفي كل مره كنا بنكره امي اكتر واكتر..
واقول فيها ايه لو فضلت خدامه..ماهي عيشتها زي عيشه الخدامين..فقر وقرف..
بيت من طين وملابس تقرف،وجسمها من قله الاكل بقي هزيل..وابنها شبه ولاد الشحاتين..
مكنتش اعرف انه من الحزن والفراق..
اخويا طول عمره بيحنلها،كان بيهرب ويروحلها من ورانا..
لحد ما مرات ابويا اكتشفت دا وطبعا..
كان لازم تحط التاتش بتاعها..
يومها ابويا قتل اخويا من الضرب لدرجه انه فقد النطق شهر
وفي كل مره كنت بكرهها اكتر واكتر
واحط الذنب عليها..
لحد ماكبرت وانفرد عودي واتجوزت ابن عمي
وكأن القدر بيعيد نفس حكايه امي..
حبيته وحبني، بس انا من كتر الضرب والتعذيب كنت عايشه عالمهدئات،ضعيفه الشخصيه..قدامه..ويمكن دا اللي معجبوش فيا..
وكان سبب في دماري..
معرفش..
بس مع دا كله..كانت امي عمر زيارتها ماانقطعت ليا حتي بعد جوازي.
ـ عمري ماقبلتها حلو..كانت تيجي وتقعد واضرب عيالي واقولهم اوعي حد يسلم عليها ولا يقولها ستي..
واخويا كان لسه صغير واتنقل عاش معايا انا وجوزي..
كانت تيجي تقعد زي الكرسي..تتكلم،تتكلم ومردش عليها ابدا..
فتقوم بعدها بدقايق وتمشي
كانت حالتها عدم وفي ايدها اخويا من جوزها التاني،بملابس قديمه ووش عافف عليه الدبان او يمكن انا من كرهي كنت شيفاها كده..
كان كل مايجي يلعب مع اخويا وولادي الصغيرين..
اضرب ولادي واخويا واقولهم اياكوا
تلعبو مع الاشكال دي..
كرهي ليها كان عامي عنيا
وفي مره من صوتي العالي..
ابنها اللي هو اخويا غير شقيق
من زعيقي عملها علي روحه..
وبكا..
فشخطت فيه لانه بهدلي الدنيا..
وقتها خرس خالص.. وبصلي بصه عمري ماانساها..انا ايه ذنبي،بتعملي ليه.كدا..؟
بكي وجري علي امي وخدتع في حضنها
لمحت دمعها في عيونها بتحاول تداريها
وخدته ومشيت..
مااناكمان كان ايه ذنبي..؟
كان يجري اخويا الصغير عليها..اشخط فيه واقوله سيبها تمشي.. تغور في داهيه..
هي كل يوم تنطلنا هنا..مورناش غيرها.
كنت دايما شايفه انها بتيجي عشان تشحت مني او تصعب عليا واديها حاجه من عندي..
بس في الحقيقه هي كانت نفسها عزيزه وعمرها ماشربت ولا كلت عندي
كان جوزي بعد ماتمشي يخرج جري
يشخط فيا ويزعقلي ويقولي انتي معقده
حرام عليكي..بكره اللي بتعمليه يتردلك..
كما تدين تدان..انتي ازاي كده...؟
دا انتي بترحبي بمرات ابوكي وعيالها احسن من كدا..
مرات ابوكي اللي كانت زلاكي ومكرهاكي في عيشتك..
مكنتش بهتم بكلامه ولا عمر كلمه كما تدين تدان فهمت معناها..ولا عرفت اني جوزي نفسه من حقدي بدأ يكرهني..
الكل كان عارف انها انظلمت..
وخصوصا جوزي لانه كان كبير وفاهم..
الا انا..كرهي ليها كان عامي عيوني..
كبرت واخويا كبر وهي كبرت وابويا زيها
كبر وبدأ الندم ينخر في قلبه..
جوزها اللي اتجوزته كان مات من سنين..
ورجع ابويا يتحايل عليها..ترجع من غير ابنها
بس كانت متمسكه بإبنها..
ورفضت رفض قاطع..
تتخلي عنه..ودا زود كرهها في قلبي..
انا الوحيده اللي كنت بكرهها اوي..اخواتي كانو بيتعاملو معاها عادي..
فضلت هي واخويا لوحدها..في نفس البيت ونفس الحال.. علي معاش جوزها..
بيقضوا بقيه عشاهم نوم.. او انا كنت مفكره كدا..
مكنتش اسمع عن حاجه اسمها الرضا والقناعه
والبركه..
بطلت تزورنا انا واخواتي في بيوتنا من زمان من ساعه اللي حصل وانا قلته ليها
ماهي ندي كمان كانت اتجوزت وولادها كبار.. انما اخويا من صغره عايش معايا انا..
لحد ماجيت في مره تعبت جامد والكل عرف بتعبي..
وجت لسوء حظي..او سوء حظها..
تزورني..
ـ الف سلامه عليكي ياقلب امك..
ياريتني انا..
مدت ايدها تحسس علي راسي مطقتش
زقتها بقوه..
فرجعت قعدت مطرحها وحطت وشها في الارض
اخويا ادهم دا الغير شقيق كان معاها وقتها كان عنده ١٥سنه..بدا يكبر ويفهم..
بصلي بكرهه..وحده..نفس البصه اللي ببصلها بيها..
واتنفض من مكانه وحاوط امي بايده وخدها في حضنه..
يالا ياامه..
امي قامت من مكانها بهدوء وطاوعته ومشيت..
حسيت انه انتصر عليا..قومت اتسندت وخرجت فلوس من جيبي
وبكل عنجهيه مديت ايدي
وادتهالها في ايدها...
ـ خديدي،ابقي هاتيله حاجه يلبسها ولا ياكلها..
كنت متوقعه انها هتاخدها وتبوس ايدها وش وظهر بس اللي حصل..ساعتها...
اااه..كان لعنه..وحلت عليا..

ــــــــــــــــــــــــــــــــــ

2
صفعه الخذلان..
اسما السيد..
ــــــــــــــــــ
https://my.w.tt/eMBU6aEi55

اللهم صلّ صلاة كاملة وسلّم سلاماً تاماً على سيدنا محمد النبي الأميّ الذي تنحل به العقد، وتنفرج به الكرب، وتُقضى به الحوائج، وتنال به الرغائب وحسن الخواتم، ويستسقى الغمام، وعلى آله وصحبه عدد كل معلوم لله..
ــــــــــــــــــــــــــ
مديت ايدي بالميه جنيه ال يعني بحسسها هي جايه ليه.وان انا فهماها..
بس ساعتها اخويا اديرلي وبصلي بصه شفقه علي حده علي نفس مكسوره..
وقالي...
ـ شيلي فلوسك دي احنا مش جاين نشحت منك..احنا كنا جايين نوصل صله الرحم
اللي انتي نسيتيها..
و لولا دموعها اللي منشفتش من ساعه ماعرفت بمرضك مكنتش خليتها تهوب ناحيه القصر الملكي اللي انتي عايشه فيه..
دا..
وبصي بعينه بسخريه،للمكان..
علي نظره تانيه موجوعه كانت باينه اوي في عيونه..
ـ الهلاليل اللي علينا واللي انتي قرفانه
منها، احلي واحسن مليون مره
من البرندات اللي بتلبسيها انتي وعيالك..
احنا صحيح بنقضي عشانا نوم زي ما بتقولي للناس بحالها..
بس احنا راضين..
وكفايه راحه البال والسلام والهدوء..وان احنا بنيجي اخر الليل نعرف ننام..من غير علاج ولا ادويه..
واكيد ربنا له حكمه في كدا..مش معترضين..
(حصري لجروب ولنا في الخيال حياه)
اول ما سمعت كلمه ادويه اتجننت،سيبت كل الكلام ومسكت في الكلمه..امي كانت بتبصلي بحزن وكسره..ودموعها مليانه دموع..
بس ماهتمتش كل اللي كان في دماغي..
انه اكيد بيعايرني عشان انا تعبانه ومبعرفش انام غير بالمهدئات..ماهو من ايه..؟
من مرات ابويا واللي عملته فيا انا واخواتي
وهي كانت السبب وادتلها الفرصه بتخليها عننا....
ليه مضحتش عشانا..زي ما مهي مضحيه عشانه..وعايشه تدلع وتربي فيه..
الغيره نهشت قلبي وانا بقارن حالي بحاله..
رغم اللي هو فيه،والفقر والعوزه..
الا اني شيفاه سعيد احسن مني..
مبقتش شايفه ولا عارفه..حاجه..
ليه انا مش سعيده زيه..ليه انا اعيش عالادويه وانا معايا فلوس..
وهو سليم معافي وسعيد بفقره في حضن امه..
الف ليه وليه،لعب بيها الشيطان في دماغي..
(صفعه الخزلان،اسما السيد..)
شديته بقوه من دراعه..قبل مايخرج من باب البيت..
وبكل ما فيا ضربته بالالم علي وشه..
شهقت امي..وضربت علي قلبها بحركه شعبيه
وصرخت..
ـ ابني..
ورجعت صرخت تاني، لما شافت مناخير ابنها بتشلب دم..
انا نفسي مش عارفه جبت القوه دي منين..؟
الكل بيقولي لما بتتعصبي بيبقي فيكي قوه تهد جبال..
وياما جابولي شيوخ..يفسرو ايه سر التحول اللي بيحصلي والقوه دي
واحد قال تأثير السحر اللي مالي جسمها، اللي مرات ابويا منها لله..دايما سقياه لنا..
انا واخواتي..بس محدش اتأثر قدي انا
من صغري جسمي حساس وبيدخله اي شئ
وللاسف انا ضعيفه الشخصيه..
وواحد قال ممسوسه واللي عليها اللي بيتحكم فيها..
معرفش..
اخويا رفع وشه..وعينه اتملت بالدموع ولسه هيتكلم..وهينفعل..
امي شدته بسرعه وقالتله..
اوعي اختك الكبيره وضربتك..
شوفت ملامح الجنون في عنيه،انا خوفت
واترعبت ليمد ايده عليا
وساعتها حسيت اني فعلا غلطت..
مكنش لازم اعمل كده..
ـ اوعي تغلط غلطها وتمد ايدك،حلفتك بالله ياادهم..اختك تعبانه..مش داريه بنفسها..
ساعتها اتجننت اكتر..
وصرخت في وشها..
ـ قصدك ان انا مجنونه..وبشد في شعري..
انا واعيه لكل كلمه بقولها وكل حرف..
قربت مني وطبطبت عليا..
ـ اهدي ياسما ياحبيبتي..انتي ست العاقلين..
انا مش ديمالكو يابنتي..وكبرت ونفسي اطمن عليكو.. ان انتو حلوين مع بعض..
نفسي تعتبرو ادهم اخوكو وتقربو من بعض..
ولا اكتر ولا اقل..
يمكن غلطت واستاهل كرهك..بس حطي نفسك مكاني يابنتي
انا تعبت يابنتي ومبقتش حمل مناهده وخصام..
انا مبجيش عندك عشان اشحت منك..
انا باجي املي عيني منك ومن اخوكي ومن ولادك..
ولادك اللي هما اغلي منك..
مش بيقولو اعز الولد ولد الولد يابنتي..
ليه قاسيه كدا..دا من.جه بيتك جاب الحق عليك..
نطرت ايدها بحده وقولتلها..ابعدي عني..
مين ده اللي عوزانا نقرب منه..
دا...
ابتسمت بسخريه، واخويا واقف يغلي..ولولا ايد امه اللي حيشاه عني
متاكده كان مد ايده وضربني..
شكله شراني ومن دلعها فيه،مبيخفش..
ابتسمت بحزن وقالتلي..
ـ حاضر ياسما..مش هتشوفي وشنا تاني..
لو دا اللي هيريحك..
بس بالله عليكي ابقي سيبي رامز يجيلي..
دا بيخاف منك..
بردي قلبي يابنتي..يارب مادوقي مراري وحرقه قلبي
ـ بصتلها بغل وسخريه..
انا عمري ماهكون زيك..واتخلي عن ولادي..
بطلي تمثيل بقي..
واياكي اشوفك جمب ولادي واخواتي..
بصتلي ودموعها نزلت..
وقالتلي..
انتي جايبه القسوه دي منين..؟
انا دلوقت اتأكدت..انك تربيه ابوكي..ومرات ابوكي..ياخساره عليكي..كنت مفكره انك اكتر حد هيحس بيا..بس للاسف
مش عارفه اقولك ايه..؟
غير سلفي عليكي..
تنحطي مكاني وتدوقي مراري..
تدوقي قسوه الضنا عليكي..الضنا بس..
مش حاجه تاني..ياسما..
عشان لو دوقتي اللي انا دوقته..
عمرك ماهتتحملي ابدا يابنتي..
انا اول ما سمعت كده..جسمي اتلبش وخوفت..
معرفش ايه حصلي..
بقيت عاوزه امسكها واقولها اسحبي الدعوه..
متمشيش..
حاوطها اخويا وطبطب علي كتفها وباس راسها..
وخرجم..
معرفش ايه خلاني امشي خطوتين وراهم..
وسمعتها بتبكي وبتقوله..
ـ انا مكنشي قصدي ادعي عليها..اختك تعبانه وكل ماشوفها احس، اني ظلمتها..بس والله مكنش بإيدي..يابني..
يارب ريحني..انا مشوفتش يوم في حياتي عدل..انا طول عمري مظلومه..ريحني وخدني عندك بقي..
يمكن الاقي الراحه شويه..
ـ متبكيش ياامه..الي حصل دا كان مقدر ومكتوب هي اللي جاحده..وقلبها قاسي
قلتلك بلاش
مسحت دموعها بطرحتها..
ـ متكرهاش ياادهم..دي تعبانه واللي ما تتسمي هاريه بدنها بالسحر والكتابه..
منها لله..ربنا ينتقم منها..ضعيتني وضيعت حياتي..
ـ روحي ياسما يابنتي..قلبي مسامحك..
سمعته بيضحك ويهون عليها..
ـالله ياامه انتي المفروض تشكريها انها خلتك تطلقي وتتجوزي ابويا وتخلفيني انا..
ادهم باشا..
ضحكت من بين بكاها..وضربته علي كتفه..
ـ كتك ايه ياواد ياادهم.. دايما كدا..مقدرش اكلم كلمه الا اما تقاوحني..
خدها اخويا في حضنه ومشي..
كل شويه يبوس راسها..
ورجعت انا بصدمه لورا..
انا مش عارفه عملت ليه كدا.. ولا ليه هنتها كدا..
انا قبل ما هينها هنت نفسي وبليت نفسي بايدي.. بدعوه.. يمكن مكنتش من قلبها.. بس انقبلت.. في ساعتها..
ولقيت نفسي جسمي بيهدي ويرجع لطبيعته..
وبدأت انب نفسي كالعاده..
دعوه الام وخصوصا لما تكون محروقه..اكيد ربنا بيقبلها في ساعتها..
دخلت شقتي وقعدت دافنه وشي بين رجليا..
كالعاده.. ندمانه علي كل كلمه خرجت مني
انا ايه اللي عملته ده..؟
انا فعلا مريضه..وانا عارفه ان فيا حاجه مش طبيعيه..
وكرهي لامي كمان مش طبيعي..
انا قلبي طيب بشهاده الناس كلها..الا معاها هي..
حتي مع ولادي ضعيفه الشخصيه ومليش كلمه عليهم..
ليه بعمل كدا معاها..؟
اكتر حاجه مخوفاني كانت دعوه امي..وخصوصا اني شايفه ولادي الصبيان كأن بينهم وبين بعض طار بايت..وبحسهم قاسين وقلبهم جامد..عليا..
جامد قووي..وعمري ماقلت كلمه الا وعارضوني وكدبوني..
حتي معاملتهم لاخويا الصغير بقت فيها قله حيه
واخويا بدا يدايق منهم..
بكيت بحرقه..مبقتش عارفة انا فيا ايه؟
ولا عاوزه ايه.؟
ـ دخل رامز اخويا عليا....
ماانا مقولتلكوش..رامز كان جوا بس كالعاده خاف يدخل عشان مزعلش منه..
ـ بتعيطي ليه دلوقت؟
كل مره تعوكي الدنيا وتعيطي كدا..
فيها ايه لو كلمتيها حلو ياستي حتي من ورا قلبك..
بصتله بحده بعد ماافتكرت انه بيروحلها وخايف من مني..
انت بتروحلها من ورايا؟
اخويا خاف وانكمش مني..
ـ انا بس،روحت اعيد عليها والله ياسما..انا..
صرخت فيه وقولتله..
تعيد عليها مش دي اللي رمتك وانت حتت لحمه حمرا..مش دي اللي فضلت تعيش تربي ابنها علي انها ترجع وتخدنا في حضنها..
انت نسيت دا كله..
هتفضل غبي لامتا..
اتنهد بحزن..وقالي..
ـ انتي ليه كل شويه تفكريني ياسما..انا علي فكره سمعت منها..
حرام عليكي..امك انظلمت..وياستي انا مش عاوز اغضب ربنا فيها..
حتي لو كانت السبب..محدش ضامن عمره ياسما..
متزعليش مني..سيبيني اروحلها برضاكي..
كلام اخويا صدمني..وحسيت فعلا انه كبر
معدش رامز الصغير اللي بيسمع كلامي..
وكلامه فعلا لبشني وخوفني..
وحسيت اني فوقت..ما هي الفوقه والندم مبيجوش الا لما اصب غيظي فيها..
انا والله ماعارفه ايه بيجرالي اول مابشوفها..بحس اني لا جسمي ولا لساني اللي بيتحرك ولا عقلي بيفكر اصلا
انا عارفه اني واكله وشاربه سحر من ناحيتها لحد ماعميت واثر علي جسمي واعصابي
بس انا رافضه العلاج..وزهدته..
بصيت لاخويا اللي بيلبس..عشان يخرج..
ـ رايح فين يا رامز..؟
ابتسملي ابتسامته الهاديه اللي بتشرح قلبي دايما
ماهو من جماله تحسه انه ملاك ماشي عالارض..كل ما اشوفه اسمي واصلي..عليه
واخد جمالها في كل حاجه..كانه حته منها..
وقالي..
رايح الشغل..
ـ فين؟
ـ برا اسكندريه،هسافر صد رد واجي..
ـ خلي بالك من نفسك يارامز..عشان خاطري..
ـ ياستي العمر واحد والرب واحد..
ـ بصيتله بخوف بقلبي وحسيت بقبضه بس مهتمتش..
واترددت بس سألته.
ـ هو انا عكيت الدنيا اوي معاها..؟
ـ ابتسم بحزن وحسيته هيعيط..
وقالي..
ـ انا لو مش عارف انك تعبانه وانه مش بإيدك..كنت كلتك بسناني..
انتي هنتيها اوي ياسما..
دي امك..والنبي قال
امك.ثم امك ثم امك..ثم ابيك..
ـ بكيت وحمدت ربنا ان جوزي مش موجود..ولا شافني..
للاسف كل حاجه بعملها بيغلطني
هو قوي الشخصيه وولادي كمان شكله..
يمكن كمان قاسي..
حاول معايا كتير بس انا برفض العلاج..دايما..
اخر مره روحت لشيخ قال..
اني اللي معمولها..معمول بالكبر عالعلاج ورفض الدوا والاطبا..
وان العمل بيتجددلها كل اول شهر هجري من نفسه..
مبقتش فارقه بقي..
كل حاجه في جسمي بدات تضعف
الا كرهي لامي..
دايما في زياده..ولا بينقص
فوقت من شرودي..علي ايد رامز..الحنينه..
اللي بتمسح دموعي..
ـ خلي بالك من نفسك ياسما..ومتتعصبيش عشان خاطري..
الدنيا دي فانيه ملهاش لازمه..وانتي اقوي من كدا..
صلحي امك ونضفي قلبك..
كلنا مظلومين في الدنيا..
حسيت بقبضه اكبر في قلبي..
ـ، انا مش هقدر يارامز..والله غصب عني..انتو مش حاسين بيا..
ـ كلنا حاسين بيكي وعارفين انك اكتر واحده اتظلمتي..
حتي جوزك حسن، عارف.وبيحبك..بس انتي عليكي حركات بتجننه..
وتخرجيه عن شعوره ..
واحد تاني كان عمل زي ابوكي وجري اتجوز تاني..
بس دا مستحملك ومستحمل تعبك..
فاحنا ايه..نخف شويه..ونقوي كدا..
ضعفك وخوفك دا..هو اللي مخليه يقوي عليكي ومخلي العيال ميخافوش منك..ويبجحوا فيكي..
دا لو عيل من ولادك شخط فيكي بتخافي
ـ غصب عني يارامز..انت عارف اني بخاف من اقل حاجه..
انا خايفه يارامز..من دعوه امك..
مد ايده ومسح دموعي وقالي..
ـ ياهبله خافي من دعوه حماتك..ومتخافيش من دعوه امك..
دا بيقولك دعوه الام في الكم..ودعوه الحما في السما..
ـ ضحكت وقولتله..اه وحماتي هرياني دعاوي..
ـ قرب وباس راسي..
وقالي..
خلي بالك ياسما..
خلي بالك اوي..اوعي تيجي علي حد..ولا تظلمي..
دا داين تدان..
والدنيا دواره..وبتلف..واللي بتعمله يابن ادم..لازم يتردلك ودعوته تتلف..
ـ خوفت وقلتله..يعني ايه؟
ـ يعني الديان لا ينام.. يا سما..
فوقي قبل فوات الاوان..
سابني ومشي..وحسيت بقبضه اقوي بقلبي..ونغزه
وكلام امي واخويا بيرن في وداني..
انكمشت علي روحي واستغطيت ومديت ايدي خدت علاجي رغم اني مبخدوش بالنهار
بس كنت محتاجه انفصل عن الواقع..
يمكن لما افوق..تخف حده الندم والالم اللي حاسه بيه..
من اللي عملته في امي..
دايما اعمل العمله واهرب للنوم..جسمي مبيستحملش..ولا فيا طاقه افضل اانب نفسي..
روحت في النوم وانا بفكر..
ومدرتش بنفسي..
غير علي صوت صرخه قويه..
بترن في وداني..
قومت اتسند اشوف في ايه وانا جسمي كله بيتنفض
وحاسه اني هقع من طولي في اي لحظه..
حسيت اعصابي انهارت..
وسمعتهم بيقولو، حاجه مكنتش اتوقعها ابدا في احلااامي..
حطيت ايدي علي ودني..اكتم صوتهم..
وانا مش مصدقه نفسي..
اكيد بيكدبو..كدابين..مش معقول..
مدرتش بنفسي..
ولا انا بعمل ايه؟
حسيت اني مش انا ديا، ولا دي حياتي
ولقيت نفسي بصرخ..صرخه قويه..
حسيت من قوتها هزت الكون كله..
ولفت راسي..
وحسيت بدوامه كبيره بتسحبني وايدين من بعيد بتشاورلي..
ايدين انا عرفاها وحفظاها كويس..
وبتقولي..
مع السلامه..هنتقابل تاني..
انهارت وروحت في دنيا تانيه..
دنيا لا حبيب ولا صاحب هيبقالي..
دنيا فانيه والرخيص فيها بقي اغلي من الغالي..
ااه يادنيا امتي هترأفي بحالي..
عشت تايهه مذبذبه..والكل ظالمني..
بيقولو ليه البكا..والضعف..وانا جانبي اللي ساندني..
ميعرفوش ان من بين كل الدنيا..متمنتش غير امي..
لا مال ولا جاه في الدنيا هاممني..
ااه ياوجع في القلب متأصل..
اه ياندمي انا والحسره..
دعيتي عليا ياامي..ومكنتش اعرف اني بدعوتك هتأثر
____________



3
صفعه الخذلان
كما تدين تدان..
أسما السيد..
ــــــــــــــــــــــــــ
"لو كانت الدنيا تدوم لأهلها لكان رسول الله حيًا وباقيًا، ولكنها تفنى ويفنى نعيمها وتبقى المعاصي والذنوب كما هي" ~ عليّ بن أبي طالب
ــــــــــــــــــــــ
ـ ساعات ربنا بيبتلينا عشان يختبرنا ويختبر صبرنا ..
يا نتحمل..يانجذع ونكفر..
ساعات من هول المصيبه وصدمتنا، وعظمتها بنبقي زي المدبوحين بنفرفر مش عارفين بنقول ايه؟
ولا لمين؟
مش حاسين غير ان الدنيا واقفه..وان برحيلهم موت معاهم، انت شخصيا
الموت مش شر..زي ما احنا فاكرين..
الموت راحه وامان واطمئنان..من حاجات كتير..
في الدنيا كنا هنعيشها..
الموت عظه..ليك وليا..بس اللي يتعظ..و يعرف
ان كلنا عالدنيا دي اتخلقنا لهدف...
انها نعمر ونبني..
مش نهدم ونخرب..
الميت بيموت ويرتاح..انما الحي..هو اللي بيعيش ميت علي وجه الدنيا..
الموت راحه للميت..وعذاب لاهله..واحبابه..
بيفضل وجع الفراق ينخر في قلبك..وعقلك..
مهما مرت سنين..بيفضل الغالي..غالي..
الموت حياه تانيه وحساب وعذاب وجنه ونار..
ملكين واقفين مستنينك..عشان يحاسبوك..
فهل احنا مستعدين لداا..؟
مستعدين للموت الفجأه وعدينا عدتنا..
ولا عايشين حياتنا يوم بيوم ومش حاسين..
وياتري هنتقبل صدمتنا بأدب..
ولا هنجزع وهنقول اشمعنا احنا..
الصبر عند الصدمه الاولي..
ـ فلنقل ان لله وان اليه راجعون..اللهم اجرني في مصيبتي واخلفلي خيرا منها..
ـ فيا مبتلين بالموت الفجأة..تأدبوا في بلاءكم..وتوجعوا بالحمد. فأنتم في حضرت قضاء الله وقدره..
واعلموا...ان
لو كانت الدنيا تدوم لاهلها. لكان رسول الله حيا. وباقيا
صلاه الله وسلامه عليك ياسيدي يارسول الله..
ــــــــــــــــــ
كنت في غيبوبه وصحيت علي صوت الجامع القريب
والشيخ بيخطب..
ودي كلماته اللي خرقت ودني..
وانا في غيبوبتي..
سمعتها كلمه..كلمه..
كنت بصارع عشان افوق..
بصارع نفسي وتهيؤاتي..
عماله اصرخ واصرخ..
سامعه صوت حواليا. وناس بتبكي وصويت كمان..
بس مش قادره اقوم..
كل حاجه حواليا حاسة بيها..بس مش قادره احرك الجبل اللي قاعد صدري..
بكيت..وبكيت..ومديت ايدي ليهم ينقذوني...
بس محدش عبرني ولا مد ايده ليا...
فجأه ظهرلي رامز..بيبتسم وبيضحكلي..
وبيشاورلي..بيقولي مع السلامه...
ضحكته كانت حلوه اوي زي عادته لما بيبتسم..
ووشه ابيض زي اللبن الحليب..
بكيت وقولتله..استني..
اوعي تسيبني..يارامز..
متكلمش..لاول مره اكلمه واهون عليه وميردش عليا
بس هو كان رايح للي احسن من الدنيا بحالها..
كان بيختفي عن عيوني شويه بشويه..
وانا بصرخ وببكي..
لحد ما غاب خالص وقتها قمت انفعلت وصرخت..
وفوقت..للي حواليا.
صوت مكبرات الصوت في كل مكان
من الجوامع.
بينادو علي اسمه..خلوني اتأكدت انه راح..
ايه دا..انا سمعت صح..؟
بينادو علي رامز..يبقي انا مكنتش بحلم..دا اخويا فعلا..
اللي مات...
فتحت عيوني بلهفه. وقمت انفذعت من مكاني..انصدمت باللي حواليا..
ستات كتير لابسه اسود..
وبيعيطو..بحرقه..ومنهم مرات ابويا..ال يعني بتحبه..
الناس دول انا عرفاهم..مبقتش قادره اجمع..
زقيتهم بكل قوتي وبقوه عشر ستات مش ست واحده
وعلطول مريضه..
وجريت..
مبقتش عارفه انا رايحه فين..
حتي مدرتش بنفسي انا لا بسه ولا مش لا بسه كل اللي عرفاه..اني في حاجه في قلبي بتقولي رامز راح..ومش راجع ابدا..
رامز دا ابني مش اخويا..
دا حياتي بحالها..مكافأه سنين الذل والقهر..
لاقيت دموعي نزله تجري وبنتي وولادي بيجرو ورايا..
وانا بجري بكل قوه.عشان الحقه..اودعه..واطل في وشه..
محدش يلومني فراق الضنا غالي اوي..
وهو ضنايا..
كان الشيخ صلي الجنازه خلاص وخارجينه..
لمحني جوزي وابويا الله لا يسامحه..هو السبب في فرقتنا وحرقه قلوبنا وقلبي..
ولمحتها وقفه بعيد (امي)
واقفه تندب وتبكي..وبتترجاهم تطل في وشه..وجارها كالعاده..
اكتر حد بكره في الدنيا اخويا من امي..
وكالعاده اول ما بشوفها جسمي بيتحول ويقلب ويقيد ناااار..
نار مبتنطفيش الا لما اسمم بدنها واهينها..
خرج النعش وجريت هي. بس قبل ما توصله..
صرخت فيها بعلو حسي..اوعي تقربيله..اوعي..
ـ دلوقت افتكرتيه..كنتي فين لما سيبتينا ورمتينا..
الكل وقف واتسمر..وجوزي جري يلحقني..
ـ اخرسي ياسما واسكتي..عيب كدا ميصحش..
يالا عاالبيت..
اكرام الميت دفنه..
بصتله بحرقه ودموعي نزلت تجري..
ـ رامز مات..مش كده.؟
طب خلوني اطل في وشه..
بصلي بحزن..
رامز ابننا احنا اللي ربينا وكبرنا..
وقالي...
ـ متعذبيهوش..روحي ياسما..قولي الله يرحمه..
لمحتهم بيقربوها من نعشه عشان تودعه وتطل في وشه..
ـ كل الناس فاكرينها بريئه..مظلومه..
اتجننت اكتر..وبقيت زي المجنونه..
ابعدوها..
ابعدي عنه..مشوها...انا اولي بيه..
انا اللي ربيت وكبرت..
الشيخ خرج واحتوي الموقف..وخلوني ودعته وودعته هي..
لو كنا في مكان تاني..ولولا الناس حاشتني عنها..
كنت موتها بإيدي..جسمي كان قايد نار..
ووجع الفراق.صعب..صعب اوي..
هنتها اوي يومها وجيت عليها..
ـالكل غلطني ونزلت من نظرهم..بس مش مشكله..
انا عاوزه اخويا يرجعلي..
بس اللي بيروح للاسف مبيرجعش..
سحبونا الناس للبيت..ومعاهم امي..اللي كانت في دنيا تانيه..
ومفيش علي لسانها..الا حسبي الله ونعم الوكيل..
ربنا ياذي المؤذي..دموعها كانت مغرقه وشها
بس مأثرتش فيا...
ـ ما انا مقولتلكوش..اخويا مات في حادثه عربيه..
بس اظاهر انها كانت مدبره وحد لعب في فرامل العربيه..
ودا اللي عرفناه بعد.كده..بس محدش قدر يتكلم..
لمحتهم بيسحبوها تخش عشان تاخد. عزا ابنها..هي للامانه مكنتش راضيه..وبصتلي بحزن..كام مره..
عشان اقولها ادخلي..
عارفه انها خايفه مني..
وخصوصا بعد اللي حصل وصدر مني انهارده..بس متهزتش..ولا
ـ اخويا مكنش بيحبها انا عارفه..ولو ظهر غير كده وكان بيبرها..فدا لانه كان متدين شويه..وبيرضيها وخايف يغضب ربنا فيها..
ـ بس بعد فراقه معدش شئ فارق..
لسه هتخطي برجليها باب البيت..
صرخت فيها بعلو حسي..
ـ اخرجي من هنا..اللي كان ليكي هنا..راح..
مش عاوزه اعرفك تاني..
ـ رفعت وشها من جلبيتها اللي دفناها فيه وبتبكي بحرقه..
وبصتلي بصه وجع..وكسره..
ودارت بعينها حواليها..
الستات بدأت تهمس..واللي شمتان فيها واللي بيضحك بغل..عليها زي مرات ابويا..
ورجعت بصتلي تاني..وبهدوء..سحبت نفسها ومشيت..
مشيت ورا جنازه رامز..
مشيت مكسوره ذليله..والسبب انا بنتها..
مرت الايام بطيئه..حزينه..ومن يوم موت رامز وانا حالتي ساءت..
حتي هي مبقتش اشوفها ولا عادت بتيجي..
وانا تعبت اكتر..وبقيت لا عارف اكل ولا انام..ورجعت مرات ابويا..تشتغل علينا اكتر..
وكل ما الايام تمر..ولادي الصبيان كانو بيقوا عليا اكتر واكتر..
بدأ يزهق مني ويهددني انه هيتجوز عليا..
كل حاجه كانت بتتسحب من تحت رجلي..وانا مش داريه..
مش بإرادتي..
اهملت جوزي واهتماماته..وانه راجل وله متطلبات..
حتي بدأت اعمل كل حاجه ممكن تدايقه..
طبعا مرات ابويا كان امنيه حياتها تتخلص مني..
عندها بنت عانس وامنيتها من زمان انها تجوزها جوزي..بس جوزي كان بيحبني واختارني ورفضها..
هي قاصده تموتني..تموتني بالوسواس اللي ركبني..والمس اللي مبهدلني..
وبتصرفاتي اللي مبقتش قادره افرق ان كانت صح ولا غلط..
حتي النوم مبنمش..واهملت بيتي وولادي..
فكره جوازه عليا كانت بتموتني و بتجنني..
حصري لجروب ولنا في الخيال حياه
تعبي وتعب اعصابي والسحر اللي هري جسمي ومعدتي..
خلاني بقيت بتصرف تصرفات عجيبه..
ـ اوقات الاقي نفسي مشتاقه لامي..
واوقات اقعد ادعي واشتمها..واتهمها ان هي السبب..
سمعت انها تعبانه اوي.
وطلبت اني ازورها واشوفها..
جوزي اتحايل عليا..وقالي حرام عليكي..روحلها..
بس انا مكنش فارق معايا..او يمكن كنت بدعي كدا..
ـ بس كان فيه شئ جوه قلبي بيوجعني
لما بيزول تأثير السحر..بحن ليها وببقي عاوزه اجري احضنها...
بس للاسف تأثيره لحظات بسيطه..وبيرجع الحال لسابق عهده..
ـ انا بنت جاحده..
ومشيت الايام.. وكل اللي اعرفه عنها.. انها مريضه..
ونفسها تشوفني بس.. كنت بصد.. اي حد بيوصلي اخبارها..
لحد ما في يوم..
رن الجرس..وفتحت الباب وانصدمت..
لما لقيته..قدامي في وشي..
ـــــــــــــــــــــــــــــــــ