صفقةعلىحياةأنثى البارت54

رواية
صفقة على حياة أنثى
البارت ال ٥٤




_____________________
و نكمل من حيث انتهينا البارت اللي فات عند هدير واهلها بعد ما استيقظوا من نومهم بعد ليلة تعد من ليالي زمان اللي قضوها مع بعض وبكوا وضحكوا فيها وهدير وامها رجعوا زي الاول
وفطروا والاب محسن قال انا هاطلع اعمل شوية اتصالات اعزم فيها كل معارفنا بقا
سهير: انتوا مش عملتوا كروت دعوة بأسماء اللي نعرفهم كلنا
محسن: ايوا بس فيهم ناس لازم برضوا اتصل بيهم بنفسي وانا من انشغالي نسيت اتصل بيهم من كام يوم بس الحمدلله اني افتكرت
سهير: طيب بس ما تطولش عشان عايزين ننزل نشترى شوية حاجات عشان كتب الكتاب احنا ما كناش عاملين حسابها
محسن: ساعة بالكتير واخلص ونخرج علطول
سهير: طيب اوكيه ثم قالت لهدير يبقى بعد ما نرجع انا وابوكي من السوق هنروح الكوافير يوم ما جم طلبوكي ما رضيتيش تروحي ومخلتنيش اعملك ميكاب حتى بيوم زي ده افرحي يابنتي صدقيني اليوم مش هيتعوض تاني وهتقولي ياريتني فرحت وانبسطت زي اي عروسة واعزمي صحباتك وافرحوا سوا
هدير: ما حضرتك عارفة يا ماما ماليش صحاب كتير انجي هي الصديقة الوحيدة القريبة مني
الام: طيب عزمتيها هي واهلها
هدير: بصراحة قولت لانجي بس نسيت اقول لمامتها وباباها
الام: معقوله يا هدير تنسي حاجة زي دي
هدير: يا ماما ما احنا عاملين كروت دعوة وبابا ومحمد وعصام عملوا قايمة بكل اسماء معارفنا وجيرانا واكيد راحلهم كروت
الام: بس دول اهل صديقة عمرك يا بنتي صحيح احنا مش صحبة اوي مع اهلها بس هي صديقتك الوحيدة
هدير: خلاص هاتصل بيهم دلوقتي واعزمهم
الام: طيب يا حبيبتي جهزي نفسك عشان لما ارجع نروح الكوافير عايزة اظبط نفسي انا كمان
محسن: نزل من فوق فسمعها وهي بتقول اظبط نفسي فقالها التظبيط ده للعروسة يا سهير
سهير: ليه وام العروسة مالهاش نفس يعني تظبط نفسها وتطلع حلوة وانيقة قدام الضيوف هاروح ولا عندك اعتراض
هدير: لا طبعا ليها ونص كمان ولا ايه يا بابا
الاب: اكيد طبعا لازم تتظبطي هو انا اقدر اعترض
الام: ايوا كدة اتظبط يالا بينا يا هدير بس اوعي تنسي تعزمي اهل انجي تمام
محسن: اهل انجي انا عزمتهم دلوقتي من ضمن معارفنا القريبين دول اهل صديقة عمرها ولا ايه
سهير: مسكته من خده وقالت يسلملي الي بيفهم في الأصول
محسن: تسلميلي يا سوسو يا حلوة انتي
هدير: احم احم نحن هنا
سهير: عملت نفسها متفاجأة اووو اي ده انتي لسه هنا
هدير: يا سلام قال يعني مش شايفاني
سهير: هههههه وفيها ايه يا بت لما اتغزل بجوزي حبيبي قدامكم عادي
هدير: طيب ربنا يسعدكم ويديم عليكم المحبة يارب
الاب والام: ويسعدك ويفرحك يا حبيبتي يارب
هدير: طيب يالا بقا عشان متتأخروش لسه يوم طويل
محسن: اللي بالحق يا سهير ما كنتي خليتي فاطمة تروح تجيب كل حاجة هي من السواق
سهير: لا البت فاطمة لسه صغيرة مش هتسلك لوحدها وبعدين هي عندها شغل كتير مع الخدم اللي جايين النهاردة
محسن: طيب انا ماشي يالا سلام يا دودو
هدير: سلام يا بابا ثم خرجوا وبعد حاولي النصف ساعة جاءت انجي وكانت هدير تجلس بالحديقة الخلفية للفيلا ففتحت فاطمة الباب وقالت اهلا وسهلا يا آنسة انجي اتفضلي
إنجي: ازيك يا فاطمة عاملة ايه
فاطمة: الحمدلله شكرا يا آنسة انجي
إنجي: اومال فين عروستنا
فاطمة: بالجنينة بره
إنجي: اومي متشكرة يا بطة
فاطمة: حضرتك هتشربي ايه
إنجي: كافيه لاتيه بس من غير سكر لو سمحتي
فاطمة: حاضر يا آنسة
وخرجت انجي لعند هدير بالجنينة وقالت صباح الخير يا دودو
هدير: صباح النور يا نوجا اتأخرتي ليه هي دي من النجمة بتاعتك
انجي: ما انتي عارفة انا بالإجازة بنام للظهر
هدير: عارفة بس النهاردة حنة صاحبة عمرك ينفع تتأخري عليا كده
انجي: ايه ده شايفاكي مروقة ووشك منورة شوية عن قبل
هدير: لاني سلمت الامور لله تمشي زي ما تمشي وبعدين احسن حاجة حصلت انه ماما رجعت معايا زي الأول ونمنا كلنا امبارح على الارض تخيلي
انجي: لا استني كده الموضوع عايزله قعدة مظبوطة وراحت انجي متربعة على الكرسي وقالتلها اشجيني بقا ازاي ده حصل
هدير: بصي امبارح ماما جات لعندي على الاوضة وقالت ممكن احكي معاكي وكدةه
انجي: وبعدين
هدير: قعدنا وحكينا ووحكتلها هدير كل حاجة من اولها لاخرها وحكتلها عن عصام وكلامه وحبه ليها وخوفه عليها ومحاولة اسعادها باي شكل
انجي: يا سلام كل ده طيب كويس والله انه مامتك رضيت عليكي وكمان سي عصام طلع عشقان وولهان على الاخر
هدير: بس بالرغم من كل ده الا اني لسه حاسة بحزن ومش قادرة ابطل تفكير بأحمد
إنجي: تسمعي مني وتنفذي كلامي ولا هتاخدي من الودن دي وتطلعي من الودن التانية
هدير: قولي هاسمعك
انجي: ربنا سبحانه له حكمة بكل حاجة بتحصل معنا سواء خير او شر وده امتحان ليكي انتي وأحمد ولازم تصبري عليه وتحمدي ربنا كمان لانه اكيد لما ترضي بقدر ربنا فهيعوضكم خير ومش لازم الخير ده بانكم تكونوا مع بعض
يمكن لو كان اهلك قبلوا باحمد على وضعه كان هيفضل محلك سر ويكتفي بوظيفة المعيد مثلا وما يفكرش انه يكبر ويبقى حاجة كبيرة
هدير: وانتي عرفتي منين انه احمد هيفكر كده
انجي: لانه في المرة الاولى اللي افترقتوا فيها كان مصمم على كدة لما يتخرج وهو قالي كده بنفسة
هدير: قالك ايه بالظبط
انجي: قالي انه لازم يعمل كل اللي يقدر عليه عشان يتفوق في دراسته ويشتغل ويثبت ذاته ويحقق كل احلامه بانه يكون اكبر مهندس بمصر والعالم العربي كله كمان واه لازم يطلع امه واخته من الفقر ده ويخليهم احسن ناس بالدنيا
هدير: ربنا يوفقه بحياته ويسعده بس كان نفسي
انجي قاطعتها ما بسش خلاص انسي انتي اتخطبتي وكتب كتابك النهاردة وفرحك بعد بكرة عيشي فرحتك بقا لانك مش هتعوضي يوم زي ده تاني وبعدين انا عايزة ارقص طول اليوم مع صحبتي مش مستعده تنكدي علينا الفرح مفهوم
هدير بابتسامة : كل همك ترقصي وبس
انجي: ايوا طبعا احنا عندنا كام هدير يعني لازم نفرح وننبسط وننسى الهم عشان ينسانا
هدير: تصدقي معاكي حق دي ليلة واحدة نسيت الحزن وحسيت براحة كبيرة اوي ونمت بحضن ماما زي زمان وانا صغيرة
انجي: شوفتي بقا يالا قومي نشغل شوية اغاني ونرقص شوية
هدير: لا خلينا قاعدين ماليش مزاج
إنجي: مش هاسيبك الا لما نهيص ونرقص شوية قومي يالا بطلي نكد بقا
هدير: بس مش هارقص هاصقفلك بس
انجي: ليه هتعملي فيها مكسوفة ياختي
هدير: لا بس بجد ماليش مزاج ارقص
انجي تصدقي انك فعلا وش نكد انا هنده على البنت فاطمة ترقص معايا شوية خليكي انتي بنكدك ثم ندهت عليها بنت يا فاطمة تعالي بسرعة ضروري
فاطمة جات بسرعة وقالت نعم يا آنسة انجي
انجي: بتعرفي ترقصي
فاطمة باستغراب : ايوا بس ليه حضرتك
انجي: ليه ايه تعالي ارقصي قصادي هنا يا بنتي
فاطمة بفرحة : بجد طيب ثواني اشغل الفون واجي
انجي: طيب بسرعة وراحت فاطمة جابت الفون وفتحوا الاغاني وبدأت انجي وفاطمة بالرقص وفضلوا يضحكوا ويهزروا ويرقصوا فمحمد سمع صوت الاغاني وهو بغرفته صعد ليكمل نومه بعد ما انهي فطاره لانه لم ينم جيدا بالليل وقال لامه ان توقظه حين تأتي فلما سمع صوت الاغاني نزل من غرفته وجد فاطمة وانجي تمسكان بهدير ويجعلانها ترقص عنوة عنها وهدير تضحك وتقول بطلوا هبل اعقلوا
انجي: يوووه على ام النكد اللي فيكي ده يا بنتي والله حرام عليكي اضحكي وفرفشي و خلي الدنيا تضحكلك
محمد: انجي معاها حق افرحي يا هدير وانسي الحزن تعالي نرقص انا وانتي سوا
هدير: طيب طالما هترقص معايا موافقة
فاطمة: اوقفت الرقص لما جاء محمد فقد خجلت منه وقامت داخلة المطبخ
محمد: بقا انتي يا مفعوصة يطلع منك ده كله
فاطمة: آسفة يا بيه بس الآنسة انجي هي اللي طلبت مني
محمد: ولا يهمك افرحي معاهم
فاطمة: وهي تنظر للارض بعد إذنكم هادخل المطبخ الهانم لو جات ولاقيتني معاكم هنا هتغضب عليا وانا مش حمل غضبها
هدير: طيب روحي يا فاطمة ماما غضبها وحش
فاطمة: بعد إذنكم ثم دخلت فاطمة للداخل ومحمد وهدير وانجي ظلوا يرقصون الي ان قال محمد شغلي حاجة رومانسي يا انجي خلينا نرقص انا والاميرة الحلوة
انجي: اوكيه وشغلت الاغنية
محمد: تسمحيلي بالرقصة دي يا اميرة دودو
هدير: ابتسمت وقالت اوكيه اسمحلك ثم وضعت يدها بيد اخيها وظلا يرقصان وهدير تنظر لاخيها وتبتسم ابتسامة تمتزج بالحزن ومحمد يقول لها افرحي يا دودو وسيبك من الابتسامة اللي كلها حزن دي فكري بالحاجات الحلوة وبس ماشي
هدير: ماشي
واستمرا بالرقص ما بين رومانسي وشعبي وانجي تقف تصفق لهما وترقص معهما حتى جاءا الام والاب ودخلا الفيلا والسائق ادخل الاشياء الي المطبخ فسهير سمعت صوت الموسيقى فقالت شكل الولاد بيرقصوا برة بالجنينة تعالى نرقص معاهم شوية
محسن: ماشي يالا وخرجا فوجدا الكل يرقص فقالا واحنا مالناش نصيب في الفرح والرقص ده
محمد وانجي معقول ده انتوا الخير والبركة
محمد: تعالوا يالا نرقص كلنا واهي تبقى زي بروفة للفرح الكبير بقا
محسن وسهير : تعالي يا دودو امسكي ايدنا انتي يانجي يالا خلونا نعمل حلقة ونرقص سوا
وظلوا يرقصوا اكتر من ساعة حتى تعب محسن وقال خلاص مش قادر
سهير: وانا كمان تعبت كملوا انتوا بقا ثم تذكرت الكوافير فقالت لا استنوا كدة هنتأخر على الكوفير يالا يا دودو خلينا نروح بدري عشان نرجع بدري
هدير: حاضر يا ماما يالا يا انجي هتيجي معايا اوكيه
انجي: اكيد جاية طبعا وانا اقدر اسيبك في يوم زي ده ولسه بقا يوم الفرح هتبقى فيه مفاجأت حلوة ليكي يا قمر انتا
هدير: ربنا يخليكي ليا يا اعز صديقة واخت بالدنيا انتي فعلا ونعم الاخت والصديقة بجد
انجي: بس بقا بلاش الكلام ده هتخليني ابكي وانا ما بحبش البكى
سهير: ربنا يخليكم لبعض يالا يا دودو اطلعي غيري هدومك على ما اغير انا كمان بس انجزوا بسرعة ماشي
هدير: حاضر هخلص بسرعة وبالفعل خلصت هدير بسرعة وخرجت هي وامها وانجي وذهبوا للكوافير
ومحسن ظل يشرف على المطبخ مع الطباخ والخدم الموجودين لحتى انهوا كل شيء مطلوب وهدير وسهير خلصوا ورجعوا البيت قبل وصول عصام واهله بساعة تقريبا وعند الساعة الرابعة جاءوا جميعا ومعهم المأذون وبعد الترحيب والسلامات جلسوا جميعا بالصالون وبعدها شربوا عصير بارد يهدأ من توتر الفرحة طبعا بهذه المناسبات واخرج المأذون دفتره وقال اين العروس فقال الاب موجودة يا شيخنا اطلع يا محمد نادي اختك
محمد: حاضر يا بابا وصعد محمد وقال يالا يا عروسة المأذون جه تحت هو والعريس واهله
انجي: خلاص نازلة اهي
محمد: قبل اخته بجبينها وقالها ربنا يتمملك فرحتك على خير يا قلبي
هدير: ربنا يسعدك يا حمادة عقبالك يا قلب اختك
محمد: آمين يارب
انجي: الواد مستعجل مش لما تخلص دراستك بالاول
محمد: عادي وايه اللي يمنع اكمل دراستي ومعايا المززة بتاعتي
انجي: طب يالا امسك العروسة وخلونا ننزل بدل ما طنط سهير تقلب علينا
محمد: اه والله معاكي حق دي متوترة اكتر من العروسة نفسها وامسك بذراع اخته ونزلوا لتحت عند الكل فعصام اول ما شافها نازلة قام وراح استقبلها فالكل ابتسم من موقف عصام فالمأذون قاله مستعجل ليه يا عريس ماهي العروسة كده كده جاية
فعصام قال :بس هدير مش عروسة عادية دي ملكة والملكات لازم نقف ونستقبلهم ولا ايه
المأذون قاله يا بختها بيك انبسطى يا عروسة السلطان عصام بيحبك حب ملوكي
بينما هدير اول ما سمعت الماذون خجلت جدا من كلامهم ونظرت لللارض ولم تتكلم
فالمأذون بدأ يسألها الاسئلة المعتادة في كتب الكتاب وهدير تجاوب وبعدها جلس عصام أمام الحج محسن ابو العروسة وقبل ان يضع عصام يده بيد محسن بدأ المأذون بالدعاء اولا فالكل أمن وراه ثم بعد ذالك وضع محسن وعصام يديهما بيد بعض وبدأ المأذون بالقول المعتاد في كتب الكتاب وبعد ذالك دعا لهما ايضا والكل أمن وراه فقام عصام وامسك بيد هدير وقبلها ثم قبلها من جبينها ثم جلسا بجوار بعضمها فامال عليها وهمس لها باذنها عارف انك خجلانه اوي اوي دلوقتي عشان كده مش هاخجلك اكتر واحضنك بس بعد بكرة بالكوافير وانا جاي اخدك هعوض اللحظة دي ماليش دعوة أنا
هدير بخجل وكسوف شديد جدا : طيب بس بلاش الهمس ده دلوقتي الكل بيبص علينا
عصام: طيب بس قبل ما أروح هاخد حتة حلويات ماشي
هدير: حتة حلويات ايه ده هي دي عادة في لبنان يعني
عصام: بضحكة مكتومة عشان محدش يسمعه قالها لا لما اخدها هتعرفي
هدير ببرأة قالت : طيب اوكيه
عصام: يعني موافقة اخد حتة حلويات
هدير: عادي خدها مافيش مشكلة الحلويات كتير
عصام: نظر لها نظرة اربكتها اكثر وقال خلاص ماليش دعوة انتي وافقتي ومافيش رجوع عن الموافقة دي
فهدير راحت عرفت من نظراته لها ولشفتيها انه يريد قبلة فقالت له انتا شكل كلمة حتة حلويات دي لحاجة تانية مش كده
عصام: امممم اللي فهمتيه بالظبط
هدير: لا طبعا مش هيحصل لما ابقى ببيتك ابقى خد اللي انتا عايزه
عصام: يعنى كده
هدير: ايوا كده
فالحج علي و زوجته زينب هانم قالا شو يا ولاد هادا الحديث الجانبي مو راح يخلص بدنا نفرح ونرقص شوي
عصام معاكم حق يالا قوموا خلونا نرقص كلنا وقام الكل ورقصوا وفرحوا وغنوا
__________________
اما عند احمد وبعد يوم طويل مابين انهاء اجراءات التجنيد العسكري وما بين الورشة وشغلها المتعب والتعب النفسى فوق كل شيء بالطبع و رجع احمد لبيته تعبان ومجهد واول ما فتح الباب ودخل وجد امه واخته بيتفرجوا على التلفزيون فقال مساء الخير ثم القى بنفسه على الكنبة وقال كان يوم متعب جدا
الام وسمر : مساء النور يا حبيبي
سمر: دقايق والاكل يكون جاهز
احمد: لا ماليش نفس اكلت متأخر هارتاح شوية واقوم اخد دوش دافي يخلي جسمى يفك شوية انا من الصبح واقف على رجليا من مكتب التجنيد للورشة لما حاسس انه رجليا ورمت من كتر الوقفة
الام: سلامتك يا حبيبي قومي يا سمر هاتي شوية مية سخنة بملح لاخوكي يحط رجليه فيها هتسحب التعب اللي برجليك علطول يا قلبي
سمر: ايه يا ماما شغل الافلام القديمة بتاعت سي السيد دي ما يقوم ياخد دوش سخن وهو هيفك ويبقى كويس
الام: يباي عليكي بنت خلاص انا هاقوم اجيب لابني حبيبي
احمد: ما اتحرمش منك يا ماما بس مالوش داعي انا هاقوم اخد دوش وابقى كويس تسلميلي يارب ثم نظر لسمر وقالها مش عايز منك حاجة يا سماوية
سمر: انا سماوية يا ابيه طيب مش عاملة شاي بقا
احمد: عنك ما عملتي ياختي هاعمله انا خليكي اتفرجي على العبط اللي بتسمعيه ده
سمر: ده عبط ده مسلسل هندي رومانسي موت والبطل مات وحبيبته بتبكي عليه مشهد يقطع القلب
احمد: ههههههههه وطبعا هيرجع يعيش تاني صح
قومي يابت حطي الشاي على النار وسيبك من الهبل ده اتفرجي على حاجة تفيدك لما تدخلي طب بدل العالم الهبلة دي
سمر: يوووه بقا يا ابيه حتى المسلسل اللي بحبه مش عارفة اتهنى بيه منك ومن غلاستك
احمد: قومي يابت قامت قيامتك بلا هندي بلا تركي ماهي المسلسلات دي اللي لحست مخكم
سمر: مالها المسلسلات الهندي ولا التركي بتدينا امل انه لسه في حب حقيقي على الاقل احسن من الواقع الزفت اللي بنعيشه
احمد وقد احس بانه فعلا معاها حق في كلامها فقال بصوت مهموم والله معاكي حق انا هاقوم اخد دوش
سمر احست بانه اخوها اتأثر من كلامها فقالت : وانا هادخل اعمل احلى شاي لاجدع حمادة بالدنيا ومعاه احلى كرواسون بالجبنة وعليها حبة البركة كمان
احمد: احلى ايه ياختي
سمر: كرواسون يا ابيه ما تعرفوش
احمد: ايه الكرواسون
سمر: ههههه لما تشوفه هتعرفه
احمد: طيب ياختى هنشوف البتاعة دي طعمها ايه
الام: طالما هي اللي عامله يبقى طعمه حلو ما تقلقش
احمد: ما انا عارف انها مش فالحة غير في الحاجات دي لكن الطبيخ بتعك فيه
سمر: انا بعك يا ابيه طيب الله يسامحك
______________
و نرجع عند هدير مرة اخرى وبعد انتهاء كتب الكتاب والحنة وانتهت السهرة وذهاب كل المعازيم وبعد ذالك استعد عصام واهله للذهاب وخرجوا معهم هدير واهلها لتوديعهم
علي وزينب: كانت اكتير سهرة بتجنن اللي يسعدكم يارب
محسن وسهير: آمين يارب
بينما عصام سلم على هدير وقالها تصبحي على خير يا قلبي
هدير: وانتا من اهل الخير
ثم ركب عصام واهله السيارة وذهبوا وبعدها دخل الكل الي الداخل وجلسوا وقالت سهير ياااه كان يوم طويل بشكل
محسن: احنا شكلنا عجزنا ما بقيناش زي زمان
سهير: عجزت ايه لا يا حبيبي انتا اللي عجزت انا لسه شباب وبصحتى
محسن: اكيد لسه شابة وزي القمر كمان يا سوسو يا قمري انتي
محمد وهدير: ايه الغزل العفيف ده يا سي بابا
محسن: اومال ايه مش حبيبتي وعشرة عمري
سهير: ربنا يخليك يا محاميحو يا حبيبي
محسن: ويخليكي ليا يا سوسو يا عمري انتي
محمد: لأ لأ ده ايه الرومانسية دي كلها هتتحسدوا بالليل كده
سهير: الله اكبر قول ما شاء الله يا واد
محمد: ما تخافيش مش هيحسدوكي ربنا يديم عليكم الرواقان والرومانسية يارب
هدير: طيب انا طالعة اوضتي اغير وارتاح لاني بجد هلكانة
سهير ومحسن: طيب يا حبيبتي تصبحي على خير
هدير: وانتوا من اهل الخير
________________
ويمر الليل ويأتي الصباح وتستيقظ اميرتنا الجميلة هدير على صوت امها وهي توقظها قومي بقا يا عروسة ده كله نوم الساعة قربت على تسعة
هدير بصوت مليئ بالخمول : سيبيني انام كمان شوية يا ماما حاسة جسمى مكسر
الام: لأ نوم ايه تاني ده النهاردة يوم مهم لازم تتجهزي كويس وحمام مغربي بقا وايه هتبقى ملكة منورة بعده علطول
هدير: يا ماما حمام مغربي ايه انا مش محتاجاه اصلا الحمد لله
الام: لأ لازم تعمليه حتى لو مش محتاجاه برضه هيزود جمالك اكتر ياقلبي
هدير: لازم يعني
الام: ايوا لازم
هدير: بس مش هاروح كوافير انا اللي هاعمله لنفسي
الام: طيب بس عارفة بيتعمل ازاي
هدير: ايوا يا ماما عارفة انا اصلا باعمله كل شهر من سنين يعني مش هيفرق وعشان اريحك هاعمله انتي تؤمري يا سوسو
الام: ايوا كده انا عارفة انك بتعمليه بس ده المرادي مختلفة المفروض كنتي تعمليه اربع خمس مرات في الاسبوعين اللي فاتوا
هدير: عارفة يا ماما بس ده لو انا مش متعودة عليه لكن انا باعمله علطول
الام: طيب يالا قومي يا قلبي عشان نفطر وبعدين نشوف اللي ورانا
هدير: حاضر
________________
و نرجع عند احمد استيقظ من نومه قبل ساعة ثم توضأ وصلي وبدل ثيابه وخرج الي الصالة :صباح الخير يا ماما
الام: صباح النور تعالى يا حبيبي افطر عشان تلحق وقتك بدري
احمد: حاضر يا ماما جيت اهو
الام: هتجيب شهادة الاعفا النهاردة ان شاء الله ولا هتروح الجامعة الاول
احمد: هاروح اجيب شهادة الاعفا بالاول وبعدين هاروح اوديها الجامعة عشان تتحط بالملف وربنا يسهل وقرار التعيين يطلع بسرعة
الام: يعني القرار لما يطلع هتستلم شغلك علطول
احمد: بإذن الله يا ماما لو ربنا كرمني هستلم الشغل مع اول يوم دراسة بس مرتب المعيد رغم انه كويس بس مش كبير وخاصة في الغلاء اللي احنا فيه ده يعني لازم كمان الاقى شغل اضافي معاه عشان اقدر اكون نفسي وانقلكم من الفقر والهم ده لعيشة افضل واحسن ان شاء الله
الام: ربنا يكرمك يابني ويوسع في رزقك ويرفع شأنك ويجعلك في كل خطوة سلامة ويسعدك ويفرحك ويبعد عنك ولاد الحرام وبنات الحرام ويحفظك من كل شر يا احمد يابن بطني قادر يا كريم
احمد: آمين يارب ايوا انا محتاج دعواتك دي اوي اوي الايام دي بالتحديد يا ماما ربنا ما يحرمني منك ولا من دعواتك يارب
سمر: وانا يا ست ماما ماليش نصيب في الدعوات الحلوة دي ولا ابيه احمد ابن بطنك وانا بنت الجيران
احمد: يالهوي على الحقد هتموتي من الغيرة عشان ماما بتدعيلي
الام: بادعيلك يا حبيبتي بكل وقت من غير ما تطلبي انتي كمان ضي عيوني زي اخوكي انا ليا مين غيركم بالدنيا ربنا يسعدكم ويريح قلوبكم ويبعد عنكم كل سوء ومكروه يارب ويكرمك يا سمارة واشوفك دكتورة اد الدنيا
سمر: ايوا كدة اهي دي الدعوة الحلوة ادعيهالي علطول ما تخليش لسانك يبطل وانتي صاحية وانتي نايمة ادعيهالي
الام: هههه طيب وانا صاحية ماشي انما وانا نايمة ازاي دي
سمر: عادي وانتي بتحلمي هو الواحد مش بيحلم وهو نايم ابقى افتكريني في الحلم وادعيلي
الام واحمد ضحكوا على كلام سمر وقالوا ربنا يكملك بعقلك هههههه
سمر: بتتريقوا عليا الله يسامحكم طيب انا مقموصة هاه
احمد: راح ماسك خدودها وقالها بطلي شغل العيال ده يا قماصة
سمر: بضحكة قماصة بس عسل
احمد: شرب شايه وقال انا ماشي بقا سلام عليكم
الام وسمر: مع السلامة في رعاية الله
________________
وذهب احمد الي مكتب التجنيد واستلم شهادة الاعفاء ثم ذهب للجامعة لكي يكمل اوراق تعينه بوظيفة معيد
وبعد ان انهي دراسته رجع الي مصر فاتصل باحمد لانه صديقه من ايام اعدادي وثانوي لكنه سافر خارج مصر ليكمل دارسته الجامعية بأوروبا واتى الي مصر في زيارة قبل يوم واحد فاتصل على احمد لكي يتقابلا
احمد: الوو
عادل: ازيك يا ابو حميد
احمد: عادل ازيك اي الرقم ده هو انتا بمصر ولا ايه
عادل: ايوا جيت إمبارح بس
احمد: ولسه فاكر تتصل عليا دلوقتي ما كانش العشم يا دولا
عادل: لا والله انا وصلت بالليل ويادوب لسه صاحي دلوقتي هانزل افطر اهو فقولت اتصل بيك نتقابل ونقعد ندردش شوية زي زمان
احمد: تمام انا جاي من الجامعة دلوقتي نتقابل فين
عادل: اقولك تعالى عندي بالبيت عشان ماما ما تزعلش وتقولي خرجت من اول يوم جيت فيه بدل ما تقعد معانا وانتا عارف الامهات بقا
احمد: طيب ساعة واكون عندك
عادل: تمام هاستناك
________________
و نرجع تاني عند الست هدير وهي تتجهز للعرس وجاءت صديقتها انجي لكي تقضي معها اليوم الذي قبل العرس
انجي: صباح الخير يا طنط
سهير: صباح النور يا بنتي
انجي: اومال هدير فين
سهير: فوق باوضتها بتاخد شاور تعالي اقعدي هي ربع ساعة ونازلة تشربي ايه
انجي: لأ ميرسي هاستنى هدير لما تنزل
سهير: اوكيه يا حبيبتي ماما وبابا عاملين ايه
انجي: الحمد لله بخير بيسلموا عليكم
سهير: يسلموا يارب
انجي : الله يسلمك يا طنط
سهير: ما تنسيش تخليهم يجوا بكرة مش هوصيكي
انجي : من عينيا يا طنط
سهير : تسلم عيونك يا قلب طنط
_________________
ونرجع تاني عند عمنااحمد مرة اخرى بعد ان وصل الى بيت صديقه عادل
عادل: حمادة والله وليك وحشه يا ابو حميد
احمد: وانتا والله يا صاحبي بس انا زعلان منك
عادل: ليه بس وانا عملت ايه
احمد: ما كنتش بتتصل بيا غير كل فين وفين ويادوب دقيقتين ومشغول علطول
عادل: والله غصب عنى يا صاحبي ما انتا عارف الدراسة وكمان شغل بابا اللي ما بيخلصش كنت ما بين انهاء شغل ل بابا وما بين الجامعة والدراسة
احمد: الله يكون بالعون ربنا يوفقك بس قولي هتعمل ايه بعد ما خلصت جامعة
عادل: اديني رجعت عشان استلم الشغل مع بابا وانتا هتعمل ايه
احمد: انا قدمت على وظيفة معيد بالجامعة
ويارب يقبلوني فيها
عادل: بس مرتب الجامعة ضعيف ومش هيكفي تفتح بيه بيت وانتا كنت قولتلي إنك ناوي تخطب
احمد بتنهيدة وكسرة : لأ ما خلاص الموضوع انتهى قبل ما يبتدي حتى
عادل: ازاي احكيلي
احمد: الموضوع طويل ومحتاج قعدة طويلة
عادل: احكي وادي احنا قاعدين مع بعض
احمد: طيب دقيقة اتصل على عمي حمدي اقوله اني هتأخر شوية وابقى اروح فترة مسائية بقا النهاردة واتصل بماما اقولها عشان ما تقلقش عليا
عادل: طيب وانا هخليهم يعملولنا قهوة عشان نقعد على رواقة كده وتحكي كل حاجة بالتفصيل تمام
احمد: تمام
وبعد ان اتصل احمد بامه وقالها انه عند عادل صديقه وهيروح على الشغل علطول من عنده
الام: طيب يا حبيبي ابقى سلملي عليه اوي
احمد: يوصل إن شاء الله يا ماما ثم اغلق مع امه واتصل بعدها بالحج حمدي وقاله انه في زيارة لصديقه وهيتأخر شوية
الحج حمدي: ولا يهمك يابني خود وقتك مع صاحبك وتعالى
احمد: تسلم يا عمي سلام عليكم
الحج حمدي: و عليكم السلام يابني
عادل بعد ما الخادمة جاءت بالقهوة قالها :حطيها بره بالجنينة وقال لاحمد تعالى نقعد بره ونتكلم براحتنا
احمد: تمام
عادل: بعد ما قعدوا بره قاله احكيلي بقا ايه حكياتك بالظبط وايه اللي حصل معاك في الكام سنه دول ؟؟
احمد: بص يا سيدي وبدأ احمد بسرد كل ما مر به خلال فترة دراسته بالجامعة الي ان وصل لحكايته مع هدير وبدأ يظهر عليه الحزن والألم ثم اكمل الي نهاية قصته مع هدير ثم قال بس هي دي كل حاجة
عادل: ولا يهمك كل دي اختبارت من ربنا وبعدين بعد اللي حكيته ده شغل الجامعة ما يعملكش حاجة عشان تثبت نفسك قدام الكل ويبقالك مكانة كبيرة في عالم رجال الاعمال وده مش هتعرف تحققه غير من خلال شغلك بشركة كبيرة تقدر تثبت فيها كل شطارتك وذكاءك في مجال المعمار وانا عارف وواثق انك هتقدر
احمد: معاك حق بس فين الشركة اللي هتقبل بواحد لسه متخرج جديد الكل هيطلبوا شهادات خبرة اقل حاجة خمس سنين
عادل: البعيد اعمى اومال بابا شركته راحت فين ولا هي مش شركة كبيرة في مجال المقاولات بنبيع بطاطا يعني
احمد: هههه لأ مش قصدي ما جاش ببالي بس فعلا ابوك هيرضى يشغل معاه واحد لسه متخرج جديد
عادل: طيب مانا هاشتغل معاه وانا لسه متخرج برضه
احمد: انتا بتهزر انتا ابنه حتى لو لسه ما تخرجتش عادي تشتغل معاه انما انا غريب
عادل: بطل هبل انتا صديقي واخويا وبعدين بابا بيحبك جدا ودايما بيشكر فيك وفي شطارتك وطموحك واخلاقك انا هكلمه النهاردة وان شاء الله بكرة تيجي تستلم الشغل
احمد: انتا بتتكلم جد يا عادل
عادل: ايوا طبعا دي هتبقى بالنسبالي فرصة نشتغل سوا ونرجع صحبه زي زمان ولا ايه
احمد: بصراحة مش عارف اقولك ايه ولا اشكرك ازاي
عادل: ماتقولش حاجة ولا تتشكرني انتا اخويا اقولك استنى انا هاتصل على بابا واقوله دلوقتي ونشوف ايه الاوراق المطلوبه للشغل وبالفعل اتصل عادل على ابوه وحكاله المطلوب فلاب قاله على المطلوب وقاله اذا كان احمد يبقى من غير اي توصية احمد يجي يشتغل الشركة شركته طبعا
عادل: تسلم يا اعظم اب بالدنيا
الاب: هو احمد معاك دلوقتي
عادل: ايوا
الاب: طيب سلملي عليه كتير
عادل لاحمد : بابا بيسلم عليك
احمد: الله يسلمه يارب سلملي عليه
عادل لابوه : احمد بيسلم عليك
الاب: يسلم يارب خلاص قوله يجي بكرة على الشركة ويعتبر نفسه اشتغل من دلوقتي كمان
احمد: ربنا يخليك ياعمي متشكرك جدا جدا لحضرتك
الاب: على ايه يابني انتا زي عادل ابني ......

يتبع .
_________________
# بقلمي

عمر يحيى