و في المساء كانت تجلس ماليكة في شرفة غرفتها و هي تتصفح اللاب توب و تجد هاتفها يرن ب رقم ريهام صديقتها ل تجيب عليها ب لهفة و هي تقول لها

ماليكة : ياااه ، بقى خبيرة البنوك بتكلمني بنفسها ؟ انا مش مصدقة نفسي بصراحة !!
ريهام : يا سلااام ! على فكرة أنا مكلماكي كذا مرة بس انتي اللي مكنتيش بتردي عليا
ماليكة : بجد ؟! والله انا مسمعتش اي حاجة خالص ، اصلي كنت بفكر بصراحة
ريهام : و انتي بقى بنت حلال انا كمان كنت بفكر بس كنت بفكر فيكي انتي
ماليكة ب استغراب : و ده ليه بقى ؟!
ريهام : عشان عايزاكي بكرة تيجي لي البنك علشان هما فاتحين باب التقديم في الفروع كلها ل حديثي التخرج و المرتب 5000 جنيه ده غير العمولات و الحبشتكانات و طبعا انتي لو قدمتي هتتقبلي على طول
ماليكة : على طول ايه بس ده انا جايبة جيد ، و فيه الف واحدة غيري جايبة جيد جدا و ممتاز كمان
ريهام : ااه ، لا ناصحة ياختي ، بس الالف واحدة دول ميعرفوش أن باب التقديم اتفتح .. عيب عليكي يا بنتي الموضوع ده مني ليكي انتي بس ، اصلا الإعلان نازل في الفرع عندنا احنا بس و عندنا محتاجين ناس كتير جدا تتعين ، انتي بس كده هتقدمي و هيقبلوكي و بعد كده نقضيها بقى و نروح و نييجي مع بعض براحتنا و نعيش بقى
ماليكة : انا بس نفسي اعرف حضرتك جايبة الثقة دي كلها منين ؟ و كمان هتعين معاكي في نفس الفرع
ريهام : عيب عليك يا ابو صلاح هو انا بتاع كشري ، انتي يا حبيبتي ب شوية السحر بتوعك كده و الهوكس بوكس هتتقبلي على طول
ماليكة تنفعل : انا مليون مرة قولت لك متتكلميش في الموضوع ده خالص ، انا لو نجحت هنجح ب مجهودي
ريهام : خلاص خلاص انا اسفة يا ستي ، انا مش قصدي مش قصدي السحر اللي انتي قصدك عليه ، انا قصدي سحر جمالك و طلعتك البهية و طلتك اللي هي .. المهم بس انا عايزاكي تيجي لي البنك بكرة الساعة 10 الصبح بالظبط و تبقي كده لابسة فورمال و تقدمي على الشغلانة و إن شاء الله كده يقبلوكي
ماليكة : طيب هشوف كده لو صحيت و لاقيت نفسي ليا مزاج هعدي عليكي
ريهام : طيب انا هقفل معاكي بقى عشان انام عشان لازم انام بدري و اصحى بدري ، و انتي كمان نامي بدري .. ياللا تصبحي على خير
ماليكة : ياللا باي

بعد انتهاء المكالمة تنهض ريهام ل تتجه نحو غرفتها و لكن يوقفها صوت في الخلف و هو يقول لها

الصوت : و انتي من اهله يا ست هانم
ريهام تلتفت للخلف و تبتسم : سمورة ، سمورة الأمورة .. الاطفال اللي زيك لازم يناموا بدري ، نغسل سنانا بقى و رجلينا قبل ما ننام ياللا
سمر : و انام بدري ليه ؟ انا لا شغلة ولا مشغلة و ماليش واحدة صحبتي تجيب لي شغل
ريهام : يا بت انتي متخرجة مبقالكيش شهرين تلاتة يعني اللي زيك كده الفروض ما يصدقوا و يقعدوا كده و يستمتعوا ب اجازاتهم يعني يصحوا براحتهم و يناموا براحتهم .. لكن انتي محسساني انك متخرجة بقالك 10 سنين ، و بعدين معلش كده ثانية واحدة ، هو انتي عايزاني اشغلك عندي في البنك ايه بالظبط ؟! هو انتي ناسية انك خريجة علوم قسم فيزيا نووية يعني المفروض تشتغلي عندنا في البنك ايه مديرة قسم المتفجرات مثلا
سمر : انا نفسي انطلق كده و اعيش حياتك
ريهام : طيب ما تنطلقي كده و تعيشي حياتك و بعدين كل الحكاية انك قاعدة معايا و مونساني عشان ماما و بابا راحوا عاشوا في البلد يعني بنونس بعض مش اكتر
سمر : و ياريته بيطمر يا هانم ، اختي الكبيرة كده اسم على الفاضي مش بتعملي لي اي حاجة مفيدة
ريهام : اااه رغي كتير ، انا داخلة انام عشان انا هصحى بدري و انتي بتستهلكي وقت و بتحرقي طاقة كتير
سمر : ما انتي كنتي مصحصحة يا ست ريهام دلوقتي
ريهام : اااه بقى كده ، طب ما تقولي انك غيرانة يا حبيبتي من الاول
سمر : اصل انا عمري ما شوفتك بتعملي كده معايا
ريهام : يمكن عشان انتي اختي مثلا ف مش محتاجة اني اوري لك انا بحبك قد ايه
سمر : لأ انتي بتعتبري ماليكة هي اللي كأنها اختك
ريهام : ما هي ماليكة فعلا اختي ، أو مش اختي مش في مكانة حضرتك طبعا ولا في عظمتك يعني بس اللي هي زي .. بقول لك ايه بقى متوقعينيش في غلط على المسا انا هدخل انام
سمر : نامي يا حلوة بس انا بقول لك بقى أن ماليكة دي انا مش برتاح لها خالص ولا هي ولا أهلها
ريهام : ماشي ياختي انتي مبترتاحيش ل حد خالص اصلا انتي خليكي مع الموبايل بس كده ربنا يهديكي يا ماما ، ياللا تصبحي على خير ..

و في صباح اليوم التالي في منزل ماليكة كانت تجلس فاتن على مائدة الطعام و تتناول الافطار ل تخرج عليها ماليكة من غرفتها و هي مرتدية ثيابها الفورمال كما طلبت منها ريهام و كانت غاية في الجمال و بمجرد رؤية فاتن لها قالت لها

فاتن : ايه ده كله ايه ده كله ؟ ده ايه النشاط و الحلوة دي كلها ؟!
ماليكة تجلس ب ابتسامة : اصل انا عندي مقابلة شغل
فاتن ب فرحة : بجد ؟! طيب ربنا يوفقك يارب
ماليكة : يارب يا ماما
فاتن : و مين بقى اللي اقنعك انك تدوري على شغل ؟ اوعي تقولي لي أن اللي عمل العملة العظيمة دي الكابتن صافي جدتك !
ماليكة : لا لو على صافي ف هي عايزاني اشتغل ب السحر بتاعي
فاتن : اوعي تسمعي كلامها دي عايزة تبوظ حياتك زي ما بوظت لي حياتي بالظبط
ماليكة : مش هي يا ماما اللي بوظت لك حياتك ، لأن كده كده بابا كان مصيره هيعرف موضوع السحر ده ب اي شكل
فاتن : بس برضه منقدرش ننسى أن هي اللي قالت له
ماليكة : ماشي هي اللي قالت له بس مش هي اللي طلبت منه أنه يخاف مننا و يمشي و يسيبنا ، بابا لو مكنش عايز يمشي مكانش مشي يا ماما
فاتن : هو انا مش قولت لك مليون مرة أن أنا مش بحب اتكلم في الموضوع ده و أن الموضوع ده اتقفل خلاص من زمان
ماليكة : طب انا مالي انا ما انتي اللي عمالة تفتحي المواضيع و عمالة تسألي الأسئلة كلها
فاتن : مش انتي اللي عمالة تجيبي في سيرة ابوكي و بعدين انا سيرة جدتك دي نفسها بتقفلني اساسا و بتخنقني
ماليكة : و مالها بس تيتا ؟ تيتا يعني مش بتعمل حاجة عيب ولا حرام دي حتى بتساعد الناس و بتخليهم يحافظوا على رشاقتهم و مظهرهم
فاتن : طب بصي بقى ، انتي لو هتسمعي كلامها يبقى مفيش شغل اصلا
ماليكة : مش هي مش هي اللي جيبالي الشغل ، دي ريهام
فاتن : ريهام ؟!
ماليكة : اممم
فاتن : ربنا يكرمها يارب
ماليكة : يارب يا ماما ، و يارب يقبلوني .. هو انتي حاسة أن هما هيقبلوني ؟
فاتن : اه يا حبيبتي
ماليكة ب استياء : ولا مش هيقبلوني ؟
فاتن : لا لا هيقبلوكي يا حبيبتي إن شاء الله
ماليكة : طيب ماشي ، انا همشي بقى عشان متأخرش
فاتن : ماشي يا حبيبتي ربنا معاكي يارب و يكرمك و يفتحها في وشك يا ماليكة يا بنت فاتن و صالح ..