تشرق شمس الصباح لتنثر أشعتها الذهبية لينتشر الضوء بالعالم كله معلنا عن  بدايات جديده نعيشها ونهايات لظلام ولي ،وتبدأ العصافير يعلو زقزقتها مع بداية نور الصباح واقفة علي سور شرفة العروس وكأنها معلنة خبر زفاف اليوم ،فاليوم هو زفاف يمني (هي فتاة متوسطة الجمال يزينها ويميزها عيونها الواسعة كعيون المُها ذات اللون العسلي وشفاها الصغيرة ذو اللون الوردي وشعرها الناعم ذو اللون الكستنائي الذي يصل الي منتصف  ظهرها  كما تتمتع بقوام ممشوق ) كانت ترقد عروستنا تتوسط الفراش وتنام بكل أريحية ولما لا فاليوم هو يوم عُرسها مِن مَن تمنته واختارته لتكمل معه مسيرة حياتها. كم أحبته ورأت فيه فارس أحلامها.
دخلت الام  واسمها سعيدة لغرفة يمني لايقاظها فاليوم به مهام كثيرة ويجب الاستيقاظ مبكرا. فتحت سعيدة ستائر الغرفة لتدخل أشعة الشمس الذهبية لتنير غرفة يمني فتداعب اشعة الشمس جفونها ثم أطلقت سعيده ما يسمي بالزغروطة لتستيقظ يمني بابتسامة تنير وجهها وهبطت من على مخدعها.
يمني بابتسامة وسعادة/ صباح الخير يا ماما.
سعيدة بفرحة عارمة/ يا صباح الفل وصباح الهنا والسعادة الف الف مبروووك يا قمر عيشت وشفتك عروسة يا بنتي.
ثم طوقتها بيدها في أحضانها وربتت على ظهرها وقبلتها بقبلات متتالية ،ودموع الفرح تنساب من عيونها.
يمني وهي بحضن والدتها/ مالك بس يا ماما بتعيطي ليه دلوقتي؟ ده النهاردة فرحي يا حبيبتي!
سعيدة تمسح دموعها من على وجنتيها بكفها / ابدا يا حبيبتي ده دموع الفرح مش مصدقة نفسي اني شايفاكي عروسة في يوم جوازك.
ثم رفعت يدها للسماء ودعت/ ربنا يتمملك على خير يا رب وتعيشي وتتهني يا بنت بطني.
يمني بترديد خلفها/ اللهم امين يا حبيبتي ويخليكي ليا انتي وبابا واخواتي خلاص بقي يا ماما لحسن والله اعيط انا اصلا مش عارفه ازاي هسيبكم واعيش بعيد عنكم.
ثم ترقرقت الدموع بعيون يمني وامسكت بايدي والدتها/ والنبي يا ماما ابقوا زوروني كتير ومتتاخروش عليا.
وارتمت بأحضان والدتها التي أخذت تربت على ظهرها وابتسمت قائلة/ يا بت يا بكاشه بقي مش عارفه هعيش ازاي يا ماما بعيد عنكم وانت بتعدي الساعات والدقايق اللي هتجمعك بعبدالله، عليا انا الكلام ده برضو.
خجلت يمني ونظرت للاسفل قائله/ يوه بقي يا ماما متكسفنيش والنبي انا بحب عبدالله اه بس اكيد يعني  هتوحشوني.
سعيدة بحب / ربنا يهنيكم ببعض يا رب واعيش واشيل عيالكم عن قريب.
ثم أمسكت باذن ابنتها / لما نشوف يا اختي لما تتلموا على بعض هتفتكرينا وهنوحشك زي ما بتقولي ولا هتنسينا خالص ها.
يمني بخجل / خلاص بقي يا ماما انا بتكسف
ضحكت سعيده وجلست على السرير قائله / بتتكسفي بجد! وش كسوف يا بت ؟لما نشوف هتتكسفي ازاي النهارده تعالي تعالي اقعدي جنبي عايزة اقولك حاجه.
جلست يمني بجوار والدتها / اتفضلي يا قمر قولي سمعاكي.
سعيدة ببعض ملامح القلق/ انا طبعا يا بنتي فرحانة وربنا يعلم فرحنالك قد ايه، وبحب عبدالله زي ابني بالظبط، والحق يقال الواد معلهوش غبار بس بصراحة قلقانة عليكي من حماتك وسلايفك واخوات جوزك دانتي هتدخلي في بيت عيلة وياما قولتلك نأخر شوية ونطلب منه أن شالله شقة ايجار جديد بس انتي دائما كنتي بتسكتيني وتقوليلي هيجيب منين يا ماما ومستعجلة مش عارفه على ايه ربنا يسترها عليكي يا حبيبتي .
يمني/ متخافيش يا ماما عبدالله بيحبني وهيحافظ عليا وأهله كمان بيحبوني وانتي كمان اتشرطتي أن أكون معزولة يعني مفيش مشكله أن شاء الله شقة في بيتهم زي شقة بره بالظبط يعني.
سعيدة بتنهيدة / ما ده اللي جايه أكد عليكي فيه. تخليكي في حالك، ملكيش دعوة بحد ،بيتك وجوزك وبس ولا ليكي ده طيبة وده وحشه، متدخليش في اللي ملكيش فيه ،واي حاجه مضايقاكي قولي لعبدالله على طول لو مجبلكيش حقك تقوليلي انا او اختك واحنا هنجبلك حقك تالت ومتلت.
يمني بتربيت على قدم امها/ متقلقيش يا ماما أن شاء الله مفيش مشاكل طول مانا وعبدالله متفاهمين يبقي كله هيتحل أن شاء الله.
سعيدة بتمني/ اتمني والله يا بنتي يالا قومي شوفي اللي وراكي علشان عليكي حاجات كتييييير قوي ربنا يهنيكي يا بنتي ويهدي سرك اللهم امين .
أمنت يمني خلف امها وذهبت للحمام لتستعد ليومها الملئ بالمهام العديدة.
بينما خرجت سعيدة لتكمل ما كانت بدأته في إعداد صينية عشاء العروس وهي قلقة القلب مبعثرة المشاعر ما بين فرح وقلق ووحشه لغياب ابنتها عنها بالايام القادمة
...........................
بمنزل العريس الكل يذهب ويجئ منذ بداية سطوع الشمس وبدأت الحركة تدب به والعمل على قدم وساق فبدأت الام (حكمت) بإعداد وجبة الافطار الخاصة بابنها العريس (عبدالله) والذي كان بالنسبة لها له معزة خاصة فهو الابن البار بالنسبة لمفهومها للطاعة فلم يستطع أن يكسر لها كلمة كما أن  له طابع هادئ وحنون عليها وعلى إخوته فهو الابن البكري لها اول فرحتها كما يقال واول من رأت عينيها من أبناء ولكن اخر من تزوج حيث كان يشعر أنه المسؤول عن إخوته بعد وفاة والده فاطمئن على إخوته وزوجهم كلهم حتى اتي دوره وبدأ بالاعتماد على ذاته لتجهيز حاله للزواج.
توجهت حكمت الي غرفة ابنها وهي تحمل صينية الافطار المعدة بحب   ،دخلت الغرفة ووضعت الصينية على المنضدة المجاورة للفراش الراقد عليه عبدالله ثم ذهبت لتزيح الستائر من على الشرفات لتسمح لأشعة الشمس أن تنير غرفته وتبدأ معه يوم جديد لحياة جديدة .ثم توجهت وجلست بجواره تملس على كتفه وهي تحاول ايقاظه / عبدالله قوم يا حبيبي قوم يا عريس الهنا .
تقلب عبدالله فاردًا ذراعه نافضا عن جسده خمول النوم وابتسم لامه ثم اعتدل جالسا بجوارها وامسك رأسها وقبلها بكل حب قائلا/ صباح الخير يا حجه جايبالي الفطار بنفسك لحد عندي ده معقول .
انفرجت شفتي حكمت معبره عن فرحتها / ده يوم الهنا يا حبيبي يوم ما اجبلك فطارك يوم فرحك ،ده اليوم اللي بتمناه ومستنياه من زمان يوم ما اشوفك عريس ومتهني.
عبدالله بأدب / ربنا يباركلي فيكي يا حجه يا رب ويطول في عمرك ويديكي الصحة اللهم امين.
حكمت بجدية/ اسمع يا عبدالله انا لازمن اقولك الكلمتين دول علشان تحطهم حلقه في ودنك، مراتك من أول ساعة بينكم هتسمحلها تركبك مش هتقدر عليها لكن لو دبحتلها القطة من اولها هتعملك الف حساب ،واوعي اوعي يا ابني تركبها على حد من اخواتك البنات أو الرجالة اهلك لتهلك يا عبدالله سامع يا حبيبي.
ربت عبدالله علي كتف والدته / متقلقيش يا حجه يمني بنت اصول وتعرف الصح والغلط وهي بتحبكم كلكم والله ده مفيش مرة اكلمها الا وتسأل عنكم واحد واحد واهي النهارده هتيجي وتعرفوها عن قرب وتحبوها اكتر مني كمان .
حكمت بغيره وعدم تقبل اعوجت فمها على جانب واحد وقالت/ وماله يا ابني انا مبقولش عليها وحشه انا بقولك خلي بالك حوارات النسوان كتير ومتدهاش ودانك وأخواتك تخليهم قدام عنيك في المقام الأول والأخير ،ومتبقاش تحامي كدة عنها في الرايحه والجايه لو عملت كدة قدامها هتركبك وتدلدل رجليها كمان، انا بوعيك يا ابني علشان انت داخل على حياة جديدة ولو اللي فات كان حب اللي جاي جد ربنا يقويك يا ابني.
عبدالله/ عيوني يا حجة، متشليش هم انتي واخواتي على راسي من فوق ومحدش يقدر يهوب ناحيتكم مهما كان مين انتي متعرفوش معزتكم عندي ولا ايه يا حجه .
حكمت براحة قلب/ ربنا يريح قلبك يا حبيبي زي ما ريحت قلبي ويقويك النهارده ها عايزينك ترفع راسنا .وغمزت له وضحكت. ضحك عبدالله بعلو صوته وقال لها / متخافيش يا ام عبدالله ابنك شديد وهيرفع راسكم أن شاء انتي بس اتوصي بالفطار والغدا وعسل النحل متنسهوش ها.
حكمت بابتسامة وهي تشير لعيونها باصباعها/ عيوني الاتنين يا حبيبي دانا عملالك فطار ملوكي مش هتلاقيه من ايد عروستك ومش جيبالك عسل نحل بس دانا جايبالك غذاء ملكات كمان علشان تقويك يا حبيبي عقبال ما اجهزلك الغدا احنا عندنا كام عبدالله.
يالا اسيبك تفطر وتتقوت كدة عقبال انا وأخواتك ما نطلع شقتك نبخرها ونرتب هدومك لحسن أهل العروسة كوموهم كلهم في ناحية واحدة تقولش الدولاب بتاعهم وجايبينه معاهم . ثم استقامت ولكن أوقفها عبدالله بتردد / بقولك يا حجه.
استدارت حكمت لتستمع لابنها / قول يا حبيبي قول يا غالي.
تنحنح عبدالله وقال/ بلاش موضوع الهدوم ده سيبوها لما يمني تيجي ابقي اطلب منها توضبها كويس علشان بس متتعبوش حالكم انتوا وراكوا هم ما يتلم.
حكمت بمكر / وماله يا حبيبي زي ما تحب علشان برضه العروسة متزعلش وتفتكر بنفتش في حاجتها احنا هنبخر الشقة انا وأخواتك ونقفلها كويس علشان لما تدخلوها بالليل تبقي ريحتها حلوة وتطرد اي عين
عبدالله براحة بال/ ربنا يخليكي يا ام عبدالله يا فهماني انتي. حكمت بابتسامة بسيطة /يالا اسيبك انا بقي علشان نحلص اللي ورانا بسرعة ونلحق ننزل قبل ما الناس تهل يكون الطباخ خلص الغدا متنساش عايزه الصينية ده كلها فاضية سامع.
عبدالله/ عيوني يا ام عبدالله.
واستقام عبدالله ليذهب الي الحمام لأخذ حماما يبدأ به يومه ثم يتوضأ ويصلي وشرع في أكل وجبة الإفطار .
بينما خرجت حكمت وهي تحرك شفتيها يمينا ويسارا ونادت على إخوته ليذهبا سويا الي شقة عبدالله
حكمت بصوت عالي / يا الهام ،يا نبيلة،يا ايمان تعالوا معايا فوق نخلص اللي ورانا .
ايمان / كلمتيه يا ماما؟
حكمت بصوت منخفض / كلمته يا اختي واسكتي دلوقتي يا ايمان لحد اما نطلع نبقي نتكلم  يالا بينا.
صعدا كلا من حكمت واخوات عبدالله الي شقته ليبدوا ما قرروا أن يفعلونه.
..................................
بمنزل العروس توجهت الام لإكمال ما بدأته في إعداد صينية عشاء العروسين في حين اخت العروسة ياسمين تعد الافطار لوالدها ووالدتها حتي تنتهي اختها العروس من أخذ حماما وتناول الافطار .
وضعت ياسمين الافطار على المائدة ودعت كل من امها ووالدها ثم همت لإحضار يمني فبالرغم من أن الافطار لديها بغرفتها إلا أن ياسمين تصر على أنها تفطر معهم فاليوم هو الاخير في الإفطار سويا .
ياسمين وهي تطرق على باب الحمام/ ما يالا بقي يا يمني كل ده حمام هتبوشي كدة يا بنتي ومش هنلاقي اللي يلبس الفستان .
يمني بالداخل وهي مرتديه قميصها وتقف أمام المرآه وتدور يمينا ويسارا تري نفسها من الامام والخلف/ حاضر يا ياسمين طالعه اهو افطروا انتوا وانا جايه
ياسمين بإصرار/ لا خلصي مش هنفطر الا لما تيجي هنستناكي متتأخريش.
يمني وهي تتغزل بنفسها/ حاضر حاضر جايه على طول .وبصوت منخفض يا خراشي ايه الحلاوة ده يا يمني ده الواد عبدالله هيتهبل .ثم سكتت برهه وكأنها تذكرت شيئا.
مكملة/ يا نهاااااري عبدالله مين اللي هيتهبل انا هقف ازاي كدة قدامه يا نهاااااري مش متخيله اه انا اقوله مش لازم النهارده واعمل نفسي تعبانة من الفرح لحد ما ناخد على بعض لحسن انا كدة هتكسف اوي .
ثم وضعت يدها على فمها وقالت / لالالالا مش متخيلة يا نهاري ربنا يسترها بقي.
ثم خرجت من الحمام مكملة ارتداء باقي ملابسها وتوجهت الي المائدة وجدتهم ينتظرونها جلست بجوار والدتها التي قالت.
سعيدة/ بسم الله ما شاء الله ربنا يحرسك من العين يا بنتي يالا الصينية اللي قدامك ده تخلصيها كلها سامعه.
يمني بسعادة واضحة/ تسلميلي يا ماما ،بس كدة كتير جدا يا ماما انا ممكن ابقي اكل ساندوتش وابقي اخد الباقي معايا اتسلي فيهم وانا بالكوافير .
شهقت الام وقالت/ تاخدي ايه يا حبيتي دانتي هتاكلي الاكل ده كله وتاخدي معاكي كمان ده النهارده بطولة معتمد على الوجبه ده دانتي وراكي هم ما يتلم محتاجة صحتك النهارده ولا انتي عايزة تقعي مننا في وسط الفرح.
ابتسمت يمني وقالت/ لا يا حبيبتي مش للدرجاتي انا بس علشان متقلش في الحركة.
سعيدة وهي تربت على أكتافها/ كلي كلي يا حبيبتي تعيشي وتاكلي من خير ابوكي وفي بيت ابوكي.
أمنت يمني والوالد واختها .