الساحره هيام وتحقيق الاحلام

الاول

بسم الله الرحمن الرحيم

..

اول المشهد فيه واحده قاعده ولابسه جلابيه خضرا وخلطه علي راسها شال زي الرجاله وشعرها الاسود تحتيه طويل ومعلقه في رقبتها سبح طويله

وقدمها نار و علي الكرسي اللي قاعده عليه جماجم

......
فتحت الكاميرا وبدأت تتكلم

انا هيام الساحره اللي بحقق الاحلام ولو شفت الاعلان اعرف ان حظك تمام التمام .. بجلب الحبيب وبطفش العريس و بكسب الفريق وبعمل اي حاجه تخطر علي بالك سواء قريب أو بعيد

،،،،،

قفلت الكاميرا بعد ما عملت اعلان علي صفحتها الخاصة ونشرتها علي كل مواقع التواصل الاجتماعي

،،،،

وقفت هيام قدام المرايا وهي بتبص علي نفسها وبتضحك : اهو كده الشغل يا بت يا هيام .. شكل كده البليه هتلعب يسلم أفكارك يا بت

.
.....

( هيام ودي بطله الحكايه هي بنت عندها ٢٧ سنه قلبها جامد وعاقلها جبار ديما شغال ... صاحبه حيله ، طول عمرها عايشه مع عمها اللي كان ساحر .. بعد ما عمها مات حياتها اتشقلبت ومبقتش عارفه تاكل وله تشرب صرفت كل الفلوس اللي عملها سابها وكان لازم تبدأ تشتغل عشان تصرف علي نفسها

فكرت أنها تاخد مكانه وتورث الصنعه يعني مش معقول اسم عتمان السحار ينتهي كده بسهوله

وقفت قدام المرايا. هي بتقول : "مات في القرية ساحرًا ، فاستراحوا من أذاه خلّف الساحر جنّيًا ، فاق في السحر أباه"

حلاوتك يا بت يا هيام . ده انا هنيمكم من المغرب يا شويه ساحره . ...

*******

صقفت بحماس ودخلت اوضه عمها

فتحت هيام كتاب فيه سحر وتعوايذ وكلام غريب

قعدت علي الارض : ها ..يا مسهل .. انا هقرا كده واحفظلي كلمتين عشان اهرتل بيهم قدام الزباين . انا لازم اعيش الدور.

قعدت تقرا في الكتاب والنور قطع مره واحده

هيام : يا صلاه الزين. النور قطع يكونش دي علامه .. اه . بينها علامه وهتنفخ . بس . لا انا مبخفش.

سمعت صوت الباب بيتحرك ..

هيام وصوتها بيترعش بخوف : يكونش ده العفريت اللي بيقولو عليه .. اه بينه كده العفريت .

.....

صوت الباب بيفتح اكتر وفي لحظه شافت واحد واقف قدامها

صوتت : يا لهووووتي .. انصرف ...انصرف وحياه امك .. انصرف هحرقك انا بحذرك اهو ...

قرب الخيال اكتر قدمها وهي وقعت علي الارض واغمي عليها

.....

فاقت وكانت علي السرير

وفي واحد واقف قدمها : انت مين

: انا هارو .. جني ابن جن

هيام : نعممم .. انت هتشتغلني وله ايه . في عفريت يلبس قميص وبنطلون

الشاب : اه. نلبس . مش انتم بس اللي بتبلسو

هيام : لا يا شيخ .. وجيت ازاي بقي

هارو : جيت باوبر

هيام : لا . مش انا اللي يتنصل عليا . بقولك جيت ازاي

هارو: انتي اللي قريتي كتاب السحر و حضرتيني

هيام : انا

هارو : ايوه . ولسه الكتب موجوده اهي علي الارض

هيام بصت علي الكتب اللي مرميه علي الارض : انا لا استدعيتك وله نيله انا كنت بقرا بس

( سكتت هيام وافتكرت الكتاب اسم الكتاب اللي فتحته )

هيام : الكتاب كان اسمه السحر العجيب في جلب الحبيب

هارو: انا الحبيب

هيام : نعم يا خويا. انت هتستعبط يا واد
هارو؛ يا ست مقصدش . اقصد انك اما قريتي الكتاب انا حضرت .

هيام : اشتاتا شلتوت ... كتكووووت

هارو بقرف : اسمها اشتاتا اشتوت . مش عارفه تتاشتتي كويس

هيام وقفت وهي بتبص علي هارو من فوق لتحت : وانت بقي هنا عشان تكون في خدمتي صح

هارو : اه صح .. انا كنت بشتغل مع عمك عتمان .. يعتبر كنت ايده اليمين بخلصله كل حاجه

هيام : حلو اوي . يعني تعرف تساعدني

هارو: اعرف طبعا

هيام : عايزين نشتغل والفلوس تجري في ايدي وارجع لايام زمان لحسن من وقت موت عمي والحاله اتكحرتت

هارو : معاكي، بس بشرط

هيام : من أمتي الجن بيشرط

هارو : من زمان يا ابله

هيام : متقوليش يا ابله . شايفني ماسكه خرازنه

هارو: اقولك ايه لا مؤاخذه

هيام : قولي يا ست الساحره

هارو: علي راي المثل يا ساحره يا كاتبه لا ليكي دنيا ولا اخره

هيام كشرت : بتقول ايه يا متخلف انت

هارو : لا احترميني انا ليا اسم في سوق الجن

هيام : هو احنا كنا بنتكلم في ايه عشان نسيت

هارو: كنا بنتكلم علي الشرط .. انا ليا النص من اي عمليه تعمليها

هيام : هو الجن بياخد فلوس من امتي

هارو : من زمان بس انتي اللي متعرفيش .. بناخد فلوس ومعندناش خيار وفقوس ..

هيام : يا حلاوه يا ولاد . بس النص ده كتير

هارو : اما تشوفي شغلي هتعرفي أنه مش كتير يا ست الساحره

هيام : انا نشوف . يا خبر النهارده بفلوس بكره يبق ببلاش .. والمره اكدب الغطاس

هارو : هتشوفي . هنبدا الشغل أمتي

هيام : بكره يحلها رب العباد

هارو بسخريه : مومنه

هيام : اه يا واد . يكش بس الحوجه للمال مكنش مشيت في السكه دي .

هيام دخلت اوضتها : انا هنام ومتدخلش عليا. لو حصل اي جديد خبط علي الباب

هارو : حاضر

.
.......

تاني يوم

فتحت هيام الكمبيوتر و اتفجئت بطلبات الناس

هيام : يا حلاوه. كل دي ناس عايزين طلبات .. باينها كده هتلعب ..

قعدت ترقص من الفرحه : انا نفسى الاقي نفسى واد حبيب وبيه ومعاية فلوس كتيرة تلاتين تلاف جنية واشرب ازوزة فى العجوزة مع استاكوزة اية".

هارو بصلها : ازوزه . بعد ازوزه دي متتكلميش تاني

هيام اتعدلت : احم . مش تكح وانت داخل

هارو : بقولك عفريت في عفريت بيكح..

هيام : ما. علينا . بقولك بس في ناس كتير بعتتلي وعايزين شغل. بس محتاره ابدا من مين الاول

هارو بص علي الكمبيوتر : في فيهم بيستظرفو . مش كلهم بيتكلمو بجد

هيام : عرفت مين

هارو: بقولك عفريت يا ست .

هيام : طيب نعرف منين ..

هارو: استني اما نشوف مين هيبعت اكتر من مره .

هيام طول اليوم قاعده علي الكمبيوتر وهارو جنبها

لحد اما استقرت علي أول واحده

هيام : دي اول واحده
. بعتله العنوان وهتيجي بكره .. جاهز

هارو: جاهز

. .....

هيام قاعده بعد ما ظبطت نفسها ورمت البخور علي النار عشان تزيد الدخان

. وصلت الست وجت تخبط علي الباب اتفتح لوحده

الست : س سلاما قولا من رب رحيم ..

هيام بصوت عميق : تعالي يا ست انشراح . نورتي

الست مشيت علي الصوت ودخلت الاوضه .. ونطقت بخوف

: ع عرفتي اسمي ازاي

هيام : مش ساحره يا وليه . شايفه السبح دي . طيب شايفه النار وله لا

انشراح: اه يا ست . معلش متاخذنيش . اول مره اعمل حاجه زي دي

هيام : كتكوووت . ( رمت البخور في النار اللي زادت)

ومش هتكون اخر مره . قولي يا ست انشراح جايه عشان ايه بالظبط . اصل انتي حكاياتك كتير وهمومك كتير اوي

انشراح : اه يا ست هيام . ياختي انا ساكته ومعبيه في قلبي

. هيام : وتعبي ليه . قولي وفضفضي . وانا هحللك المشاكل وافكلك الأعمال اللي منغصه عليكي حياتك

انشراح : انا معمولي عمل .. اتصدقي كنت شاكه في الوليه ام سعاد ..اللي تتقصف رقابتها

هيام بذكاء : اهي هي دي .. ام سعاد جارتك بتغير منك و راشقه عينها في حياتك ..

انشراح : والنبي لاروح اضربها بالشبشب اوقع نفوخها الوليه قليله الاصل دي

هيام : لا .. مش كده يا انشراح اهدي .

قعدت انشراح : طيب اعمل ايه يا ست هيام

هيام : الوليه دي عملالك عمل و ربطاه في رقبه غراب

انشراح ضربت علي صدرها: يا لهووتي . اعمل ايه يا ست هيام

هيام : ده شغلي انا . انا اللي هعمل .. هفكلك السحر

انشراح : ربنا يخليكي يا ست هيام . والله انا مش بلحق علي المصائب . ده حتي جوزي بقي حالته حاله

هيام : عمل . عمل اسود كمان اهو . شايفاه في النار

انشراح بصت وهي مش شايفه حاجه : اه يا ختي اهو .

هيام قربت منها وبصت على النار.: اه هو ده

انشراح خرجت مبلغ كبير وحطت علي رجل هيام : خدي يا ست هيام ..وبص تفكيلي العمل هديكي زيهم

. هيام بصت علي الفلوس وعينها بتلمع : يا سلام بس كده . ده انا هفكلك العمل وافكلك أبوه كمان

رمت البخور في النار : كتكوووت . يا هااااارو

دخل هارو وهو لابس وش جن

صوتت انشراح واغمي عليها

وهيام بصتله : يا خربيتك قطعت خلفي وموت الوليه ...

هارو لهيام : ده لزوم الشغل . ده وشي الحقيقي لعلمك

هيام : اهو ياكل مع الناس . بس معايا اظهري بوشك التاني

هارو: حاضر ..

هيام فوقت انشراح ورمت عليها المايه : اه يا ست انشراح فوقي كده . انتي مش جايه لساحره وله ايه

انشراح بخوف : م معلش اصل اول مره اشوف عفريت

هيام : ومش اخر مره ... اثبتي كده عشان انادي علي الجني .

وقف وتخن صوته وهو بيضحك : خدامك يا ست هيام

انشراح بتترعش

******

يتبع