اسمى نعمة
عندى 60 سنة
جوزى الله يرحمه اتوفى من 25 سنة
عندى بنت واحدة رويدا
ماليش غيرها بعد ربنا
وهى كمان مالهاش حد غيري
من الاصل انا من سوريا واهلى كلهم من هناك
بس لما الحرب ابتديت
كلهم اتوفوا فى الحرب
بقى ماليش اهل
اما اهل جوزى
فهما موجودين لكن مسافرين كلهم دول اجنبيه بسبب اشغالهم
والتواصل بينا وبينهم مش كتير
خاصة بعد ما حماتى اتوفيت وهى اللى كانت علطول بتسأل عني وعن بنتى بأستمرار
مستوانا المادى كويس
وعايشين فى بيت خاص بينا
مكون من دورين
شبه الفيلا كده بس اصغر شوية
وده كان جوزى الله يرحمه اللى بناه بنفسه لأنه كان مهندس معمارى
كنت بشتغل فى وزارة التربية والتعليم
لكن طلعت معاش
حياتى انا ورويدا اللى فى كلية الاعلام
هادية جدا
علاقاتنا محدودة
لينا زمايل واصحاب
لكن حدودنا الشغل او اى مناسبة جماعية
غير كده بيتنا خط احمر
احنا مش بنروح بيوت حد ولا حد بييجى بيتنا كمان
وده لأقتناعى بحرمة البيت
وكمان مش بحب التدخل الزيادة عن اللزوم
معاش جوزى ومعاشى مبلغ محترم بيعيشنا فى مستوى كويس
غير ان اهل جوزى لما اتوفى
سلمونا الورث بتاعه كله بعد وفاة والدته
وكان مبلغ وقدره الحقيقة
غير ان جوزى قبل ما يموت كان سايب فلوس فى البنك كمان
وعندى عربيتى الخاصة
ورويدا عندها عربية باباها اللى قررت انها متغيرهاش بسبب تعلقها بحاجاته

الحكاية اللى هحكيها خاصة ببنتى روايدا
اه انا طرف فى الحكاية
وانا طرف فى اى حاجة خاصة ببنتى
لكن اساس الحكاية هى رويدا
بنت جميلة
عندها 20 سنة
طويلة وبشرتها بيضاء
عيونها عسلى واسعة تشبه عيون الريم
شعرها باللون الكستنائي اللامع طويل لأول خصرها
جسمها متناسق
رقيقة وشخصيتها قوية
مؤدبة جدا وخجولة
لكن فى الوقت اللى بتحتاج فيه انها تثبت حقها ووجودها بتتحول الرقة والخجل
لقوة وحزم محدش بيصدقهم

اعرفوا بقى حكاية رويدا

فى يوم من ايام اجازة الصيف
صحيت رويدا اللى اوضتها شبه اوض اميرات عالم ديزنى
اه انا شايفاها كده جدا
كل حاجة فيه كأنها مرسومة ومعمولة بدقة ومقاسات وكأن ده مكانها الاصلى
كل الاوضة باللون البينك والفيوليت
دى الالوان اللى رويدا بتحبها من صغرها

رن منبه رويدا
فتحت عنيها بنشاط زى عادتها
قامت من سريرها
دخلت بسرعة غسلت اسنانها ووشها
وغيرت البيجامة اللى هى نايمة بيها
ولبست لبس الجيم
رفعت شعرها كله لفوق على هيئة كعكة فوضوية
واخدت الشنطة الخاصة بالجيم
وطلعت من اوضتها وهى فى قمة نشاطها
نزلت الدور الارضى فى الريسيبشن
قاعدة نعمة
بتتفرج على التليفزيون

رويدا بمرح.صباح الورد يا ورد
ايه ياست الكل
انتى لسه مجهزتيش

نعمة.صباح الجمال على احلى البنات
لسه يا قلبى سرحت قدام التليفزيون فكرت الوقت بدرى لسه

رويدا.طيب ايه هتيجى معايا الجيم ولا ايه

نعمة.لاء هاجى طبعا اومال اسيبك تروحى لواحدك
تتعاكسى بعدين

رويدا بتضحك.انا اللى اتعاكس يا نعومة يا حلوة انتى
اومال الرجالة اللى على المعاش اللى عنيهم بتطلع معاكى دول اقول عليهم ايه

نعمة بتضحك.بنت احترمي نفسك ايه اللى بتقوليه ده
عيب

رويدا.يالهوى يا ناس على الحلوة اللى خدودها بتحمر من الكسوف
ايه يا ست الكل انتى بتتكسفى

نعمة.يابنت عيب بقى اتلمى
وبعدين يعنى هو انا يملى عينى ولا يدخل قلبى حد بعد ابوكى الله يرحمه
ده كان راجل ولا كل الرجالة

رويدا.الله يرحمه
ويبارك فى عمرك يا ماما
قليل الستات الاصيلة اللى زيك
واحدة فى ظروفك ووحدتك كانت قالت ادور على راجل يساعدنى فى الهم بتاع بنتى

نعمة.هم ايه يا مجنونة انتى
انا عمرى ما حسيت انك هم
من صغرك لحد ما كبرتى يا رويدا وانتى ملاك
عمرك ما تعبتينى ولا غلبتينى زى الاطفال هادية كده
ورقيقة

رويدا.يامدلعانى انتى يا ست الكل
طيب ايه بقى مش نقوم نتوكل على الله عندى تمرين عايزه الحقه

نعمة بابتسامة.بس كده عشر دقايق وتلاقينى جاهزة
اشربى بس العصير بتاعك انا مجهزاه وسايباه فى التلاجة
هطلع البس واجيلك

رويدا.حاضر

طلعت نعمة تغير هدومها
ودخلت رويدا على المطبخ
فتحت التلاجة وطلعت العصير بتاعها
البرتقال بالجزر المشروب المفضل لرويدا
وابتديت تملاء الكأس
وتشرب العصير بتلذذ واستمتاع
وده بيخليها تشرب اكتر من كأس خلال العشر دقايق

جهزت نعمة بسرعة
ونزلت من اوضتها لابسة سويتشيرت طويل
بكم باللون الاسود
وبنطلون واسع بنفس اللون
وحجاب باللون الاكوا
(نعمة سنها كبير لكن مهتمة بنفسها وبمظهرها)

نعمة.يلا يا رودى انا جاهزة يا قلبى

رويدا.جاية يا ماما يلا بينا

خرجت رويدا من المطبخ
وهى بتمسح شفايفها بالمنديل

رويدا.عليكي شوية عصير برتقال بالجزر يا نعومة
ولا اجدعها بتاع عصير
ايه ياست انتى كنتى مولودة فى معصرة ولا ايه

نعمة بتضحك.يلا يا غلباوية
وبعدين يعنى هو لازم علشان بعمله حلو ابقى مولودة فى معصرة
مش يمكن اتعلمته اكتر علشان انتى بتحبيه
وبعدين يا رودى هو العصير فيه ايه صعب
ده بترقالتين على جزرتين وخلاص على كده

رويدا بتضحك وهى بتمسك ايد نعمة وتخرج بيها من باب البيت.ايوة يا ست الكل
يبقى النفس بقى اكيد هو اللى بيحلى العصير
اعمل ايه بس
اى حاجة من ايديكى بتبقى مختلفة

نعمة.ربنا يجبر بخاطرك ويراضيكي يا قلب ماما زى ما انتى بتراضينى
ايه هنروح بعربيتك ولا عربيتى

رويدا.لاء عربيتك
انا بطلع من التمرين مش قادرة اسوق
انتى اضمن

نعمة طلعت مفاتيح عربيتها من الشنطة الصغيرة اللى فى ايديها
وراحوا سوا على العربية

رويدا.هسوق انا واحنا رايحين وسوقى واحنا راجعين

نعمة.ماشى
خدى المفاتيح

مديت رودى اخدت المفاتيح من ايد مامتها
والاتنين بملامحهم الجميلة الابتسامة مش بتبعد عن وشهم

ركبوا سوا العربية
وشغلت رودى الكاسيت على اغنية جميلة قديمة
للفنان وديع الصافى
هى بتحبها جدا
على رمش عيونها
وابتديت تندمج على ونعمة على الاغنية ويغنوا معاها
لحد ما وصلوا للنادى اللى كان مش بعيد بمسافة كبيرة عن البيت

نزلت رويدا من العربية ونزلت نعمة
وكانت رويدا علطول نشيطة ومتألقة
وبرغم علاقاتها المحدودة
الا انها بتتميز بالقبول والحب من اى حد بيتعامل معاها

بتديت تتحرك هى ومامتها تجاه صالة الجيم
اللى تحته موجود كافيه
بيتجمع فيه الاعضاء بعد او قبل التمرين او لو حد مش بيتمرن زى نعمة كده
بيقعد يرتاح فيه
مكان راقى وكل اعضائه محترمين ومن فئة اجتماعية مميزة

رويدا.يلا بقى يا ست الكل
اقعدى انتى براحتك هنا
نسكافيهاتك
وعصايرك
وايس كريماتك
عيشى لحد ما اخلص وارجعلك

نعمة بتضحك.ماشى يا قلبي
روحى انتى ومتقلقيش عليا هتيجى تلاقينى مخلصة على كل حاجة عندهم

رودى بتضحك.هنمسح الكافيه بالفلوس ساعتها
مش هيبقى معانا ندفع

نعمة بتضحك.يابنتى امشى بقى
هتتأخرى

فعلا مشيت رويدا وسابت نعمة لواحدها
طلعت التمرين بمنتهى الحماس

نعمة ماسكة تليفونها وباصة فيه

صديقة من النادى
ايمان
شافت نعمة قاعدة قررت تروح تسلم عليها

ايمان بأبتسامة.صباح الخير يا مدام نعمة
عاملة ايه

نعمة بأبتسامة رفعت عنيها من تليفونها.صباح الخير يا مدام ايمان
انا كويسة والله
انتى عاملة ايه
اتفضلى اقعدى

سحبت ايمان الكرسى وقعدت.الحمد لله كله حلو
ايه رودى فى التمرين

نعمة.اه لسه طالعه حالا

ايمان.طيب وليه تتعبى نفسك كل تمرين وتيجي معاها
عليكي بأيه تفضلى قاعدة هنا لحد هى ما تخلص

نعمة بأبتسامة.هنا قاعدة وفى البيت قاعدة يا مدام ايمان
هى بس بتبقى مش عايزة تسيبنى اقعد لواحدى
تقول هنا هتسلى بجو المكان لحد هى ما تخلص
مع انى والله ببقى مبسوطة فى البيت

ايمان بأبتسامة.ربنا يخليكم لبعض
ويفرحك بيها
هى بنت مؤدبة وجميلة
ربنا يحفظها ويبعد عنها اى شر
وان شاء الله تشوفيها عروسة

نعم بأبتسامة.ربنا يسمع منك يا مدام ايمان
بس انا المهم عندى الشهادة مش العريس

ايمان.لاء ازاى الاتنين مهمين طبعا
ايمان بنت جميلة
وبظروفها دى فيها الطمع

نعمة.بصى يا مدام ايمان
العريس هيروح فين مسيره هييجى
لكن شهادتها سلاح فى ايديها
تنفعها محدش عارف الدنيا فيها بعدين
وانا مش هعيشلها العمر كله
وبعدين مالها ظروفها
علشان يتيمة يعنى
ياستى اهالى قد ايه مسافرين وسايبين اولادهم
واطفال ايتام قد ايه
وناس قد ايه كبرت وفتحت بيوت وهما ايتام من صغرهم
دى ارادة ربنا يا مدام ايمان
وبعدين رودى انا مبخافش عليها
لو مطمع لمليون راجل
انا عارفة بنتى هتعرف تحافظ على نفسها ازاى

ايمان.ربنا يحفظها
اوعى تكوني زعلتى من كلامي
والله مش قصدى اتطفل عليكم
لكن ايمان انا بحبها
لأنها مش زى بنات اليومين دول
ومؤدبة
والله ربنا عالم كلامى خوف عليها

قربت منهم صديقة تانية
داليا

داليا بأبتسامة.صباح الخير عليكم يا هوانم
قاعدين انتم فى الشمس دى ومش شاغلين بالكم بينا واحنا طالع عنينا فى التمرين فوق

نعمة/ايمان.صباح النور يا مدام داليا

ايمان.انا خلصت ومقدرتش امشى علطول قولت انزل اقعد ارتاح هنا شوية

نعمة.رويدا بتتمرن جيت استناها

داليا.ربنا يبارك فيها
ملتزمة ماشاء الله عليها
بسبب شطارتها فى التمرين بتجيبلنا الكلام من الكوتش

نعمة بتضحك.اه رودى بتحب لما تعمل حاجة تبقى مميزة فيها

ايمان.لاء هى ماشاء الله فعلا مميزة فى كل حاجة
ياريت كان عندى ابن

نعمة.انتى كلك ذوق يا مدام ايمان
دعواتكم بس ليها انها تخلص دراستها بتفوق
علشان ارتاح بقى من قلق وتوتر الامتحانات والنتيجة
وضغط المذاكرة
عايزاها تفضى دماغها بقى

داليا.مش هتفضى دماغها ولا حاجة يا مدام نعمة
بكرة تتجوز
ودماغها ودماغك تتملى اكتر

نعمة بتضحك.لاء لسه بدرى على الجواز
هتعمل البيزنس الخاص بيها الاول
عمامها عايزين ده اللى يحصل
قالوا تثبت نفسها اهم من الجواز

ايمان.انتى مش عايزة تجوزيها باين عليكي

نعم بتضحك.معقول يعنى يا مدام ايمان
ده كلام
اكيد عايزة افرح بيها
وبأولادها كمان
انتى عارفة رودى وحيدة
وانا مش هعيش قد اللى عيشته
لازم يكون لها بيت واسرة تعيش وسطهم
بس اهلها وانا كمان الحقيقة
عايزاها تكون مأمنة نفسها
انتى عارفة
الرجالة مش بتفضل على حال واحد
الا من رحم ربى طبعا
علشان كده عايزة اسيبها فى الدنيا دى
وهى واقفة على ارض صلبة

داليا.ايوة يامدام نعمة
ربنا يطول فى عمرك ويخليكى ليها
بس برضه هى ماشاء الله عليها
معاها القرش اللى يسندها
وعندها شهادتها
يعنى مش لازم تخليها تستنى لحد ما تشتغل وتنجح كمان
مش كل الرجالة بتقبل ده

نعمة بثقة.انا عندى وجهة نظر يا مدام داليا
الفلوس بتروح
ولو كبرت والدنيا جت عليها
لو مالهاش اسم وشغل تتسند عليه بعد ربنا
يبقى هتترمي فى الشارع
لكن لما من صغرها تبقى اشتغلت وتعبت
وعملت لنفسها كيان
غير ان جوزها مش هييجي عليها او هيبقى لها مكان مميز عنده
كمان لو لاقدر الله حصل اى ظروف واضطرت تكون لواحدها
متدورش على انها هتبداء من الصفر
لأن الوقت هيكون فات
والراجل اللى ميقبلش نجاحها يبقى مش بيحبها

داليا.برافو يا مدام نعمة الحقيقة
واحدة غيرك كان زمانها دلوقتى بتفكر فى انها تجوز بنتها الوحيدة وخلاص علشان ترتاح

ايمان بأبتسامة.بصراحة عندك حق يا مدام نعمة
هما اللى اتجوزوا وقعدوا فى البيت ايه اللى حصلهم يعنى
ماهما بييجو الجيم يطلعوا طاقتهم والكبت اللى جواهم فى التمرين
وهو طول اليوم ما بين الشغل
واصحابه
وخروجاته

وانا فى البيت لواحدى كأني لوحة على الحيطة

نعمة.جددى يا مدام ايمان
خليه يحس بتغيير فى البيت
وفيكي
بلاش الروتين
بلاش كل يوم يرجع يلاقيكي بنفس الشكل

ايمان.اومال اعمل ايه يعنى يا مدام نعمة

نعمة بأبتسامة.بصى ياحبيبتى
انا اكبر منك
يعنى اسمعى نصيحتى
الصح
ان جوزك يرجع كل يوم يلاقى
البيت نضيف وريحته جميلة

يلاقيكي انتى لابسة هدوم وكأنها هدوم للخروج مش بيجامة عليها قطة ولا ميكي ماوس
ريحتك تكون حلوة
وشعرك يكون جميل
غيري فى شكلك
لوني شعرك
غيري التسريحة او قصيه قصة جديدة
الفتى انتباهه
وخليه انتى يتشد انه يرجع للبيت
اعملى الجو اللى مش هيلاقيه غير عندك
ولا فى النادى ولا مع اصحابه ولا فى الشغل
هيحس بالهدوء ده
فهمانى يا ايمان

ايمان مبتسمة

داليا.حضرتك ممتازة بجد
وكلامك ونصايحك جميلة زيك
احنا فعلا لما بنحس انهم خلاص مش مهتمين بالبيت وبينا
بنسيب نفسنا
بدل ما نحاول نشدهم للبيت بنساعدهم يبعدوا اكتر

فى الوقت اللى كانت نعمة بتتكلم مع داليا وايمان فى الدنيا
والحياة الاجتماعية
ومشاكلها

كانت رودى بتتمرن فى الجيم
بمنتهى الطاقة والحماس
والنشاط

الكوتش.عاش يا رويدا
انا بفكر اخليكي تيجي تمرني مكاني

رويدا بتبتسم.شكرا يا كوتش

الكوتش.شايفين يا شباب
هو انا عايز ده منكم
تيجوا كل تمرينة بنفس الطاقة والنشاط اللى عند رويدا ده

رويدا.خلاص يا كوتش
حضرتك عايز تحسدنى ولا ايه

الكوتش والتيم بيضحكوا على كلام رويدا

محدش بيغير منها
هى لطيفة مع كل الناس
وعفوية
ومش بتحب المنظرة ولا الغرور

خلصت رودى التمرين
وكانت حاسة ان كل عضلات جسمها
بتوجعها
دخلت التواليت نشفت جسمها من العرق
وغيرت هدومها
ونزلت وهى مش قادرة تمشى
راحت ناحية نعمة اللى كانت قاعدة لواحدها بعد ما ايمان وداليا مشوا

قعدت رويدا على الكرسى
وهى بترمي نفسها عليه من الاجهاد

نعمة.باين عليكي النهاردة طلع عينك فى التمرين

رويدا.اااه يا ماما
جسمى اتكسر
مش عارفة انا ليه بتعافى على نفسى كده انا لو داخلة الاولمبياد
مش هبقى بالطاقة دى

نعمة بتضحك.ماشاء الله عليكي يا حبيبتى
بس بلاش تيجي اوى على مجهودك يا رودى
انتى يا حبيبتى بتتمرنى علشان جسمك يبقى متناسق
انتى مش داخلة مسابقات
علشان بس متتعبيش نفسك على الفاضى

رودى بتضحك.ماشى يا ست الكل
انا هشرب برتقال
اطلبلك معايا

نعمة.لاء انا شربت كذة حاجة
مش هقدر اشرب حاجة تانية

رودى.طيب احكيلى بقى عملتى ايه من ساعة ما سيبتك
كام واحد عاكسوكى

نعمة بتضحك.يابنت عيب بقى
بلاش الكلام ده

رودى بتضحك.طيب يلا احكيلى ايه اللى عملتيه من وقت ما سيبتك لحد
ما نزلت دلوقتى

رودى طلبت البرتقال
ونعمة ابتديت تحكى كل اللى حصل بينها وبين ايمان وداليا
ورودى بتسمع وهى مبتسمة
وفرحانة جدا بتفكير مامتها
اللى مش اى ام بتفكر بيه

حياة رودى ونعمة هادية جدا
مفيش حاجة فيها بتعمل مشاكل
لكن للأسف مش دايما
تأتى الرياح بما تشتهى السفن
ولازم اى حد مرتاح وعايش فى سلام
يظهر فى حياته اللى يعكر صفو هدوئها
مش بيكون مترتب لظهوره ولا حتى متوقع
لكن
فجأة كل حاجة تتغير