الفصل الحادى عشر

رودى.ايه قالتلك ايه يا ماما

نعمة بأستغراب من حماس رودى.هتقول ايه يعنى
هتيجى هى وابنها

رودى.مش قولتلك هتوافق علطول

نعمة.هى حاولت تعمل تقيلة وابنها مشغول يعنى بس فى النهاية هتيجي

رودي.تفتكرى اللى قالته عنه وعن الوصف بتاعه حقيقي

نعمة.مش فاهماكى ابدا يا رويدا
اول مرة اشوفك ملهوفة على حد بالطريقة دى

رودى.بقولك ايه مش وقته الكلام ده
انا هروق البيت بسرعة
واطلع اجهز
وشوفى ايه الاوردر اللى هنطلبه بقى بيتزا ولا باستا ولا مشويات
علشان الحق اعمل الاوردر ويوصل على الميعاد

نعمة بتضرب كف على كف.البت اتجننت
عموما هاتى مشويات
علشان صحية اكتر ممكن بالنسبة لأفكار علشان السكر

رودى.خلاص ماشى

رودى مسكت التليفون وعملت اوردر مشويات يوصل على الساعة 4
وابتديت تنضف البيت
هو كان نضيف
لكن هى حبيت تعيد عليه بسرعة

وجهزت عصاير فريش
وطلعت علشان تجهز
ونعمة كمان طلعت تجهز

كان علي لابس بنطلون بيج على قميص كحلى بكم
ورافع الكم شوية
ولابس نضارة شمس
ودقنه خفيفة
وشعره اسود وعالى وناعم جدا
مع طوله وتناسق جسمه
كان زى القمر

وكانت افكار لابسة فستان اسود طويل
وعليه بوليرو باللون الرمادى الغامق

ولابسة حجاب معتدل بنفس لون البوليرو
واستغنت تماما عن المكياج الغريب اللى راحت اول مرة زارتهم بيه

راحوا اسوا على محل حلويات
واختار علي طبق شيكولاتة قيم جدا

فى بيت نعمة
كانت رودى فى قمة اناقتها
شعرها الطويل مفرود على ضهرها
ولابسة دريس باللون الكحلى على الركبة
وكم طويل
وحاطة ميك اب وردى خفيف

ونعمة كانت لابسة تونك طويل باللون النبيتى
وبنطلون اسود قماش واسع باللون الاسود

كانت رودى فى الانتظار على احر من الجمر
والفضول بلغ مبلغه منها

رن جرس الباب
ونعمة فتحت
واستقبلت افكار بترحيب برغم استغراب نعمة الاختلاف فى المظهر الخارجى لأفكار

رودى قربت وابتديت تسلم على افكار
ب ود وابتسامة

افكار.تعالى يا علي
سلم على الجماعة

معلش اصل هو بيتكسف شوية
خجول ابنى
نعمة بابتسامة مجاملة.لاء ليه يعنى
ده بيته
اهلا وسهلا

كان علي واقف فى جنب الباب
وظهر بالتدريج
كانت رودى واقفة جنب مامتها عنيها على اللى لابس نظارة شمس
وملامحه مش واضحة
لكن برفانه وصلها قبله

نعمة بأبتسامة.ماشاء الله بسم الله الحافظ
على بأبتسامة بيقلع النظارة.السلام عليكم

نعمة بقبول وراحة.اهلا وسهلا
عليكم السلام ورحمة الله اتفضلوا
نورت ياعلي

كانت رودى واقفة مركزة مع على اللى قلع نظارته
وبانت ملامح وشه الرجولية الجميلة

افكار.سلم على رويدا يا على
الدكتورة رويدا

رفع علي عنيه وبص ناحية رويدا
اللى كان وشها كله احمر وهى مش عارفة سبب ارتباكها
وقلبها اللى بيدق بسرعة

علي.اهلا انسة رويدا

رويدا بتمد ايديها تسلم.اهلا بحضرتك يا باشمهندس
اتفضلوا

دخلوا البيت
ورحبت بيهم نعمة فى الصالون
وحصل اعجاب من النظرة الاولى بين علي وبين رودي

ولاحظت افكار
ونعمة

اتجمعوا فى الصالون
وقعدوا وسط ترحيب من نعمة
ونظرات رودى اللى بتخطفها لعلي
وبتراقب ملامحه
وهى مش شايفة عليه اى حاجة تقول انه مش طبيعي

افكار.شكرا يا رودى يا حبيبتى

رودى وعنيها على علي اللى عنيه فى الارض.على ايه بس يا طنط

افكار.على انك متأخرتيش عليا فى الميعاد

نعمة.اه يا حبيبتى
رودي استعيبت انها تتاخر عليكي
غير انها الفترة اللى جاية عندها حاجات تخص الكلية هتشغلها شوية
قالت عيب تخليكي تنتظرى

افكار.كلها ذوق
انا نظرتى متخيبش

ابتسمت رويدا
وعلى لسه عنيه فى الارض

نعمة.طيب يلا بقى نقوم نتغدا
علشان الاكل ميبردش

افكار.تعبناكم والله

نعمة.لاء والله ولا تعب ولا حاجة
ده احنا النهاردة قررنا منطبخش وقولنا نجيب اى حاجة جاهزة من برة
علشان نخلص بسرعة ونعرف نقعد مع بعض

افكار بتضحك وعنيها على رودى.تعيشوا وتعزموا يارب
نعمة.يلا اتفضلوا على السفرة

قامت افكار
وخرجت رودى فتحت الاكل الملفوف بالورق الفويل

وخرج علي وافكار ونعمة وراها
وقعدوا كلهم على الاكل
وابتدوا ياكلوا
ونعمة وافكار بيتكلموا عن ايام شغلهم مع بعض
والمواقف اللى كانت بتحصل
وكانت رودى مستغربة جدا ان على مش بينطق ب ولا كلمة
ومش مهتم بوجودهم

خلصوا اكل
ودردشة
وقاموا يقعدوا سوا فى الجنينة

افكار.بقولك ايه يا نعمة
خلينا احنا يا حبيبتى نقعد جوة علشان الجو برد
برة وانا مش بستحمل
نعمة فهمت ان افكار بتعمل كده علشان رودى وعلي يقعدوا سوا

نعمة.ماشى يا افكار عادى هنا وبرة واحد

افكار.اطلعوا انتم يا ولاد اقعدوا برة بقى سيبونا احنا ندردش سوا

رودى بفضول.اتفضل يا باشمهندس

علي اكتفى بأنه شاور بأيديه لرودى تخرج هى قبله
خرجت رودى والفضول جواها بيزيد
ومش متوقعة ايه اللى ممكن تسمعه

خرج على وراها
وسحب الكرسى من الترابيزة
وخلاها تقعد الاول
وقعد
وبصلها لأول مرة بنظرة مباشرة
حسيت رودى انها ارتبكت واتوترت

علي.فضول يا انسة روديدا

استغربت رويدا.نعم

علي.فضول حضرتك اكيد اللى خلاكي تقبلى تقابليني
لكن لو كنتى عرفتى الحكاية من ماما
كنتى رفضتى من غير ما نتقابل المقابلة دى

اتحرجت رودى من ان على فهمها من غير ما يتكلموا مع بعض جملتين

علي.متستغربيش
اصل انا قعدت القعدات دى كتير
منهم اللى الفضول خلاهم يقبلوا يشوفونى
ومنهم اللى مهتموش ورفضوا

رويدا.ليه فضول
وايه اللى يخلي حد يرفض يقابل شخص بالمواصفات اللى مامتك بتوضحها

علي بحزن.ظروفى يا انسة رويدا

رويدا بأستفهام.اللى هى ايه بقى يا علي
وبعدين احنا ممكن نشيل الالقاب
علشان نتكلم بأريحية اكتر

على ابتسم.يعنى انا لو حكيتلك ظروفى ممكن تصدقينى

رويدا.هو انا منتظرة بفارغ الصبر اعرف ايه هى ظروفك المريبة دى

علي.انا معشوق يا انسة رويدا

رويدا بأستغراب.افندم
انت ايه؟؟؟
على.معشوق
ليا حياة تانية وعيشة تانية مع مخلوقة من عالم تانى
تحت الارض

رويدا بصدمة وعدم استيعاب.لاء معلش ممكن توضحلى اكتر

علي.انا ليا زوجة
بس من جنس تانى غير جنسنا
ومن عالم بعيد خالص عن عالمنا
وهى سبب كل العلاقات اللى بتبوظ فى حياتى
وفى نفس الوقت هى سبب فى ان حاجات كتير بتنجح فى حياتى
طبعا انا واثق ان كل حاجة بأيد ربنا
لكن هى وجودها فى حياتى
بيضرنى وينفعنى احيانا

رويدا مش قادرة تقتنع باللى بتسمعه

علي.تحبى اكمل ولا تحبى اقوم امشى
لأن واضح ان اللى قولته بالنسبالك اتسبب فى ذهول وصدمة

رويدا بأرتباك.مش بالظبط
لكن انا مش قادرة استوعب ايه قصدك بالظبط
مش عايزة عقلى يروح لحاجات مالهاش اساس

علي.لاء للأسف الحاجات اللى عقلك هيروحلها كلها لها اساس

رويدا.هو انت عرفت ايه اللى جه فى بالى

علي بأبتسامة.ايوة

رويدا.اكيد لاء
انا اللى جه فى بالى
الجن والعفاريت

على.عارف والله
وهو ده اللى انا كنت اقصده

رويدا بصدمة.انت عايز تقولى ان انت متجوز عفريتة

على.جنية اسمها جنية يا رويدا
واه فعلا هو ده اللى انا عايز اقوله
وده اللى محدش بيصدقه
فبيرفضونى لاعتقادهم انى مجنون
وفيه اللى بيصدق ويخاف يقرب مني علشان ميتأذيش او الجنية ده تضره

روديا بتضحك بعدم اقتناع.ايه يابشمهندس اللى بتقوله ده
هو انت مصدق الكلام ده
معقول
اومال تعليم ايه والتزام ايه وصلاة ايه

على.والله يا روديا مش بكدب
لو تسمعى كل الحكاية
هتعرفى انى مش بكدب
وان الموضوع مالهوش علاقة باللى انتى قولتيه ده
وبعدين الجنيات فيهم مسلمين
والصلاة وذكر الله مش بيأثر فيهم تأثير سلبى
بالعكس
لكن هى عشقتنى
او حبتنى
وقررت انى ملك ليها
وفكرة انها سابتنى بين عالمنا وعالمهم
ده تفضل منها عليا
لكن هى كانت عايزانى معاها فى مملكتها
فى عالم الجن