الفصل الثالث

رودى بتبرق عنيها.لاء يا ماما
بقولك ايه
الست دى اصلا مجرد مكالمتى معاها مريحتنيش
لو هتكون بتدور عليكي علشان حاجة زى دى
يبقى علشان خاطري سيبك منها
انا مش محتاجة وجع دماغ

نعمة.يعنى انا يا عبيطة انتى هروح اقولها عايزة اجوز بنتى
ولا حتى ممكن اوافق على عريس دلوقتى
المشكلة بس انها عايزة تقابلنا
وانا هتحرج اطنشها
احسن نلاقيها جاية هى بنفسها لحد هنا

رويدا.بقولك ايه يا ست الكل
سيبك بقى من طنط افكار وعريسها
وتعالى اقعدى جنبى
نرغى شوية

قعدت نعمة على الكنبة جنب بنتها
ومسكت ريموت التليفزيون
وقفلته

نعمة.ياسلام نرغي يا حبيبتى
تحبى نرغي فى ايه

رودى.واحدة من صحباتى كانت قاعدة معانا فى سيكشن
واليوم ده المحاضرة اتلغيت
بعد ما كلنا كنا موجودين
على اساس اننا نحضر محاضرتنا اللى كان عندنا بعدها بساعتين محاضرة تانية
يعنى مينفعش نمشى من الكلية قبل ما نحضر اللى لسه ساعتين على ميعادها

نعمة.وبعدين حصل ايه

رودى.كنت ناوية اقوم اروح اقعد فى الكافيتريا افطر بقى لأنى صحيت نزلت علطول اليوم ده من غير ما الحق افطر

المهم
قولت لزميلتى اللى معايا
علشان اشوف هتيجى معايا ولا لاء

رديت عليا قالتلى استنى ياستى لسه بدرى
خلينا قاعدين مع البنات نسمع حكاياتهم

رديت عليها قولتلها انى ماليش تدخل مع البنات اللى هى قاعدة بينهم

نعمة.طيب ليه هما مش كويسين ولا ايه

رودى.لاء والله كويسين
انا بس اللى مش بحب يبقى ليا علاقات كتير
ما انتى عارفانى

نعمة بتفرد رجليها وبتقعد براحة اكبر على الكنبة
وبتسند على رودى اللى قاعدة جنبها

رودى.المهم ياماما صاحبتى قالتلى ياستى ولا انا صاحبتهم اوى
بس اهو نضيع وقت
بدل ما نقعد ساعتين فى الكافيتريا
اقعدى اقعدى

نعمة.وبعدين
حصل ايه بعد ما قعدتى

رودى.كانوا كل البنات بيتكلموا فى وقت واحد
تقريبا محدش سامع حد
وبيضحكوا ويهزروا
وفيه منهم اللى اضايقت ان المحاضرة اتلغيت
واللى قالوا كنا استفادنا بشوية الوقت دول فى النوم
وكلام كتير من نفس النوع

لقيت نفسى بعد ما كنت مستمعة قررت اتكلم ودى اول مرة اتكلم معاهم
اصلا ماليش كلام معاهم غير فى حدود الزمالة

رودى.بقولكم ايه يابنات
لو حد عنده حاجة يتكلم فيها يكون احسن
بدل الصداع اللى على الفاضى ده
كلنا بنتكلم فى نفس الوقت
ومحدش سامع حد

رديت على كلامى بنت اسمها غادة
وقالتلهم.صح هى عندها حق
خلونا نتكلم ونتعرف على بعض
انا اسمى غادة
ومنت الارياف

رزدى.وانا اسمى رويدا
عايشة هنا
بس ماما اصلها من سوريا

وابتيدت كل بنت تعرف عن نفسها

غادة.طيب بما ان كلنا اتعرفنا على بعض
خلونى احكيلكم حكاية
محدش منكم ممكن يصدقها
او يفكرها حدوتة

زميلة.ياستى احكى
هنخسر ايه اهو نسمع احسن من الفراغ ده

غادة.حد منكم بيخاف طيب

زميلة تانية.يا غادة ما تتكلمى هو انتى هتمثلى
ما تقولى ياستى سامعينك

غادة ضحكت وبصيتلى

رودى.لاء متقلقيش انا مش بخاف
احكى يلا
شوقتينا

غادة.عارفين يابنات
كنت وانا فى الثانوى
متعودة اسهر بليل علشان اذاكر
لان البيت عندنا بيكون مزعج اوى بالنهار
لو حد منكم راح الريف هتعرفوا
الوضع بيكون عامل ازاى

نضافة البيت بقى
وتربية المواشى
والخبز
غير تجهيز الفطار والغدا واللى تحلب الجاموسة
حياة كده كلها زحمة بالنهار
وده كان بيخلينى مبعرفش اذاكر
علشان كده بستغل الليل

المهم علشان مطولش عليكم فى الكلام

فى يوم من الايام اللى قاعدة اذاكر فيها
كنت قاعدة على طبلية كده على الارض
معنديش مكتب وقتها
ومشغلة جنبى لمبة جاز علشان اخواتى كانوا نايمين فى الاوضة
احنا اصلنا نص دستة
3 بنات و3 صبيان
انا واخواتى البنات فى اوضة
والصبيان فى اوضة تانية
وابويا وامى فى اوضة معانا فى نفس الدور
وتحت المندرة بقى والمطبخ والحمام

زميلة.يعنى ايه مندرة يا غادة

غادة.المندرة دى زى الريسيبشن كده عندكم
المكان اللى بنقابل فيه الضيوف
وبنتجمع فيه على الاكل
وبنقعد فيه نتفرج على التليفزيون كمان

زميلة.حلوة اوى حياتكم دى

رودى.كملى ي غادة احكي

غادة.المهم قاعدة فى امان الله
بذاكر بمنتهى الهدوء علشان مزعجش اخواتى
لقيت البنت رباب اختى الصغيرة صاحية من النوم وقاعدة فى نص السرير
قعدتها لفتت انتباهى خصوصا ان لمبة الجاز
عكست خيالها فى الحيطة
اتخضيت لما شوفت خيال حد قاعد فى الحيطة
بصيت جنبى لقيتها بصالى
اتنفضت من مكانى

رباب.فى ايه يا غادة مالك
خضتينى

غادة بخوف.انا اللى خضيتك برضه يا رباب
انتى مش شايفة منظرك فى الخيال عامل ازاى

رباب.معلش حقك عليا
انا بس صحيت عايزة اروح الحمام

غادة.طيب وهى اللى عايزة تروح الحمام تقعد بالمنظر اللى يوقف القلب ده
ماتقومى تروحي مستنية ايه

رباب.انا خايفة انزل تحت لواحدى

(رباب اختى يا بنات عندها 6 سنين وهى الصغيرة اخر العنقود)

غادة بتأفف.يعنى انتى عايزة ايه دلوقتى يا رباب

رباب.تعالى معايا علشان خاطرى
انا خايفة

غادة.طيب يا ستى قومى
بس انا هقفلك على السلم مش هنزل

رباب.ماشى
بس كلمينى وانا جوة علشان اطمن لما اسمع صوتك

غادة بأبتسامة.حاضر ياستى
يلا بينا

غادة.اخدت رباب من ايديها
وخرجت انا وهى من اوضتنا اللى فى نص الممر
وروحنا لحد اول الممر
وقفت انا على السلم من فوق
ونزلت هى بالراحة
على ضوء اللمبة السهاري
بابا الحمام فى الجنب اللى فيه السلم
بمجرد ما نزلت رباب
دخلت علطول
نورت نور الحمام
وسابت الباب مفتوح
كده كده احنا معندناش حد تحت
وكلنا فوق نايمين

بقيت انا واقفة فوق على ضوء اللمبة السهارى
عمالة اتكلم معاها
علشان متخافش

خلصت رباب
وشوفتها طلعت وقفت على باب الحمام
وانا واقفالها فوق على اول السلم

لكن استغربت لما لقيت رباب واقفة باصة قدامها
ومتحركتش من مكانها

غادة.رباب
بت يا رباب
انتى واقفة متنحة كده ليه

رباب ساكتة مش بترد

غادة.يابنتى اطلعى انا بردت وعايزة اكمل مذاكرتى

فجأة ورباب لسة واقفة فى مكانها
صرخت صرخة
تقريبا اخر البلد سمعوها
واللى اثبتلى انها فعلا كانت عالية
ان كل اللى فى البيت صحوا
حتى اخواتى الشباب اللى نومهم تقيل
صحوا يجروا يشوفوا فى ايه

لكن انا معرفش ايه اللى ثبتنى مكانى
صرختها وخوفها
خلونى بدل ما انزل اجرى عليها
احس ان رجلى ثبتت فى مكانى على الارض
ومش بتحرك

كل اللى شايفاه اخواتى وبابا وهما بيجروا عليها تحت وهى عمالة تصرخ

كلهم اتجمعوا حواليها
بعد ما اختى نورت كل النور بتاع البيت
وهى واقفة قدامهم تعيط بصوت عالى يوجع القلب
وانا على نفس الوضع فى مكانى
هموت وانزل اشوف مالها
لكن مش قادرة

ماما.مالك يا رباب
فى ايه يا حبيبتى
ردى يمة عليا

بابا.حصل ايه انتى فيه حاجة وجعاكى قولى يا رباب
صرختى ليه كده
بتعيطى ليه طيب احكيلنا

هى مستمرة فى العياط
واخواتى كل واحد بيحاول يطمن عليها بطريقته
واللى منهم راح يلف فى البيت يمكن فيه حد كان داخل يسرق البيت
وهى شافته وخافت
لكن مفيش اثر لأى حد
ولا فى البيت ولا حوالين البيت

زميلة.اومال كانت بتصرخ ليه طيب
ايه اللى شافته خلاها توصل للحالة دى

غادة.فى اليوم ده معرفناش هى شافت ايه
كانت منهارة وخايفة
وبرغم اننا معاها فى نفس الاوضة
الا ان ماما اصرت انها تاخدها تنام معاها فى اوضتها هى معاها هى وبابا
فعلا دخلت رباب نامت معاهم
وكل شوية تقلق وتصرخ
وكل سوية تعيط
ماما وبابا اليوم ده معرفوش يناموا

وانا واختى فى اوضتها مستغربين
ايه اللى ممكن يوصل بنت فى السن ده للحالة الغريبة اللى هى فيها دى
واحنا مش قادرين نعرفه

سهام اختى الكبيرة.يا غادة انتى مش كنتى واقفة معاها
ازاى يعنى متعرفيش حصل ايه

غادة.والله يا سهام معرفش
انا كنت واقفة مستنياها وعمالة اتكلم معاها
علشان هى كانت خايفة تنزل
وبعد ما خلصت وخارجة من باب الحمام
لقيتها اتسمرت مكانها
وفتحت عنيها على اخرها
وبتصرخ
بالشكل اللى انتم سمعتوه ده

سهام.ومنزلتيش تجرى عليها ليه
انتى مجنونة تسيبي البنت فى الحالة دى وتقفى تتفرجى عليها
اخت كبيرة ازاى انتى يا غادة

غادة بندم.والله معرفش ازاى اتربطت مكانى كده
كنت هتجنن واجرى عليها
بس الخوف اتملك مني
معرفش ليه
مع انى عرفة انى المفروض انا اللى اجرى عليها
واطمنها
لكن حسيت ان رجليا مربوطة فى الارض بمسامير
مش عارفة اتحرك من مكانى والله

سهام.جيب العواقب سليمة يارب
ياترا مالك بس يا رباب

غادة.اكيد هنعرف منها الصبح بس هى تهدا شوية
صعبت عليا يا عينى ووشها ازرق وبتصرخ بكل اعصابها

سهام.علشان كده بقول اكيد شافت حاجة مشافتهاش قبل كده
لأن رباب اول مرة تعمل حاجة زى دى

غادة.هتكون شافت ايه يعنى
ماهو اكيد مش عفريت

سهام.ليه يعنى اكيد مش عفريت
مش بعيد على فكرة
ما هو الرعب اللى هى فيه ده كان مش طبيعيى

غادة بأستهزاء.بس يا سهام بلاش تخاريف
عفاريت ايه يا تافهة انتى
هو انتى بتصدقى فى الكلام الفارغ والخرافات دى
هى بس ممكن الضلمة خضتها
وبعدين من دلوقتى للصبح مش بعيد
وهنعرف منها هى ايه اللى حصل

سهام بقلق.ربنا يستر

نمنا انا وسهام
وانا بفكر النهار لما يطلع رباب هيكون ايه ردها على سؤالنا
لما نحب نعرف منها هى وصلت للحالة دى ليه

طلع النهار
وصحينا فى ميعادنا زى كل يوم
ولأن انا عندى مدرسة
معرفتش اسأل بدرى اوى كده
علشان اكيد الموضوع هيحتاج وقت وانا ورايا مدرسة

فعلا روحت المدرسة اليوم ده
ودماغى مع رباب
وبستنى اليوم يخلص بفارغ الصبر

فاتت حصص المدرسة بتقل رهيب اليوم ده
ورجعت على البيت
اول ما دخلت من باب بيتنا
كانت عندنا كنبة عربى كده لو تعرفوها
تلاقوها موجودة فى البيوت البسيطة

ماما قاعدة عليها وهى مربعة رجليها
ومحاوطة رأسها بأيديها
وصوت عياطها مسموع

وقبل ما اجرى عليها
شوفت سهام اختى خارجة من المطبخ
وماسكة فى ايديها كوباية مياه بسكر

جريت وقفت جنب امى وانا حاطة ايدي على ايديها اللى على رأسها
وعينى مع سهام اللى بتقرب علينا

غادة.فى ايه يا ماما مالك
فى ايه يا سهام امك مالها
حصل حاجة تانية لرباب ولا ايه

امى صوت عياطها زاد

غادة بانفعال.فى ايه يا سهام ما تردى عليا
مالها امك

سهام قربت وبتمد ايديها بالكوباية لامى

غادة.اشربى يمة واستهدى بالله
ياناس حد يطمنى فى ايه

سهام.امك زعلانة على رباب
بتقولك طول الليل مجرد ما تغمض عنيها
تصرخ وتقوم تقعد فى نص السرير
تعيط
وتحط ايديها على عنيها
وكأنها مش عايزة تشوف حاجة حواليها

غادة.طيب يعنى هيكون فى ايه
هى ممكن مفجوعة من حاجة
عيلة صغيرة هى
يعنى متخافوش ان شاء الله

الام.لاء يا عيال البت شافت حاجة وحشة
البت مفجوعة فاجعة صعبة

غادة.طيب هى فين انا هطلع اسألها

سهام.لاء مش هنا هى
ابوكى طلع بيها هو واخواتك

غادة.طلعوا بيها على فين
هى البت حصل فيها حاجة

سهام.لاء راح بيها عند شيخ كده فى بلد جنبنا
بيقولوا عليه كويس
راحوا بيها
علشان يرقوها
لو فيه حاجة تبعد عنها

غادة بأستغراب.رقية شرعية يعنى

ماما.اه يابنتى
هو فيه احسن من كلام ربنا علشان يهديها
ادعى بس اختك ماتكونش اتأذيت

غادة.يعنى ايه يمة اتأذيت

سهام.يعنى اتمست يا غادة