تروى الاحداث خلال فترة زمنية بعيده وتستمر حتى تلك الايام التى نتعايشها ببطء
تدور حول اسرة فقيرة
يضطر رب اسرتها الى اجبار ابنائه الى السفر للعمل فى الخارج
وكسب المال ومساعدة اسرتهم على صعوبات المعيشة والحياة
يضطر احد الابناء وهو اسمه سيد
للموافقة على السفر
والابنتين فاطمة ورئيسة للقبول ايضا ولكن كل واحدة منهن توجهت لبلد مختلفة عن الاخرى
حيث عملن خادمات
تتطور الاحداث معهن سريعا
ويحدث الكثير مما لم يكن فى الحسبان
ولكن ظروفهم لاتقتصر عليهم فقط
ولا على تلك الاسرة البائسة
بل تمتد ايضا لحياة الاحفاد بعد زواجهن
ورجوعهن للعيش فى بلدهم
وتكتمل احداث القصة
بالظروف التى ستتعرض لها احدى البنتين
وهى فاطمة
التى سوف تعانى وسوف يعانين ابنائها ايضا
حتى الان
كم هى صعبة حياتهم حتى انها لم تصل للنهايات السعيدة بعد
بل مازالوا يحاولوا التعايش مع تلك الايام المريرة وصعوبة الحياة


فى محافظة الاسكندرية
منطقة شعبية قديمة جدا
اسمها بحرى
بيعيش فيها اسرة فقيرة
فى بيت قديم متهالك
من البيوت العربي اللى كانت بتعيش فيها اكتر من اسرة
وكل اسرة بتعيش فى اوضة فى البيت المجمع ده
ولو اسرة حالها كويس شوية
كانت بتمتلك فى البيت ده اكتر من اوضة
او شقة كاملة
الاوضة اللى كانت تعيش فيها فاطمة
كان موجود فيها غيرها 4 اخوات تانيين وامها وابوها
اللى علطول كانوا مختلفين
وعلطول كانو بيتخانقوا
بسبب بخل عبدالله الاب
فى يوم من الايام جه عبدالله وجمع اولاده الخمسه قدامه رئيسة
فاطمة
السيد
يوسف
ياسر

عبدالله.بقولكم ايه ياعيال
انا لقيتلكم كام شغلانة كده
لكل واحد وواحدة فيكم
المهم بس انتم تطولوا رقبتى
خلونا بقى نقب على وش الدنيا كده
مش هفضل اصرف عليكم العمر كله
وانتم بتاكلوا فى اتة محلولة

السيد.شغل لينا كلنا انا ويوسف وياسر يعنى

عبدالله.لاء انتم الخمسة

السيد.احنا الخمسة
قصدك رئيسة وفاطمة كمان

عبدالله.اه

السيد.شغل ايه ده يابا

عبدالله.انت هتسافر السعودية
هتشتغل هناك فى المعمار

وفاطمة مسافرة لبنان

ورئيسة هتسافر المغرب

السيد بصدمة.ايه يابا اللى بتقوله ده
انت عايز تخلينا نسافر

عبدالله بغباء.اه طبعا تسافروا متسافروش ليه
اهو على الاقل هتصرفوا على نفسكم شوية
بدل م انا ضهرى اتقطم من المصاريف عليكم

السيد.يابا هو انت بتصرف حاجة
دى حتى اللقمة اللى بتجيبها فى البيت
انت اللى بتاكلها
وبعدين م انا واخواتى شغالين
ايه بس لازمة الغربة
وسفر البنات
وهيشتغلوا ايه
مش هتخاف عليهم

عبدالله.لا ياسيدى مش هخاف
بناتى انا عارفهم محترمين
وهيشتغلوا فى بيوت اكابر هناك
يعنى مش هيتبهدلوا
الناس الاكابر هينضفوهم ويأكلوهم احسن اكل
مش بس كده
كمان هيصرفوا عليهم كويس ومهياتهم حلوة

فاطمة.انا موافقة يابا
هسافر امتى

عبدالله بفرحة.جدعة يابت يا فاطمة
بنت ابوكى صحيح
بكرة هروح للمخدم
واتكلم معاه واشوف ايه المطلوب علشان نعملك انتى واختك جوازات سفركم

فاطمة.ماشى يابا
انا هطلع انشر الغسيل بقى على السطح

عبدالله.ربنا يكملك بعقلك يابنتى
شاطرة

بص عبدالله لباقى عياله وبيشاور مكان فاطمة ما خرجت.شايفين اختكم جدعة ازاى
بت فاهمة مصلحتها مظبوط
مش خايبة زيكم
انتم قاعدين هنا عاجبكم ايه يعنى
ياعيال انا بكبر
والحمل كبير عليا
انا مش قادر اصرف عليكم كلكم
تقصيرى ده مش بخل
بس قلة حيل
وكل برغوت على اد دمه
ودى قدرتى
وده رزقى
علشان كده قولت اشوفلكم حاجة تنفعكم بعد كده
لما تكبروا وتخلفوا
متحرموش عيالكم زى م انتم محرومين
ها
قولتوا ايه

رئيسة.ماشى يابا انا كمان راضية وقابله

السيد بيبص لرئيسة ومصدوم.راضية ب ايه يابت يا رئيسة
تتغربى وتسافرى وتعيشى فى مكان متعرفيش حد فيه
تعرفى منين انتى الناس اللى هتروحى تعيشي فى وسطهم

رئيسة.يا سيد ياخويا ويعنى اللى عرفتهم ولا اللى اعرفهم نفعونا بأيه
ابوك عنده حق
مش هنعيش فى الحرمان والفقر ده عمرنا كله
خلينا نسعى ياخويا
لعل وعسى ربنا يكرمنا ويقدرنا بقى
ونخلص من الحوجة دى

يوسف.بصراحة يا سيد ياخويا.انا شايف ابويا عنده حق
لازم كلنا نشقى ونتعب دلوقتى
علشان لما نكبر شوية
ولا كل حد مننا يبقى له بيت
ميحرمش عياله ولا بيته زى م احنا اتحرمنا

السيد بيبص لأخوه الصغير المدلع ياسر.طيب وانت يا ياسر ايه رأيك
شايف ايه

ياسر بلا مبالاة.لاء انا مش بتاع سفر
انا هشتغل هنا
واكفى نفسى
واللى هقدر اعمله فى مصروف البيت هعمله
ولو محصلش مني الكلام ده يابا ابقى سفرنى
قولت ايه

عبدالله بيهز راسه.عشرة على عشرة كلامك ياض يا ياسر
خلاص استبينا
اتوكل على الله ياسيد
يمكن السفر ده يكون فاتحة خير ليك وياسيدى لو ربنا قدرك وكرمك وفتحها عليك من وسع
وعايز ترجع اخواتك وتستتهم
ابقى مش راجل لو قولتلك لاء

يوسف.يلا يا سيد على بركة الله بقى
بلاش توقف المراكب السايرة

السيد وهو مش مقتنع ولا مرتاح بص لأبوه.ماشى يابا شوف اللى يريحك اعمله
مش هقولك حاجة انا

عبدالله بفرحة.حلو اوى على بركة الله
هى امكم فين بقى

رئيسة.امي راحت السوق
علشان تجيب الاكل بتاع النهاردة

عبدالله.طيب اعمليلى كوباية شاى بقى وهاتيهالى برة فى الحوش

رئيسة بأستسلام.حاضر يابا

فعلا خرج عبدالله من باب الاوضة البسيطة جدا اللى كل مكوناتها عبارة عن سرير كبير وسرير دورين
وكنبة عربى قديمة
و وابور جاز
ولمبتين جاز
ولمبة سهارى ضوئها ضعيف
ودولاب ضلفتين وراديو قديم

السيد بعد ما ابوه خرج.يارجالة انتم موافقين على سفر اخواتكم

يوسف.انا قولتلك رأيي يا سيد يا خويا
وشايف ان ده احسن لهم
خليهم يجربوا ويشوفوا الدنيا
وانت اخواتك محترمين
وانسى انهم يغلطوا
ولا يعملوا حاجة حرام
معندناش حد بيمشى فى السكك البطالة

ياسر.انا شايف ان ده الصح
بلاش انت بس تفضل قلقان وخايف كده
وبعدين برضه اكيد امي لما تيجى هيبقى لها رأى

السيد بيحاول يقتنع.اكيد امى كمان هتوافق زيكم
خلاص بقى على بركة الله
اللى فيه الخير ربنا هيقدمه

ياسر.ده عين العقل يا سيد
ايوة بقى خلينا نتغني بقى ونقبض بالعملة الصعبة

السيد بيضحك وهو بيضرب ياسر على كتفه بالراحة.انا عارف انتم هتغرقونا
بس ماشى ياعم
انا هعمل بكلامكم

يوسف.الله ينور عليك
تعالوا بقى نطلع نقعد على القهوة

ياسر.اه يلا خلينا نلعب عشرتين طاولة
ننسى بيهم الهم ده

سيد.ماشى يلا بينا

فعلا خرجوا الشباب كمان
وفاطمة كانت بتنشر الغسيل على السطح
ورئيسة بتعمل لابوها الشاى

رجعت ام سيد من السوق
شايلة اكياس فيها طماطم وبصل وبطاطس ورز

رئيسة.حمدالله ع السلامة يمة
جيبتى ايه

ام سيد.شيلي من ايدي يابت الاول
نفسى اتقطع ياختى

رئيسة قربت من امها بتمسك منها الاكياس وبتضحك.تسلم ايديكي يمة ميحرمناش منك ولا من مجايبك

ام سيد بتضحك.ربنا يسعدكم ياحبيبتى
واشوفكم فى بيوت العدل كده انتى واختك مع رجالة تفتح النفس ترجعلكم البيت شايلين ومحملين
مش يرمولكم قرشين صاغ وتنزلوا تلفوا بيهم تدوروا على اكل يكفى الفلوس اللى معاكم
ياختى الحاجة بتغلى
وابوكى ولا عايش فى الدنيا

رئيسة.اسكتى يمة
ده عايزنا نسافر
انا وفاطمة اختى نروح نخدم فى البيوت
والسيد اخويا هيروح السعودية يشتغل فى المعمار
بنا يعنى

ام سيد شهقت بصدمة وضربت بأيديها على صدرها.يامصيبتى
عايز يسفركم
اتجن فى دماغه ده ولا ايه
لا ياختى تسافروا فين وتبعدوا عني وعن حضنى
ابدااااا
متطلعوش من هنا غير على بيوت اجوازكم

رئيسة.بس فاطمة وافقت يمة
وانا كمان الصراحة

ام سيد.يالهوى يابت
وافقتى انتى واختك
ليه امكم ماتت علشان ترضوا بحاجة من غير ما تشوروا عليها

رئيسة.يمة انتى عارفة ابويا لما بيحط حاجه فى دماغه بتحصل
هيفضل ماسكلنا الفقر لو قولنا لاء
ويكرهنا فى عيشتنا لحد ما نقبل
طيب وعلى ايه بقى
نوفر على نفسنا حرقة الدم
والحرمان من الاكل
والصوت العالى والفضايح اللى بيعملها لما بيمسك القرف
والجيران بقى تسمع بينا وبطولة لسانه
لاء على ايه
الشغل مش عيب واهو نجرب يمكن حالنا يتغير يمة

ام سيد بتبص لبنتها بحزن.عارفة يابتى كل اللى بتقوليه ده
بس ازاى يا رئيسة هحط راسى على المخدة وانتم مش فى البيت
لاء ده انتم مش فى البلد كلها
يعنى لو حد منكم تعب ولا اتوجع
مش هعرف اشوفه ولا اطبطب عليه
لاء ياختى
قلبى ميطاوعنيش ابدا
مش هستحمل
وبعدين يعنى انا بفضفض مع مين غيركم

رئيسة عنيها دمعت.يمة بلاش تقطعى قلبى
بس يعنى يرضيكى الحال اللى احنا فيه ده
طيب افرضى جه لواحدة فينا عريس
ابويا هيرضى يجهز واحدة مننا
مشه يقول لاء
بس هيقول منين
ومعييش
وخليكم قاعدين جنبى
صح يمة ولا لاء