الفصل العاشر

رئيسة اتصدمت

اسامة اتفاجئ من الرد

طاهر بيبص لرئيسة.معلش سامحينى
بس انا معنديش وقت اقعد اقول تعاليم
وقوانين
ونظام التعامل فى بيتى
انا عايز حد يشتغل عندى علشان اريح دماغى من
اى حاجة تخص البيت
لكن انتى مشتغلتيش قبل كده
يعنى لسه بدرى علشان تتعلمى

رئيسة من الصدمة عنيها دمعت ومش عارفة ترد

اسامة زعل على حال رئيسة
هو عارف انها بالحال ده لازم ترجع بلدها
وهى مش معاها فلوس اصلا
غير انها حتى لو قعدت فى ليبيا
هى برضه هتكون محتاجة مصاريف لحد ما تلاقى شغل

اسامة.على فكرة يادكتور
هى رئيسة اه مشتغلتش فى بيوت قبل كده
لكن هى تقدر تحافظ على البيت
وتقوم بكل الشغل اللى فيه
هى كانت مسؤولة عن بيتهم
فى مصر

طاهر.يا اسامة
اى بنت طبيعى بتكون عارفة يعنى ايه شغل البيت
لكن انها تكون مسؤولة عن انها تشتغل فى بيت
ومتتكاسلش ابدا فى اى مهمة تخص البيت ده
وانها تبذل اقصى طاقة عندها
علشان تحافظ على المكان اللى هيكون سبب فى انها تلاقى
مقابل مادي
مناسب ليها معتقدش انى هلاقى ده من بنت معندهاش خبرة
وانت عارف انا وقتى مش هيساعدني اعدل على اى تصرفات

اسامة.يا دكتور طاهر
تسمحلى نتكلم لوحدنا شوية

طاهر.طيب اتفضل نقعد فى المكتب

اسامة.ممكن نخلى رئيسة تعمل اتنين قهوة لحد ما نخلص كلامنا
انا عارف وقت حضرتك ضيق
بس مش هعطلك كتير

طاهر.طيب
وشاور بأيديه على مكان المطبخ
اتفضلى يابنتى المطبخ من هنا
وهتلاقى البن والسكر على رخامة المطبخ

دخلت رئيسة بحزن وكسرة
للمطبخ
وابتديت تعمل القهوة
بعد ما عرفت من دكتور طاهر انه بيشربها سادة

اسامة بصوت واطى.يادكتور
البنت دى جاية من بلدها
معهاش حتى فلوس مواصلات
يعنى لو حضرتك رفضت تشغلها
ولا معاها فلوس ترجع بيها
ولا حتى فلوس تقدر تعيش بيها هنا
لحد ما تلاقى شغل تانى
خلينا نجربها لمدة اسبوع
مش اكتر
ولو حضرتك شوفت انها مش مناسبة للشغل
بلغنى بس بعد يومين
وعلى اخر الاسبوع اكون وفرت لحضرتك
واحدة تانية غيرها
واكون قدرت اشوفلها هى حل فى ظروفها الملغبطة دى

طاهر بتفكير.ازاى بنت زى دى تسافر من بلد لبلد
علشان تشتغل
وهى معندهاش اى خبرة؟

وازاى اهلها يقبلوا انها تروح بلد غريبة من غير ما يكون معاها فلوس لأى ظرف ممكن يقابلها ؟

انا مش بقدر ابدا افهم نوعية الناس الغريبة دى

اسامة.طيب حضرتك قولت ايه فى اقتراحى؟

طاهر بيفكر
خرجت رئيسة من المطبخ ماسكة صنيه عليها فنجانين قهوة
وكوبايتين مياه
وحطيتهم على ترابيزة صغيرة قدام دكتور طاهر
واسامة
ووقفت وهى حاطة عنيها فى الارض
وحابسة دموعها بالعافية

طاهر بيبص لرئيسة.بصى يابنتى
انا مش من النوع اللى بشغل عندى حد
لمجرد انه صعب عليا
انا هعمل زى ما اسامة طلب مني
وهشغلك اسبوع
لو قدرتى تثبتى نفسك
هتكملى معايا
ومش هتندمي انك قررتى تيجي تشتغلى هنا
لكن لو لقيتك كسلانة
او مش مهتمة بالنضافة
او من الناس اللى بتكروت الشغل وخلاص
يبقى انا مش هخليكي هنا يوم زيادة عن الاسبوع اتفقنا

رئيسة بتمسح دموعها.كتر الف خيرك يابيه
والله هتلاقينى لهلوبة
هتشوف بنفسك

طاهر.انا مش بيه يابنتى
انا اسمى دكتور طاهر
واسمها حضرتك مش بنفسك

خلاص يا اسامة
خليها ويومين وهقولك الاخبار ايه

اسامة بسعادة.الف شكر لحضرتك يادكتور
انا مش عارف ارد لحضرتك الجميل ده ازاى
لكن والله انا واثق ان رئيسة هتكون عند حسن ظن حضرتك

طاهر.اتمنى يا اسامة

اسامة.طيب حضرتك محتاج مني اى خدمات تانية؟

طاهر.لاء شكرا يا اسامة
واستنى مني تليفون خلال يومين

اسامة.خلاص اتفقنا
بعد اذن حضرتك

قرب اسامة من رئيسة وبصوت واطى.طولى رقبتي يا رئيسة
عايز بعد يومين يتصل بيا الدكتور
يشكرني

رئيسة بأرتياح وثقة.متقلقش
هشرفك

اسامة.طيب يلا هسيبك دلوقتى
وهبقى اطمن عليكي
لو مش هتباتى هنا
يبقى تكلمينى فى التليفون بتاع المكتب رقمه هنا عند الدكتور
كلمينى اجى اخدك عند نسمة

رئيسة.حاضر

خرج اسامة وهو متفائل
وحاسس ان رئيسة برغم هزارها ومشاكستها
الا انها ممكن تكون بتاعت شغل
وهى كانت متحمسة جدا
وعايزة تعمل اقصى جهد عندها علشان تثبت للدكتور انها شاطرة وبتاعت شغل

طاهر.تعالى يا رئيسة
اقعدى هتكلم معاكي شوية

اتوترت رئيسة وقربت من الكرسى اللى قصاد طاهر وقعدت وعنيها فى الارض

طاهر.لاء ارفعي وشك كده
علشان احس انك مركزة مع كلامي

رفعت رئيسة وشها ووجهت نظرها لطاهر

طاهر بحزم.شوفى يا رئيسة
انا ليا مواعيد بصحى الصبح الساعة 7
لازم الاقى الحمام جاهز
وبمجرد ما ادخل الحمام
اخرج الاقى الفطار جاهز
وقبل ما يخلص الفطار تكون القهوة قدامى
صنية الاكل تتشال من قدامى بمجرد ما بخلص اخر لقمة
وتتغسل فى نفس الوقت
مش بحب الكركبة
الغسيل اول بأول
ملايات السرير تتغير يوميا
وقبل ما تتفرش تتكوي
كل يوم البيت يتنضف ويتمسح بمياه وفنيك
بنزل من البيت الساعه 9
برجع على الغدا
الساعة 4
الاقى الغدا جاهز بمجرد ما ادخل اغسل ايدي
اخلص يكون فنجان قهوتى قدامى زى الفطار بالظبط
بليل برجع الساعة 11
بتعشى زبادى
وبنام الساعة 12 ونص
كده دى كل مواعيدي
وعايزك تهتمى بكل حرف قولتهولك
اتفقنا

رئيسة.اتفقنا

طاهر.لو تحبى تنامي هنا فيه اوضة مقفولة
دى خاصة بالضيوف
تقدرى تستخدميها
هى فيها راديو وتليفزيون
وكمان فيها سرير ودولاب
يعنى جاهزة

رئيسة.كتر الف خير حضرتك يادكتور
لو مش هتقل على حضرتك
معلش خلينى هنا اليومين دول

طاهر.تمام مفيش مشاكل

دلوقتى تقدرى تدخلى تتفرجى على البيت
وتحفظى مكان كل حاجة فيه
انا دلوقتى خارج
وهاجى على العشا طبعا يعنى مش هيبقى فيه غدا النهاردة
بس عايز اجى معرفش البيت من نضافته
انا بقالى فترة قاعد هنا من غير ما حد ينضف البيت

رئيسة بحماس.تؤمرنى يا دكتور

طاهر قام اخد شنطته ولبس جاكيت البدلة بتاعته وخرج من البيت
وبمجرد ما خرج من البيت
بقيت تلف رئيسة فى البيت كله
وتحاول تجمع اماكن كل حاجة
ودخلت غيرت هدومها بجلابية هى جايباها معاها
وابتديت تمسك جزء جزء فى البيت
ونضفته
وكأنها هتاخد جائزة فى النضافة
طلع عنيها فى البيت
اللى كان مكون من 3 غرف غير المطبخ والحمام
وفعلا كل حاجة اتعلمتها فى بيت اهلها
عملتها وزيادة شوية
كان البيت بيلمع من النضافة حرفيا
كان مفيش فيه ذرة تراب
بس تعبت جدا من المجهود الكتير اللى عملته
دخلت بسرعة قبل الميعاد اللى هيرجع فيه طاهر للبيت
اخدت دش
ورجعت لبست تانى هدومها اللى جت بيها
وفضلت قاعدة فى المطبخ
مستنية وصول طاهر
اللى جه فى الميعاد اللى قال عليه
وكانت رئيسة مأكلتش اى حاجة من وقت ما فطرت عند نسمة
لكن قلقت تاكل اى حاجة من غير ما يسمحلها طاهر
اللى اخيرا وصل البيت
سمعت رئيسة
صوت المفتاح فى الباب
قامت وقفت من على الكرسى اللى فى المطبخ
وهى قلقانة من طاهر

دخل
وقف فى الصالة بعد ما قفل باب الشقة
وبيشم ريحة البيت النفاذة اللى عجبته
وبيبص فى كل ركن فى الصالة
وملاحظ الفرق
لان البيت كان بقاله فترة مش نضيف
ابتدا يمشى فى البيت
ويلف فى الاوض
ولاحظ النضافة والترتيب
دخل المطبخ كانت رئيسة واقفة وبتفرك فى ايديها من التوتر

طاهر.الله ينور يا رئيسة
برافو عليكي
البيت ريحته جميلة
وشاطرة منضفة كل الاركان المستخبية
بكرة بقى اجرب الاكل بتاعك
ان شاء الله يعجبنى زى شطارتك فى النضافة كده

رئيسة بسعادة.الف شكر يا دكتور

طاهر.طيب انا هدخل اخد دش
وحضريلي الزبادى ومعاها كوباية عصير ليمون
صحيح يا رئيسة انتى اكلتى؟

رئيسة بأحراج.لاء

طاهر.ليه بس يابنتى كده؟
هو انتى جاية هنا علشان اجوعك
لاء التلاجة قدامك
طلعى منها اللى يعجبك
واتعشى انتى اكيد تعبتى فى البيت

رئيسة.المهم ان البيت عجب حضرتك
انا من فرحتى حاسة انى اكلت خروف

طاهر.متقلقيش يابنتى انا مش هظلمك
لما تكونى عاملة شغلك مظبوط
لازم تاخدى حقك
يلا هدخل انا اخد دش
وانتى حضريلي اللى قولتلك عليه
وحضرى لنفسك حاجة تاكليها

رئيسة.حاضر
ثوانى وكله يكون جاهز